希希生日會

玩遊戲未數到三聲，善如就已經偷咗步出咗黎!

善如一見到爸爸抱住其他小朋友，佢又扯住爸爸隻手。

今日善如去尖東亨亨同學個細佬既生日會，善如好開心，爸爸媽媽都覺得善如進步咗好多，大膽咗好多，雖然都係輪盡咗啲，但係起碼玩啲活動都冇近時咁驚，善如叻叻!

爸爸同事家

呢排啲星期六日特別忙，今日爸爸媽媽都各自約咗人，最後決定善如跟爸爸啦，去人地新居入伙，善如今次竟然冇怕羞，肯比人拖手(只限女士)，又夠膽同人地不停咁講野，唱歌，真叻叻!
不過爸爸失策，唔記得影相同埋錄影。

Happy Birthday 爸爸!

一早起身，善如同媽咪已經預備好蛋糕同埋生日咭送俾爸爸，等爸爸刷完牙就有生日蛋糕，爸爸好開心!

善如見到爸爸許願，善如又即刻跟佢許埋一份，真係成個餅印咁。





媽媽專登喺太子酒店買既Blue Berry Cheese Cake, Yummy!



爸爸話好想去海洋公園玩機動遊戲，因為平時善如喺度，次次都係陪佢睇水族館，海獅呀，都冇機會玩，媽媽見爸爸生日，梗係樂意奉陪啦。加上生日之星又唔使錢，同行半價，真係抵，$140兩個人。

爸爸最欣賞既遊戲就係呢個翻天覆地喇，媽媽就好驚唔敢玩，爸爸見咁好玩仲玩咗兩次添，真係傻架!

冇乜人玩機動遊戲，因為我地十點幾已經去到，所以乜野都唔使排隊，太好了，慳番好多時間呀!

玩激流俾人射到濕哂，梗係要去報仇啦，原來整古人係咁好玩架，哈哈!

玩到一點幾已經玩哂想玩既機動遊戲了，出到門口，開始見到好多內地同胞排緊隊，早啲黎真係好。見未夠鐘接善如放學，去咗旺角陪爸爸買衫，梗係要食吓媽咪至愛既生腸啦!

夜晚就去咗丼吉食吉列豬扒，吉列蝦同埋吉列生蠔，真係好好味，貴得有道理，連善如都話Yummy呀!

善如一起身就幫手磨芝麻了。

初頭考慮緊帶唔帶善如出黎，問爸爸多餘的，個答案一定係帶，雖然善如未做功課，但係都唸住快快食完，等善如快啲番屋企做功課啦。

不過，接善如放學由九龍塘搭港鐵到尖沙咀，善如在尖沙咀已經話要瞓覺，但係我地在加拿芬廣場有野要買，爸爸要抱佢抱到去海港城，爸爸真係可憐，善如已經四十幾磅，真係唔係講笑架，已經唔可以負荷咁耐，隻手真係斷咁濟，善如你真係要鍚爸爸多啲呀!

P.S. 善如原來做野都好上心架，因為昨晚媽咪同善如趁爸爸沖涼時整張生日咭俾爸爸，未整哂爸爸已經出黎，咁媽咪見差少少都唔緊要啦，都係未畫多啲圖啫。點知，凌晨四點幾，善如好大聲喺自己房叫媽媽，嚇到媽媽彈起，即刻跑出去問善如乜事，善如話，我未畫哂爸爸張生日咭呀! 之後媽媽鬆一口氣話，唔緊要啦，我地聽朝一早起身再畫啦，初頭佢都唔肯既，好彩之後都肯啫。

KV BBQ @ 錦田鄉村俱樂部

媽咪做義工負責幫手點名

根德園幼稚園係冇學校旅行既，所以啲媽咪就決定自己攪旅行，去咗錦田鄉村俱樂部BBQ，

初頭仲擔心落雨玩唔到室外遊戲添，點知熱到好似夏天咁，今次媽媽都有幫手做義工媽咪，不過都係做啲普通野，幫手點吓名呀，帶吓遊戲咁，媽咪都驚自己冇乜時間，編枱買禮物都係等啲全職媽咪做喇。

今次都真係一個好大型既活動，小朋友加埋家長有成二百幾人，嘩，真係誇張，得幾個義工媽咪幫手，都唔好話唔辛苦，連旅遊車都要幫手book埋。

不過我相信個個義工媽咪都覺得值得既，見啲小朋友玩得咁開心，梗係啦，唸咗咁多遊戲俾佢地玩，又有得食又有得抽獎，而家啲小朋友真係好幸福呀!

Kenneth's Birthday Party @ Jones House

善如今日係大突破，竟然夠膽掂狗。

睇吓佢地幾friend幾開心

Suki同埋爸爸都係呢個月生日，Irvin哥哥買咗蛋糕黎慶祝，Chocolate Mousse，媽咪至愛。今日善如同哥哥姐姐玩得好開心，連佢最鐘意既腸仔都唔係食咗好多，因為佢掛住玩。

走既時候，仲同Suki姐姐坐，全程都喺度玩，點知到落車行緊番屋企既時候，佢就一路行一路咪埋眼瞓覺。

得意事件簿

俾人搣
善如有日同爸爸講：[爸爸，我喺學校俾人搣呀?]
爸爸好緊張：[邊個搣你呀?]
善如：[陳現亮同學，佢成日都搣我架?]
爸爸：[佢搣你邊度呀?]
善如：[隻手臂。]
爸爸：[咁你有冇話俾老師聽呀?]
善如：[有呀。]
爸爸：[咁老師點呀?]
善如：[個同學而家唔係坐我隔離呀? 佢掉咗位呀?]
爸爸：[咁，點解佢要搣你呀?]
善如：[唔知呀?]
爸爸：[如果仲有下次同佢講，叫佢唔可以搣人架!]

爸爸媽媽知道當然有啲唔開心，我地喺度唸，係咪因為善如肥嘟嘟好搣啲呢?  點解善如成日俾人烚，不過算啦，佢都係要學習吓保護自己了。


善如，你好肥呀!!

今日爸爸幫善如沖涼既時候，佢話俾爸爸聽：[爸爸，今日有個同學話我好肥呀?]
爸爸：[係咩，邊個呀?]
善如：[成日搣我那個男仔呀?]
爸爸：[叫乜野名呀?]
善如：[陳現亮]
爸爸：[咁你點答佢呀?]
善如：[我冇出聲呀?]
爸爸：[下次你答佢，我爸爸話唔覺得我肥喎。]

同至愛影相

善如今日突然間講話想同佢既至愛影相，大狗狗個名叫Biscuit，細狗狗個名就叫做Biscuit Baby，係善如自己改架，呢兩隻狗仔真係抵買，呢幾年用佢地黎氹番善如好多次，扭計呀，好早要叫佢起身呀，乜野都好，善如有開心唔開心都係同biscuit講野。

善如不嬲都好鐘意公仔，但係佢究竟有幾愛Biscuit呢?  旅行要帶埋佢，去街有時眼瞓又話掛住大狗狗，成日扮大狗狗講野，食飯有時又叫狗狗睇住佢，有時連去toilet都要大狗狗睇住。

學校手工

善如喺學校做既手工呀! K2好似小咗有手工番黎喎。

學校生活

講吓善如既學習進度先。

升咗K2之後，每日要做三樣功課，中文，英文同埋數學，起初真係有啲吃力，善如成日唔係好想做，話好眼瞓，不過而家就好咗好多，可能已經慣咗。

善如已經認得好多中文字，超過一百個，都識寫四十幾個中文字，不過有少少都仲未記得點寫; 英文字就學哂A-Z，而家寫緊細楷由a 寫到j; 而數學呢就學missing number同埋what's the number between 6 and 8?  The no. after 5 is ?.

K2開始每個星期都有默書，其實都係默番教過既野，爸爸媽媽都唔係成日同佢溫，間唔中溫吓咁，等佢唔好咁大壓力啦。

上咗K2學既野好似多咗好多，聽啲媽咪講佢地上課既時間都好緊湊，會教好多野。Touch wood，佢暫時都係好鐘意番學。

善如啲字就唔係寫得好靚，但係都過得去既，啲筆畫就成日錯，不過唔緊要啦，而家先K2啫，都未急既，慢慢教。