What's inside? Can you guess?

善如最近鐘意玩個新遊戲 - What's inside? Can you guess?

善如答Yes同No答得好攪笑。

扮馬騮

自從善如去完沙巴見到馬騮，加埋姨丈丈買咗隻馬騮公仔俾佢之後，善如就好鐘意馬騮喇，佢而家成日得閒就扮馬騮，好鬼攪笑。

迦南幼兒園家長會

媽咪啱啱去完迦南幼兒園家長會，善如八月會開始佢既番學生涯，祝佢可以順順利利，開開心心咁度過。

學校派咗本入學手冊，同埋接放學咭，媽咪好耐冇見過呢啲野，覺得好得意。校服就仲得意，幼兒班要著圍裙，遲啲影相俾大家睇呀。

講吓善如識得啲乜野先。
扮動物叫 Lion, Duck, Horse, Bird, Frog, Chicken, Dog, Cat, Cow, Mouse
認得身體各部份 Head, Forehead, Eye, Ear, Nose, Mouth, Eyebrow, Cheek, Chin, Tongue, Neck, Elbow, Nail, Finger, Hand, Chest, Hip, Knee, Leg, Foot, Toes

善如都仲係未完全識得叫尿尿，喺人地屋企就好啲，帶佢去Toilet佢都會去，喺街就唔肯去，唔知係咪覺得污穢，但係喺自己屋企佢就成日都賴咗先講，俾佢激死，我地想BB番學前可以戒到呀，繼續努力呀!

洪水橋

今日同表哥表姐入咗洪水橋同啲哥哥姐姐玩，佢好開心直至玩到四點幾，先至同爸爸講話我要瞓覺，之後瞓到六點半叫醒佢出街食飯，佢喊到拆天，仲唔比我地喺房，要我地出房門口，扭計扭足45分鐘先至冇事，佢喊到聲嘶力竭，善如第一次發脾氣發得咁犀利，見到佢咁樣，真係嚇死，下次都係唔好嘈醒佢喇!

馬鞍山BBQ

除咗表哥之外，善如第一次俾男仔拖手，其實都唔只拖手，佢仲俾呢個哥哥錫咗個額頭好耐，攪到善如唔識反應， 要大人分開佢地先至得，呢個哥哥真係好可愛。

今日媽咪約咗公司啲同事BBQ，善如初頭都係一貫佢既作風，唔睬人，由三點幾warm up到差唔多八點先至冇咁怕羞，之後仲玩得好開心添。

總共有成二三十人一齊燒野食，不過之後落好大雨，好彩早咗啲開始，起碼都食咗一大半，喺度要多謝Natalie姨姨，我地個個都又食又拎，佢真係好鬼客氣啫。

仆親頭

善如前兩日下晝玩玩吓積木走黎走去，之後俾啲積木”click”親，撞咗落個盒角度，攪到個額頭又紅又瘀，今次工人識得即刻打俾媽咪，番到去見到佢個額頭有一條紅哂既線，好彩好快就冇事!