學校生日會

善如學校今日攪咗生日會，今次既主角係五月至六月既小朋友，之前爸爸同善如預備好每人一份小禮物俾小朋友，因為有成二十五個小朋友，所以驚善如帶番學校好重，所以媽咪今日專登送善如番學。

番到學校大約八點半已經好多小朋友到咗，佢地個個都好開心喺度傾計，而善如一番到學校就好大聲咁叫早晨Ms. Mi，老師真係老師，小朋友果然好尊敬佢地。

因為早排Ms. Mi打黎叫媽媽喺屋企俾多啲字佢寫，因為佢有啲字都寫錯咗，所以媽咪呢個星期開始買咗幾本簿俾佢練習，老師今日就捉住媽咪話佢進步咗好多，雖然都仲係做野慢吞吞，不過已經好咗好多。

用杯飲奶

媽咪兩個星期前叫善如自己扔哂啲奶樽果然work，而家佢都肯用杯飲，不過暫時就加支飲管俾佢，因為佢唔用飲管飲得好慢。

條褲鬆咗條橡根??

善如今日當落校車既時候，見到工人姐姐一邊落樓梯一邊甩褲，真係俾佢笑死，點解會甩褲架，原來條褲鬆咗條橡根。善如話因為佢去toilet既時候好大力扯條褲，所以鬆咗條橡根喎，真係俾佢笑死。

得意對話

爸爸：[善如，爸爸講故事好聽啲定係媽媽呀?]
善如：好肯定咁答：[媽媽。]
爸爸：[點解呀?]
善如：[因為你講得清楚囉。]
媽媽即刻偷笑，哈哈。

鍚番媽咪

尋日成日都冇見過善如咁濟，善如真係好掛住爹d媽咪，一起身就喊，係咁要鍚媽咪話掛住媽咪，但係佢話唔鍚爹d，哈哈，今次終於都輪到善如鍚媽咪多啲了，爸爸有啲呷醋，不過唔好成日都係只係鍚哂爹d架。算佢啦，前幾日又話唔鍚媽咪，可能善如覺得自己唔啱，所以逗番媽咪開心呀。

善如用杯飲奶

前排已經想訓練善如用杯飲奶，不過佢只係有時肯有時唔肯，媽咪出吓法寶，叫佢自己掉哂啲奶樽，等佢知道冇哂啲奶樽，真係冇得用奶樽飲，希望Work啦。

香港公園

今日俾咗爺爺嫲嫲揍善如，佢地帶咗善如去香港公園玩同埋圖書館，今日熱到死，好彩冇俾蚊蚊咬啫。
工人姐姐話善如好掛住爹D媽咪，所以成十一點幾先至瞓，真陰公，爹D媽咪一番到屋企第一時間就入房鍚善如。

澳門一日遊

食馳名水蟹粥

食大利豬扒包

今日爸爸媽媽放低善如俾爺爺嫲嫲同埋工人湊，自己同公公婆婆佢地去咗澳門睇水舞間，放低善如一日，最唔捨得那個梗係爸爸啦，不過媽咪喺澳門既時候都好掛住善如。

母親節快樂!

善如喺學校整咗張母親節咭俾媽咪，仲識得講：[Happy Mother's Day!] 之後仲鍚我一啖添，冧哂。

今日母親節一早去咗同公公婆婆飲茶，媽咪就陪公公婆婆打番幾圈，爸爸就同善如去咗游水，瞓完覺之後就去咗長發食晚飯。

預祝母親節快樂!

今日媽咪要番工，善如同爸爸接埋媽咪去銅鑼灣搵爺爺嫲嫲食飯，預祝母親節。

唔開心對話

媽咪：[善如，你鍚唔鍚媽咪呀?]
善如：[唔錫。]
媽咪：[吓，點解呀?]
善如：唔出聲
媽咪：[但係媽咪好鍚善如，媽咪又好鍚爹D喎。]
善如：擰頭
媽咪：[爸爸好鍚善如，同埋都好鍚媽咪喎，咁你鍚唔鍚媽咪呀?]
善如：[我好眼瞓呀。]
媽咪：即刻好唔開心，仲係唔罷休咁問：[咁你鍚唔鍚媽咪先?]
善如：終於屈服咁答：[鍚。]

呢幾日媽咪放工番到黎屋企都冇乜理善如，因為好煩，所以善如就唔係咁開心。但係可能善如唸緊，仲唔答鍚都唔知幾時先至有得瞓呀。 : P
媽咪要理多啲善如先得喇。

終於攞支票喇!

請咗咁多餐飯，其實都未去攞錢架，今晚終於去咗NOW電視台度攞錢同埋拍片，真係開心，本來Jones同Nelson哥哥都會黎，不過收唔到工，都係黎唔到，不過唔緊要啦，下次都可能有機會再上去(嬴)既時候，就再約埋佢啦。

呢張就係真既十萬元支票!



好開心，番到屋企攞住張假既支票都影一餐。




陸永仲要求監製，送呢個道具俾善如，佢地現場既時候，就會用呢個道具黎選答案。

撳錢大餐@鯉魚門

今日善如生日，順便慶祝埋嬴咗撳錢，所以去咗好耐未去過既鯉魚門食好味海鮮，真係開心，希望再有機會繼續請大家食野啦。

Happy Birthday to Chloe!

Yeah! 準備去溜冰呀。

善如可以扶住隻企鵝溜冰，隻企鵝好可愛呀!

同瑤瑤一齊玩，真開心!

今日同善如慶祝生日，首先去咗Elements溜冰，之後就食泰國野，夜晚去咗鯉魚門食海鮮。



送俾寶貝豬女既蛋糕