Playmobil

Natalie姨姨送咗盒playmobil既玩具俾善如玩，善如好鐘意仲玩得好開心添。真係要多謝哂呀!

唱歌仔 - 超級市場

善如唱歌，大家聽唔聽到佢唱乜呢?

學校趣事

善如未夠三歲既時候，已經識得成日將自己喺學校發生既野，講番出黎俾爹D媽咪聽，或者學咗既歌同埋動作，識得做番哂出黎，真係好得意呀，有時佢講既野仲要係告狀黎添。


貼子

原來好似善如咁細個，佢地喺學校都真係會有交流架，有一日善如話俾媽咪聽，彤彤送咗個貼子俾佢，佢講咗幾日，媽咪就話見你咁乖，媽咪就俾啲貼子你送番俾彤彤，佢即刻好開心，放學番黎真係唔見咗啲貼子，但係佢又多番第二啲貼子，佢地原來真係會交換架，媽咪問佢係邊個送俾你架，佢都識答係彤彤呀。


今日張雅垣蝦我呀

有一日媽咪放工番到黎，善如就急不及待咁同媽咪講，張雅垣今日蝦我呀。

俾人推

善如有一日又告狀，爸爸，我今日俾人推呀，我好慘呀!

唱歌

雖然唔係好聽到善如唱乜，剩係睇佢做動作都已經夠喇!

好得意

善如同爹D媽咪講，今日何老師無端端指住我隻手臂話：[你呢度好得意呀?] 之後爹D話，梗係得意啦，你呢舊肉咁肥嘟嘟。

工人黎喇!

等咗咁耐，終於個工人喺上個禮拜六黎咗，今日接完善如放學，先至去接埋個工人黎。最近因為爹D媽咪成日都對住善如講話新姐姐就黎，到時你就可以同姐姐玩同埋瞓覺。所以善如一見到姐姐，要姐姐拖住，仲有當我地幫善如抺面既時候，善如仲話等姐姐幫我得架喇，再加上夜晚竟然要同姐姐一齊瞓，我地唸住佢瞓幾個字就頂唔順，點知佢真係可以瞓到朝早七點幾先至起身喎，善如真係攪笑。

不過呢樣野都係維持咗一日咁多，呢兩晚都係要跟番爹D媽咪瞓，希望遲啲等佢同姐姐熟啲，佢肯番去細床瞓啦。

因為呢個係菲傭，所以要用英文溝通，善如要聽工人講野我就唔係好擔心，因為佢聽到好多，但係講就難啲，希望善如可以學多啲啦。

父親節快樂!

今日媽咪一打開個書包，見到份父親節禮物，一俾咗善如，佢就好興奮咁將份禮物送俾爸爸，同爸爸講[爸爸我愛您]，之後仲同爸爸講話係佢自己整架添，同埋話有個心心呀，睇到爸爸個樣就知道佢開心到陣呀!

個工人要遲啲黎

今日收到agent個電話，本來個工人可以今個星期六去到我地屋企，點知因為文件既問題，所以要遲多一個星期，真係煩，攪到婆婆又要辛苦多一個禮拜。

好記性豬豬

昨晚去到公公婆婆屋企，善如突然間見到公公婆婆喺廸士尼影咗張相，張相就係類似上面呢張相咁，那張只係得個Mickey樣，連間屋都係睇得一半，連Disneyland個字都睇唔到，善如見到張相就同媽咪講：[媽咪，那張相有Mickey架。] 咁媽咪都係唸住佢見到個Mickey樣，所以咁樣講啫，之後媽咪就答佢話係呀，係Mickey黎架。之後善如再講，我入到去呢，爸爸攬實我呀，我見到Donald啦同埋巴斯光年，其實我唔使驚架。媽咪聽到好開心，原來佢係記得半年前去個廸士尼呀，佢只係見到張相都認得，真係好叻呀!

仲有一次睇得出善如好好記性同埋觀察能力都幾強，前幾個月婆婆生日去酒樓食飯，舅公買咗隻金老虎俾婆婆，之後有一日爸爸媽媽帶善如去旺角行街，經過間金舖，佢無端端指住間金舖話，婆婆都有呢個呀，之後媽媽順便問佢，係邊個買俾婆婆架，佢都識得答係舅公，佢真係叻呀。

根德園買校服﹑迦南家長會

今日好忙碌，一早要去根德園買校服，白色裇衫加灰色背心裙，灰色外套加棗紅色校褸，嘻嘻，真係好老土呀，不過當然最緊要係間學校好啦! 之後俾善如喺學校個滑梯到玩咗一陣。

之後就趕住去迦南度見老師，因為今日係家長會，老師話善如基本上學習﹑社交都冇乜問題，係情緒有時較為難控制，當佢唔鐘意做那樣野既時候，佢就會唔出聲，甚至會喊，就算老師問佢做乜野佢都唔係好想答，個樣好似好委屈咁。 老師發覺幾時會出現呢啲情緒問題，通常都係見到佢唔夠瞓﹑或者係放完個長假番黎既時候﹑又或者去完旅行番黎既時候，佢都會咁樣既 。

但係當佢開心既時候，佢就可以乜都得，拖住人玩甚至照顧人都可以。但當佢覺得那樣野啱，但係啲同學唔知點解唔跟住佢既指示黎做既時候，佢就會唔開心。

老師仲話有時想搵同學出黎做示範，佢一定唔肯做第一個，次次都係佢見到人地做咗，佢先至肯做，佢係一個觀察型兼且係穩陣派既人。

傾咗半個鐘之後，即刻去食飯，因為趕住要再番學校學英文。

善如發燒

前兩日善如已經有啲咳同埋流鼻水，應該係俾爸爸傳染，今晚爸爸喺婆婆屋企接善如番屋企既時候，發覺善如發燒，即刻俾退燒藥佢食。不過佢食藥冇之前咁乖，真係唔好讚佢咁多，佢而家唔肯食藥，爸爸今日攪咗成半個鐘先至迫到佢食，呢幾次有時仲要夾硬黎迫佢食添。

冇工人既日子

呢個月屋企冇工人，加上爸爸公司好多野做，成九點幾十點先至番到屋企，用慣咗工人，突然間冇咗，真係好鬼唔慣呀，好鬼多家務做，真係煩到死呀。媽咪放工就去婆婆屋企湊番善如，好彩呢幾次都攪得掂善如唔使媽咪抱，如果唔係都唔知點抱佢咁耐呀，呢段時間真係唔該婆婆幫手湊善如。

呢兩日番學仲要架校車等添呀，因為善如到臨出問口先至話要去poo poo，唔俾佢去又唔得，攪到要成架車既人等，雖然係幾分鐘啫，都係唔係咁好意思呀。

如無意外，個工人姐姐應該下個星期尾會到，今次請既係菲律賓人，希望佢可以同善如講多啲英文，希望今次個工人好啲啦。

種植物

上次Jones哥哥同埋Nelson哥哥送咗呢棵蛋蛋植物俾善如，佢地話俾佢聽每日淋啲水佢就會生頭髮，而家善如日日都淋，你地睇吓呢隻蛋蛋而家有幾多頭髮。