去海洋公園

我地帶咗BB同埋爸爸公司啲同事去海洋公園，因為爸爸公司包咗夜晚場，所以唔使同咁多人迫，

在四時至十一時，不過其實媽咪都唔係好贊成去架，因為佢又唔識玩，同埋佢成日都要瞓覺，我都驚到時只係去到抱住佢。都好彩佢睇海豚表演同埋睇水母既時候都幾乖，仲眼甘甘咁睇住啲水母郁，仲夠膽用手拍添。不過佢都仲係好認人，見到爸爸公司啲同事都唔肯俾人抱，仲想喊添。善如隔離那個就是大佢一日既灼垣哥哥呀，佢就乖好多，個個抱佢佢都肯架。

不過到最後我地九點都係走先，因為佢又肚餓，又想瞓覺，海洋公園又大風，費事吹親佢呀。

古靈精怪

BB古靈精怪，表情多多，成日都做埋啲攪笑動作，你地睇吓佢，飲飲吓茶對住個鏡頭就係咁喇。

爹D生曰

爹D生日去咗新蒲崗食我地最愛既日本buffet，好好味，有咗善如就當然唔可以周圍去啦，不過我地都好enjoy同BB一齊既生活。

BB 厭奶期？？

BB呢個星期唔知係咪厭奶期，唔想食奶，成六個鐘頭唔食野，朝早起身一啲都唔覺得肚餓，只係肯食三四安奶，BB可能差唔多要轉奶所以唔想食，希望BB快啲想食番多啲啦。其實我地已經俾糊仔，粥仔，同埋蘋果蓉BB食，佢食蘋果蓉個樣好攪笑呀，你地睇下啦﹗

BB 六個月喇

BB六個月喇，又要去母嬰健康院打針針呀，今次要打兩支針，一邊左脾，一邊右脾，真係可憐呀。BB去到已經好眼瞓，打第一支針已經好大聲喊，心情都未平伏就要打埋第二支，佢直頭喊到拆天，成個母嬰健康院既人都望住佢，喊足幾分鐘呀﹗

BB既高度同重量都維持得幾好，佢有8.78kg(即係19.3磅)，屬於大號BB，BB繼續努力呀﹗

BB 出街街

最近BB成日出街街，除咗嫲嫲每日都有帶BB落會所玩之外，媽咪每個星期六都有帶BB出街。因為見佢都差唔多六個月大，開始要去見下啲陌生人呀。 但係因為爹D要番學同溫書，所以媽咪個個禮拜都捉咗姨媽媽去街，攪到姨媽媽逢星期六都唔得閒，喺度真係要唔該哂佢呀﹗BB，你要鍚姨媽媽多啲先至得呀﹗

佢而家見到啲人，間唔中都會喊，最開心就係見到浚瑜表姐，因為表姐成日都唱ABC歌俾佢聽，加上成日同佢玩。咁當然仲有姨媽媽啦，因為姨媽媽成日見佢同埋鍚佢呀。

BB bu 口水

BB識得扒低360度轉，同埋爬，不過唔係向前爬係向後爬。仲有BB 而家鐘意成日bu 口水，有時食食吓奶bu添呀，攪到我地周身都係。

(http://www.youtube.com/watch?v=49VP-06c55o)

BB呢張相著緊件冷衫係爹D既同事Tina姨姨織架，你地睇下幾靚，呢件已經係第三件喇，真係多謝哂佢呀。

BB 唱歌歌

BB最近成日講野，好似唱歌歌咁，你地聽下啦…

(http://www.youtube.com/watch?v=jRt1UH7jSdI)

BB 沖涼玩水水

BB而家沖涼成日玩水水，見到啲泡佢就追住啲泡玩同埋拍水水，攪到成塊面都濕哂，你地睇下個video 喇﹗

(http://www.youtube.com/watch?v=BYXGzS8dtBI)

你地喺呢張相度可以睇得好清楚BB兩隻牙仔呀，爹D媽咪今次真係冇攪錯架喇﹗

BB病咗呀

上個星期媽咪已經感冒，攪到星期日傳染咗俾BB，攪到BB流哂鼻水，又咳，同埋有啖，帶佢去睇醫生好彩冇發燒啫，但之後BB同媽咪都食咗藥大昏迷，之後好彩都好快冇事啫，對唔住呀BB，攪到你病，爹D媽咪見到佢咁細個抖氣好辛苦同埋咳，用針筒餵佢食藥，佢第一次喊度拆天，隻眼濕哂，不過就好快瞓著咗，見到佢咁陰公，爹D媽咪真係好心痛呀﹗

BB 五個月

不知不覺，BB 已經五個月喇， 我地有時俾BB挨住啲野坐，佢都坐得幾穩，咁就梗係會成日郁黎郁去啦，佢呢排呢下晝就瞓好少，唔係成日瞓，都好呀，留番夜晚先至瞓。佢而家都仲係食五安奶喳，不過佢個重量都算係咁，所以都唔怕。我地俾支奶佢，佢仲識得伸手攞添﹗

BB企響度？

我地一抱起BB，佢就好鐘意企響度，隻腳仲企得好穩，同埋笑得好鬼開心添﹗你地睇下佢個樣係咪好得戚呢？

第一次食糊仔

善如第一次食糊仔，係用奶溝粉。初頭唔係好慣，佢唔知我地做緊乜，之後媽咪同爹D教佢擘大口，佢真係好似識聽咁，嘗試下食，之後佢好快就識得食，仲搶住食添呀﹗

今次冇攪錯喇

今次爹D同媽咪真係睇得好清楚，佢真係出牙仔喇﹗﹗其實佢都算快，四五個月就出牙仔，我地買咗個牙膠俾佢咬，希望佢唔好咁牙痕啦‥

BB 識得轉身喇

BB終於識得轉身喇﹗嫲嫲話佢突然間返轉咗，放番平佢又返番轉，一返轉仲成日好開心咁笑添。

BB 去朋友仔生日會

BB第一次去朋友仔(柔柔)在麥當勞攪既一歲生日會。柔柔姐姐好靚呀，帶住個cute cute 頭飾，仲著埋件水手裝添，好鬼得意呀﹗BB都好開心，成日兩頭望，ee仲送咗好多禮物俾佢添呀，又有玩具，又有就黎啱BB食既餅仔，BB真係要多謝ee同埋柔柔呀‥

玩咀咀

BB無端端喺度玩個咀喎，佢好似”妹”緊野咁，好攪笑呀。 : )

(http://www.youtube.com/watch?v=WQEkiWkhoPY)

媽咪畢業喇

媽咪讀緊個Degree課程既時候有咗善如，所以BB都有同媽咪一齊去上堂架，不過唔係意外架，都係planned既，雖然媽咪都知道如果陀緊BB要讀書都好辛苦，但係想快啲生，所以都照去試。結果都真係幾辛苦，因為個課程係由06年4月至到07年3月，所以喺媽咪最後那科考試時，個肚係六個月，媽咪都識得好多朋友，因為陀住BB而放棄咗讀書，憑住媽咪既毅力同堅持，再加上嗲D同埋BB既支持，媽咪終於可以順利咁完成個課程，仲拿到個Degree with Distinction 添，好鬼開心。點解唔陀完先至讀?? 因為唔使生完之後要讀書，可以專心照顧BB，唔使咁多顧慮呀。 所以話呢，只要有信心一定得既，善如，第時要學媽咪呀，知道未呀？？

BB 壞習慣

每個BB都有佢既壞習慣，善如都唔例外，佢好鐘意一度"抓"頭，一度啜手手，BB唔好咁喇，唔乾淨架。 : (

(http://www.youtube.com/watch?v=SEVx3WbEpjo)

BB四個月喇

時間過得真係快，善如不知不覺已經四個月(媽咪都未修身，仲有成二十磅未減，媽咪都係時候要努力喇)，BB又要去母嬰健康院，BB17.2磅喇，雖然佢既重量喺搭住最高那條線，姑娘話因為佢高咗，所以都唔使減肥。BB今次去打白喉﹑破傷風第二針，今次BB仲勁呀，一聲都冇喊呀，之後一出房門口就伸隻手入個口度啜，嘻嘻，激死呀。可能姑娘手勢好啦，但係真係好少BB打針都唔喊呀，BB叻叻。

講下佢個進度先，佢而家成日喺張床到做一字馬，即係張兩隻腳擘大，踩住兩邊床圍﹔咬手手，一聽到嗲D嗎咪唱ABC歌就好開心，識得放啲野落口，成日嗚嗚聲，同佢玩"躲貓貓"好開心，成日抓頭，望住塊鏡成日笑，連沖涼都要望住塊鏡，仲有佢好鐘意睇電視 (媽咪好難同佢剪指甲，因為佢成日郁，又好醒瞓，竟然俾嗲D發現原來俾佢睇電視，佢就眼甘甘咁望實，可以好順利咁剪指甲)。

BB按摩班

今日同BB去上按摩班，BB喺咁望住個姑娘講野，好似識聽咁，全場有好多BB都喊，因為都要上成個半鐘，善如都冇喊過，仲好開心咁望住其他BB添。

BB 蓋住自己個面

BB呢排既玩意就係成日食手仔同埋搵張被蓋住自己塊面，有video 為証架。 真係危險呀，嫲嫲平時真係要睇實佢多啲呀。

(http://www.youtube.com/watch?v=EL_seC1Zj08)

BB第一次剪頭髮

媽咪聽人講BB第一次既頭髮要快啲剪咗佢，之後啲頭髮先至會靚，加上BB啲頭髮都唔齊，所以一次過剃咗佢再留過會好啲，所以就搵咗髮型師姨丈剪。嘩，BB剪頭髮真係大陣象，我地成家人都好緊張。嗲D負責抱住阿B唔好俾佢郁，媽咪就錄影，姨丈叫媽咪不如試下剪，媽咪真係唔敢呀，好大壓力，所以都係由專業人士剪好啲。但係BB一啲都唔驚同冇喊，佢剩係唸緊你地喺度攪乜鬼，咁嘈，同埋當姨丈剃到佢後面啲頭髮既時候，打咗兩個冷陣。你地睇下BB既新形象啦，不過仲更加似男仔，不過都好得意呀﹗

做個開心BB

呢張相係嗲D喺電話個background到整既，好似BB做緊戲俾人睇，但係又打喊路咁，好攪笑。

BB成日都好開心架，無論朝早起身嗲D媽咪返工前望住佢，定係夜晚見到佢，佢都好開心，成日笑架，攪到嗲D媽咪朝早又唔想返工，放工又想早啲返去陪佢。希望一路到佢大個，佢都係成日都開開心心，健康快樂，嗲D媽咪就好满足了。

BB似混血兒？

其實出親街BB都俾人話佢係男仔，同埋仲有少少"混血兒"添，嗲D攪笑咁問媽咪攪乜鬼，媽咪話冤枉呀~~~ 總之善如就係嗲D同媽咪既結晶品啦，哈哈。

BB 學"扒"低

呢個時間BB應該可以開始學吓"扒"低了，我地幫佢翻轉，然後睇下佢有冇力抬起個頭，BB都ok 架，個頭都唔會成日郁既，但係佢有時就搖下搖下咁，之後就瞓返低。佢一翻轉就周圍望，因為佢好奇怪點解自己會翻轉咗，仲笑添。

嗲D媽咪攪錯咗

大家記唔記得我地咪話見到BB個口有啲白色野，以為係牙仔既，呢兩個禮拜突然間又唔見咗，其實應該都唔係牙仔，嗲D媽咪應該攪錯咗 :p 不過都好呀，起碼唔使佢咁快就要牙痕啦。

BB 笑到出聲好攪笑呀

BB 突然間識得笑到出聲，嗲D引到BB笑到"格格”聲，好攪笑呀，睇到佢開始識得越來越多野，嗲D媽咪真係好開心呀… 錫哂您呀BB… ^_^

(http://www.youtube.com/watch?v=Xtc33t3BQ50)

(http://www.youtube.com/watch?v=KAiaOCM7i9g)

BB 三個月喇

報告吓BB三個月既進度先，BB識得望住人笑，發出咕咕聲，頭同埋眼會跟住啲物件郁，擺自己隻手落口吮，把雙手放在面前玩，會放鬆同埋張開手掌，流暢自然地擺動身體同埋手腳，成日用力伸直隻腳同埋踢腳，攪到張床”Bomb bomb"聲，叭低時可以抬起頭，會用前臂支撐身體（不過只係一陣，好快就攰），仲有成日想睇電視呀‥

BB 打肺炎鏈球菌針

BB今日下晝打了肺炎鏈球菌針，因為在私家醫生打，所以可以錄影，大家睇下BB打針既情形啦，佢好快就喊完冇事了。

(http://www.youtube.com/watch?v=RXBovcjmPYk)

媽咪引BB笑

今次到媽咪引BB笑喇，BB笑得好開心同埋又嗚嗚聲呀。
(http://www.youtube.com/watch?v=Ju9NUpqCdEA)

BB 出牙仔同埋出奶癣

其實BB一個月零八日，我地已經發現BB個口中間有啲白色野，我地覺得係牙仔呀，到最近BB成日好似好忟咁，成日咬手同埋卒面，都係帶佢去睇醫生，醫生證實啲白色野係牙仔，嘩，真係破紀錄呀，好多人都要六個月先至有牙仔出，就算最快既表姐都要兩個幾月，但係BB竟然一個月零八日就出牙仔，真係勁呀。

醫生話佢塊面出奶癣，俾咗啲藥膏佢搽，唔知係佢隻牙仔痕定係塊面痕，攪到佢夜晚都瞓得唔係咁好，大家睇下佢咬手卒面個樣啦…

(http://www.youtube.com/watch?v=yZ6-rEHREi4)

笑笑小電影

大家一齊睇下BB既笑笑小電影，嗲D媽咪差啲整親BB呀‥ 好彩冇事ja，BB未識坐都係唔好咁快俾佢坐喇‥ 差啲撞埋牆度呀， 嚇死呀!!
(http://www.youtube.com/watch?v=gsXh80JPf8Q)

BB 兩個月去母嬰健康院

BB 兩個月又要去母嬰健康院喇，佢今日13.4磅，姑娘話佢發展得好好，體重同埋高度都好標準，BB 繼續努力呀! 今日係去打第一次既四合一混合針，本來唸住錄video 俾嗲D睇，但係姑娘唔俾呀‥‥ 咁就唔影啦，不過BB 都係一打針就喊了兩聲，之後一出房門口就已經唔喊喇，嫲嫲都話佢勁呀‥ 不過我地唸可能因為BB細都未識驚，到時大啲就可能連姑娘房門口都唔敢入呀‥

BB 越來越多野講

BB對住媽咪特別多野講，可能佢對媽咪把聲特別有親切感啦，成日嗚嗚聲，真係攪笑呀…

(http://www.youtube.com/watch?v=lys0AErHMB4)

爸爸引BB笑

爸爸好攪笑，引BB笑，我地個個都覺得爸爸仲攪笑過BB呀? 哈哈…

(http://www.youtube.com/watch?v=FhvgHwl92c4)

BB 想講野

你地睇下BB 想講野喎，嗚嗚聲，好攪笑呀

(http://www.youtube.com/watch?v=XxRFnbJoqtY)

啜手手

BB成日都會啜手手，我唸佢第時可能好鐘意食手指呀。

(http://www.youtube.com/watch?v=WIw_jHXiU7Q)

BB 掃風

爸爸幫BB掃風呀

(http://www.youtube.com/watch?v=Fd8kKwtdRoI

為食樣

當BB肚餓既時候，個樣好為食架，你地睇下個video喇！

(http://www.youtube.com/watch?v=Lq4PpNOAFLk

BB 一個月去母嬰健康院

BB 一個月去母嬰健康院，重10.8磅，打咗支乙型肝炎針，BB好攪笑，初頭佢係瞓著咗，之後姑娘叫BB早晨，佢就郁一郁，不過都冇開眼，但係姑娘一打支針落佢大脾，佢就即刻碌大隻眼，然後好大聲咁喊，之後一出間房門口佢就繼續睡覺，又好似一啲都唔痛咁，真攪笑。

戒咗夜奶喇

BB一個月零三日已經戒咗夜奶lu，真係開心，佢而家十一點幾至十二點幾食埋每晚最後一餐，之後就到最早六點幾先至起身。善如，嗲D媽咪俾個叻叻您！

自己揸住奶樽飲奶

BB未夠一個月就識自己揸住奶樽飲奶 ，嘻嘻，咁當然有爸爸媽媽幫手啦。
(http://www.youtube.com/watch?v=CTMYqm-4rQE)

單眼和奸笑

BB食完奶幾满足呀，除咗識得奸笑，仲識得單眼望人添呀。

打 Boxing

你估BB 係咪想打Boxing 呀?

BB 扭計

BB想扭計，就會開始做呢個表情，哈哈。

俾姨媽媽抱住幾開心 ^_^

四日人仔俾姨媽媽抱住，識整O型咀，仲識捉住自己隻手添。

BB 第一次在屋企沖涼

BB 第一次沖涼係嫲嫲同埋姨媽同佢沖架，睇下佢個樣好似好緊張咁喎，其實佢都唔知幾enjoy呀。

BB 出院了

廣華醫院而家只要個媽咪和BB一切正常冇問題，就可以48小時出得院，真開心，唔使住咁耐醫院。其實出面既天氣好鬼熱，但係我地驚住BB凍親仲包到佢實一實添。

BB 5月2號下午1時14分出世喇

廣華醫院既預產期果然準呀，5月1號一早見紅，到5月2號零晨1點半開始陣痛，痛到早上九時入了產房，要到下午1時14分BB先至出世，足足痛咗十幾個鐘，不過好彩順順利利，BB係順產架，BB重7.8磅 ，女仔來講都算重喇。

BB 4D 相片

BB喺媽咪肚裏面7個月已經睇得好清楚BB個鼻同個咀喇