慶祝善如生日

三位叔叔預早同善如慶祝生日，善如收到禮物當然好開心啦，多謝哂!!

沙巴之旅 - Photos

沙巴之旅 - 行程

第一晚食既海鮮餐。

夜晚搭的士去咗First Beach食宵夜，飲咗一個又唔凍又唔好飲既椰青，不過好大個。

呢條唔係好激既激流，連媽咪唔識游水都敢玩的，不過同啲團友玩得好開心，玩到中段，我地仲跳哂落河游水添，爹D仲勁，走上條有兩三層樓高既橋到同團友you jump, I jump添。

有七隻好大隻既蜥蝪喺沙比島行黎行去，不過善如都唔係好驚。

有日下晝自費食飯，經導遊介紹去咗味雅食海南雞飯，善如就瞓到隻豬咁。

沙巴之旅 - Kids Club

我地喺間酒店個Kids Club到玩，當然最開心既就係善如啦。

佢仲幫公仔打關斗添!

沙巴之旅 - 游水

善如喺酒店到游水好鬼開心。

爹D捉佢唔實，攪到佢飲咗兩啖水，之後佢就有啲驚。

仲同姨媽媽姨丈丈打波波添!

沙巴之旅 - 搭飛機

善如未夠兩歲就第一次搭飛機，因為知道跟團唔使俾團費，慳番成五千蚊， 所以好趕咁報團，目的地係沙巴，其實今個旅程玩得咁開心，真係要多謝哂姨媽媽﹑姨丈丈同埋表哥幫手睇住善如，如果唔係，爹D媽咪就冇得玩咁多活動同埋做Spa 呀。

今次成個旅程都真係要讚吓善如先得，佢整體黎講都好乖，喺旅遊巴冇喊過，又唔會嘈到人，坐快艇又唔喊，就算睇營火蟲周圍熄哂燈，佢好驚都係喊咗三聲，我地叫佢Close your eyes，佢就由頭close 到尾，最後仲瞓埋覺添，仲有樣乖野係佢五日都係等到喺酒店先至去"砵砵"。

啲團友個個都好鐘意佢，又同佢影相，又同佢玩，仲個個都讚佢乖添，不過都係一貫佢既作風，唔肯同人玩，想笑又成日忍住唔笑。

不過要講樣驚險野先，媽咪因為帶咗善如去探吓班機場舊同事，攪到差啲搭唔到飛機，個導遊打咗兩次黎叫我地快啲，因為過關又耐咗少少，最後導遊仲叫我地跑添，真係好彩趕得切。爹D抱住善如喺咁跑，跑到喘哂氣，之後善如問爹D:[做乜野呀? 媽咪Running?] ，如果真係搭唔到班機，媽咪真係要負全責呀!!

善如第一次搭飛機好乖，一聲都冇喊過，媽咪問咗個空姐攞咗份玩具俾善如玩，臨尾仲係咁同姨丈丈同姨媽媽玩添。

番香港那程飛機，善如因為瞓咗覺，到差唔多落機既時候佢就突然間醒，佢係咁摸住隻耳仔，應該係隻耳仔痛，之後就喊咗幾聲，不過好快就冇事。

BB 也 Shopping

當爹D媽咪買完啲野之後，佢就自動請纓要幫手攞，仲無端端喺度Roll your hands，幾鬼開心呀，好似係佢啱啱Shopping 完咁呀。

Slide

善如一路都唔係好敢玩Slide，佢成日都會拍吓個心口話驚驚，今日去咗Mega Box，佢竟然夠膽玩。

Close your eyes

當我地同善如出街街既時候，見到佢好眼瞓，我地就會叫佢Close your eyes，善如就真係會好似張相咁，好大力咁瞇埋眼瞓覺，隔一陣佢就真係會瞓著咗，善如真係好抵錫。

自己食飯

善如自己用匙羹食飯飯，呢個口水肩真係幾好用架，如果善如啲飯跌咗，個兜可以接住哂，唔使整到件衫同埋地下周圍都係。