手工 - 燒賣

學校要交手工，呢個環節媽咪真係冇能為力，直頭係弱項。今次要整中國的特色野，善如同爸爸一齊整咗籠燒賣，哈哈，果然好靚喎! 抵讚!

自製雨傘

爸爸知道善如好鐘意汽球，買咗小丑整俾小朋友那些汽球番來，自己在研究，今日佢整咗把雨傘俾善如，雖然唔係話好靚，但都足以令到善如好開心了。

Birthday Dinner for Chloe with Dad's Family

爺爺嫲嫲過來同善如食飯同慶祝生日

彈彈床

今日番完教會同善如去咗行吓將軍澳中心，之後見到有得跳彈床，咁啱又有時間，就陪佢排隊玩了，當然媽咪冇咁既氣力，唯有坐在側邊椅子等她啦。

Dinner with Cherry @TST

因為要選生日禮物俾善如，所以去咗玩具反斗城，之後約埋表姐玩，佢地兩個在玩具反斗城玩得好開心，騎馬馬。

出恆齒喇!

善如出既第一隻恆齒呀! 不過在後面生，睇咗牙醫話冇辦法，都係由得佢出，雖然佢前面隻牙鬆鬆地，但係未甩，醫生話都係唔使專登脫掉隻牙齒。到七八歲出哂啲牙先至黎睇牙醫，而家乜都做唔到。

得意妹

善如拿咗爸爸副眼鏡來帶，成個miss咁。

貼子獎勵計劃

今日開始用貼子獎勵計劃鼓勵善如食飯同埋做功課快啲，如果佢做得快，就俾一個貼紙佢，即係每日最多兩個，儲夠十個就俾佢食雪糕。其實用貼子獎勵佢唔係而家開始，已經用咗一段時間，不過就冇限定係食飯同埋做功課，只要佢有野做得好，媽咪就會獎勵佢，佢已經儲到好多個，當有人來家探訪，佢就會show 俾人睇佢既叻野。

媽咪見善如好多時都係要用軟功佢先至會做得快食得快，所以決定行呢個方法，加上每次我們食親雪糕，媽咪或者爸爸話要食少少，俾咗我地之後，佢都不期然會捉住我地隻手，想快啲攞番黎食，可能佢知道雪糕會好快溶，又或者佢真係好鐘意食雪糕，所以決定用雪糕呢招引佢，其實做功課佢都有好大既進步了，不過食飯就通常初頭食得好快，到尾聲因為可能飽就成日行來行去，所以都係要訓練吓佢快啲了，希望呢個計劃順利及成功進行啦。

黃金海岸

而家善如完全唔驚二舅父了，真係大個女喇!

今日番完教會，就同瑤瑤去咗黃金海岸沙灘玩，佢地玩得好開心，我地帶番上次在愉景灣啲復活蛋俾佢地埋番喺沙度，再俾地找番出來，超開心。之後，我地仲喺黃金海岸食埋野先至番，攪到九點幾先至番到屋企，善如同瑤瑤豬喺車到已經瞓著咗，之後番到屋企仲要善如再起身沖涼，佢梗係喊啦，仲嗲到要媽咪捉住佢隻手沖涼同埋吹頭佢先至肯，不過媽咪都好樂意，因為明知佢係扭緊眼瞓，加上呢啲嗲既時間唔知仲有幾耐，真係要好好珍惜。

公園

善如由細到大去公園玩都係玩一啲好穩陣既野，危險少少既動作都唔敢玩，經過之前爸爸同佢多次練習之後，佢終於玩得好啲喇，起碼唔使人扶住，同埋快咗。

西貢

呢隻狗仔在表演，好得意呀!

今日見冇乜野做，帶善如去西貢睇吓狗仔，去到西貢梗係去松記食車仔麵先啦，之後就開始睇狗仔之旅，佢果然好開心，係咁數見到幾多隻狗仔，仲夠擔摸狗仔添，不過，摸到其中一隻無端端擰番轉頭吠善如，嚇到善如成個彈起，仲喊添。

小龍女兩磅了!

今日去咗私家醫生做產檢，爸爸在超聲波到見到小龍女開咗個口，即刻話：[佢笑呀!] 哈哈，之後醫生話：[佢擘大個口啫，未必係笑既!] 爸爸真係想像力豐富呀，不過醫生仲讚爸爸識睇超聲波好叻添。

今日係25週，小龍女而家兩磅一了，醫生話size 正常，唔重唔輕，不過媽咪隻腳掌又敏感好痕，用咗醫生成支藥膏都冇好番，但醫生話唔好再搽了，始終都係有類固醇呀，唯有忍吓啦。 隻大脾位至pat pat 位又間唔中好痛，坐得太耐﹑企得太耐﹑行得太耐，甚至瞓得太耐都痛。

仲有三個月小龍女，爸爸媽媽同善如都好期待小龍女既來臨，為我們這個家庭增添更加多開心﹑快樂!

同爺爺嫲嫲飲茶

今日約咗爺爺嫲嫲在灣仔飲茶，嫲嫲俾起之前已經開心番好多了，希望佢地快啲可以忘記傷痛，面對未來。

之後同善如搭天星小輪去尖沙咀睇鐘樓，因為學校要啲同學寫一份報告，去介紹一個地方給遊客，咁咪即係爸爸媽媽做，咁我地近近地就選擇了在鐘樓。

善如都幾鐘意搭船，每次都覺得好好玩，爸爸今次帶佢去睇埋水手做啲乜，佢更加開心。

兩父女咁恩愛既!

善如係都要同爸爸一齊飲, 仲話要鬥快添呀!

得意事件

我地點算呀?

今日放工番黎食完飯，因為爸爸要幫大表哥搬野，所以要再出去，善如話好掛住爸爸唔俾佢走，臨走又攬又鍚，佢仲問媽咪：[媽咪呀，爸爸出咗去，我地會好掛住爸爸喎，咁我地兩個點算呀??]  哈哈，好得意呀!

襪掉落馬桶

有一日去完街番屋企，善如唸住自己乖乖，將隻污穢既襪放落污衣籃，唔知係咪佢眼瞓得濟，竟然將對襪放咗落馬桶，佢一知道就即刻攞番上黎，不過隻襪已經濕哂了。之後，佢就走去同媽咪講：[我放在對襪落toilet呀。] 媽咪：[吓! 唔係掛，咁咪污穢哂囉?] 善如笑笑口話：[下次都係唔好開咗個toilet 蓋呀，好容易放錯呀，嘻嘻!]


每次媽咪夜晚叫姐姐食生果，姐姐好多時都話唔食，好飽。有一晚媽咪又叫，姐姐都係話唔食。
善如一路做手勢一路話：[姐姐成日都話唔食架啦，成日都話飽。]
個意思叫媽咪不如你唔好問啦。

長洲一日遊

今日全家人去咗長洲一日遊，天氣非常之熱，不過啲小朋友都玩得好開心，因為又可以去沙灘玩，不過唔記得影大合照添。其實去到都係行吓食吓野，係咁食冇停過呀，最緊要都係一家人一齊啫。

Joanna 姐姐送咗兩頂手工帽俾善如，係要佢自己整既，善如好開心咁整咗兩頂，一頂俾佢自己，一頂俾瑤瑤，佢地玩得好開心呀!

愉景灣沙灘獵蛋奇兵

今日爸爸﹑姨媽媽同善如總共有在海灘掘到二十四隻蛋呀，都算好好成績了。

一年一度既愉景灣沙灘獵蛋奇兵又黎喇，我地都係第一次參加，雖然参加費用要$200，同埋要長途拔涉黎到愉景灣，但係爸爸媽咪都覺得值得既，因為原來之後都有好多禮物送同埋好多免費攤位玩架。，早一日的活動因為落雨而要改期，好彩今日天公做美，有一個陰天又唔係好熱的天氣下，真係好舒服。