笑笑小電影

我地唸住今晚係除夕帶善如出街，但係最後攪到好夜，所以都冇出度，剩係落咗留下行吓。善如今晚個Look，個個見到佢都話佢好得意好似日本妹。

上面個video就係佢喺商場自己扭扭吓pat pat跌親，佢扭得好得意架，不過個video 好短，其實見到佢扭已經即刻攞部相機出黎，但係都係錄得好短，雖然佢跌親好可憐，但係又好得意，嘻嘻!

廚房

爸爸個舊同事Tina 姨姨之前飲茶已經送咗個Hello Kitty 公仔俾善如，今次仲客氣添，送咗成個廚房俾善如做聖誕禮物，善如好開心，當爹D砌好個廚房之後，佢仲"嘩嘩嘩"添呀。多謝哂Tina姨姨先。

食檸檬同埋士多啤梨

爹D整蠱善如俾佢食檸檬，攪到佢變哂樣。

善如之前唔鐘意食士多啤梨，而家無端端好鐘意食，明明食緊一粒，仲一次過塞埋第二粒落口唔肯慢慢食添。

聖誕Party

12月27日晚約咗媽咪啲friend同埋啲小朋友喺屋企樓下開聖誕BBQ party，善如那晚食完飯落黎玩，佢狀態非常之好，個個問佢乜佢都答，仲係咁食粟米添。之後仲俾Ron 姨姨抱走，佢仲不時擰番轉頭同爹D媽咪拜拜，善如收到好多禮物。不過帶咗相機落黎都完全唔記得影相。

上面張相得唔得意呀?? 爹D媽咪覺得善如好似大個女好多咁呀。

清水灣郊野公園

講番上個星期聖誕節，冇乜特別野做，我地就去咗清水灣郊野公園度睇人放風爭同埋睇到有好多人喺度放狗，善如眼都唔眨望住啲狗係咁跑，佢又即刻要落地跑。後來我地買咗吹波波俾善如吹，佢初頭唔識吹，之後都學識喇。

講起那日就辛苦哂爹D喇，因為我地喺屋企樓下就有車入到清水灣郊野公園附近，落車之後係要行一段山路先至入到去公園，我地以為唔係好遠，不過抱埋呢個重三十磅既善如妹妹黎講，都真係幾"金"架。因為善如又唔肯自己行，而媽咪已經間唔中幫吓手，但係都唔抱得幾耐，所以辛苦哂爹D喇! 到走既時候就梗係搭的士啦，之後去咗西貢最出名而媽咪又最鐘意食既車仔麵同埋豬腸，好好味呀!!

聖誕老人 Part 2

之前Denise 姐姐整咗個video好攪笑，我地專登錄咗善如睇既時候既反應，佢好開心，係咁笑，最後仲要話: [冇咯。] 之後仲指住個電腦話:[爸爸喺呢度。]

Denise 姐姐，你睇吓你氹到善如幾開心!! 多謝哂呀!!

聖誕老人??

好多謝Denise 姐姐幫我地一家三口整咗呢個video，真係好攪笑，爹D媽咪笑到喊咁制，真係多謝哂!!

http://elfyourself.jibjab.com/view/jB4gKtkdmX0LSrkD

P.S. 大家要快啲睇喇! 因為個video到09年1月15號就冇得睇!

為免冇咗個video，我地用上機影咗個晝面。

第一次講既大話

善如其實同媽咪一樣都係咁怕"唧"，所以爹D成日"唧"我地。

如果爹D問善如: [爹D個格甩底係邊度呀??] 善如就會指住爹D個格甩底。

但係如果爹D問善如:[善如個格甩底係邊度呀??]

善如就會答:[冇呀?]。

因為如果善如話有的話爹D就會"唧"佢，所以佢會答冇。善如就係咁樣講咗佢既第一次大話lu.... 哈哈!!

A - Z (Part 2)

今次可以錄到喇! 善如由A-Z都識哂，不過Y同埋V就會撈亂，但係爹D媽咪已經覺得佢好叻架。

認字咭

爸爸生日Party!!

慶祝爸爸生日有一個Party仲未攪，終於今晚都慶祝埋了。下晝喺屋企打麻雀，之後就去咗Pizza Hut食晚餐，最後仲去埋爹D媽咪介紹既甜品屋-聰嫂，佢既龍眼椰果冰，真係個個都話正呀 :p。

Jones 哥哥帶咗部新既相機上黎，呢部相機好得意，其中一個function係只要你一開口笑，佢就會自動影，唔使襟制，攪到我地個個爭住鬥快笑，同埋影咗好多張相，呢個function 媽咪好鐘意，因為可以笑多啲，希望每個人都可以成日快快樂樂!!

Hello Kitty 背囊仔

Joanna 姐姐買咗份聖誕禮物俾善如，係個Hello Kitty 背囊仔，善如一見到個袋就"嘩"一聲，佢勁鐘意呀，多謝哂姐姐。

媽媽... 媽媽

善如最近突然間好痴媽咪，成日都要媽咪抱抱，要媽咪錫，喺toilet門口叫爸爸，唔係得爹D有呢個專利 lu!! 哈哈......

除鞋

善如落完街番屋企，我地一叫佢除鞋，佢識得自己除，仲識得擺番原位，今次真係要俾個叻叻佢呀。

Pekkle 靚相

Denise 姐姐幫咗善如整咗啲用Pekkle background整既靚相，幾鬼靚，唔該哂姐姐!!

結婚五週年紀念

今日係爹D媽咪既結婚五週年紀念日，加埋拍拖七年，已經十二年喇!! 時間過得真係快，呢十二年裏面爹D媽咪經歷咗好多開心同唔開心既野，不過我唸最開心既，都係生咗我地呢個可愛結晶品善如出黎，令到我地未來既日子更開心，更快樂，多謝哂我地既至愛--善如。

今日媽咪攪完旅行之後，三個就一齊去咗尖沙咀食日本野，之後就去咗 Haagen-Dazs 食雪糕火鍋。嘩，坐低先知道原來有咁多雪糕，其實媽咪爹D食完日本野已經好飽，之後仲要食咁多，好彩爹D墊底 ，食哂佢ja，如果唔係就浪費喇!!

一閃一閃小星星

善如而家好鐘意聽歌，尤其是係媽咪唱既，哈哈!! 佢識得跟住首歌做動作，善如真係好cutie 呀。鍚哂您呀!!

秋季大旅行

媽咪今年要幫公司攪秋季大旅行，咁爹D同善如梗係要支持啦。雖然媽咪一早就叫醒善如，攪到佢喊哂唔想起身，但係佢今次都好乖，肯同啲姐姐玩，冇咁驚人，仲肯俾Denise 姐姐拖，又俾Cherry姐姐抱。 乖豬!!

Denise 姐姐仲幫我地影咗幾張即影即有既相添，真係靚呀! 多謝哂!!

Apple 姐姐生日快樂

今日唔係幫小朋友攪生日會，其實係幫Apple 大姐姐攪生日會，不過其實最高興都係啲小朋友啦，真係唔該哂Connie 姨姨整咗咁多野食俾我地食。

母嬰健康院歲半評估

講番兩星期前去母嬰健康院，善如重29.3磅，磅完重去見姑娘，姑娘話佢條褲同埋條片片係咪好重呀，不如除條褲再磅過啦，之後過答案都係差唔多，姑娘話咁要去度埋高先，因為如果佢夠高都OK既 (其實爹D媽咪已經聽過呢句野好多次了)，之後去度高(88cm)，今次計埋高度都係重咗少少，所以姑娘話要見醫生，醫生話其實到歲半已經可以減少食下晝四點餐奶，加上佢有少少超重，所以唔好食lu，咁我地都要聽醫生話啦，呢兩個禮拜都冇俾佢食lu。

講番今次去做歲半評估，佢一入到姑娘到就係咁講”筆筆”，姑娘話好叻喎，知道姐姐揸住支筆筆喎。

１． 肯叫姑娘做姐姐
２． 攞啲積木俾佢疊，佢就疊咗兩粒之後就唔肯疊
３． 比個公仔佢，叫佢用匙羹餵個公仔食，佢做到，之後叫佢餵埋爸爸媽媽，佢都做到，姐姐冇叫佢，佢仲餵埋姐姐添。
４． 問佢眼耳口鼻喺邊，佢剩係肯望住我地那個部位，但係唔肯指出黎。

最後就係去打針，今次係打手臂，望到姑娘支針喊定先，之後爸爸幫手捉住佢隻手，佢已經喊到拆天，不過打完針之後佢一出打針間房門口已經冇喊lu。

善如一切正常，所以四歲先至再番黎檢查。

工人姐姐好辛苦咁幫佢紮咗條辮仔，之後好快就已經俾佢除咗。

Photo

呢幾張相整咗好耐，不過唔記得upload俾大家睇吓添。

今日開心哂lu!!

今日好開心呀，爸爸既問題終於解決咗喇，呢兩個星期爸爸都真係好唔開心，媽咪就好擔心，但係今日終於可以放下心頭大石，繼續行我地要行既路lu，喺呢度都順便要多謝曾經幫過我地既親戚朋友。

P.S. 呢張相係善如第一張識得望住鏡頭擺post既相，爹D媽咪覺得佢好cute呀!!

A-Z

由A-Z，善如識讀好多個字，今日心情好好，肯一次講好多字俾我地聽，所以錄到俾大家睇。善如繼續努力呀!! 叻叻豬，爹D媽咪錫哂您呀。

爸爸生日快樂!!

爸爸今日生日，但係因為心情唔係咁好，都冇乜特別地方想去，去咗赤柱同善如行吓，影吓相。之後姨媽媽姨丈丈邀請咗我地去佢屋企食晚飯，姨媽媽整咗好多野食，有媽咪最鐘意食既雞翼，沙律，扒，牛仔骨，蛋糕等，食到我地好飽。喺度多謝哂姨媽媽姨丈丈先，我地當然知道點解你地會叫我地一齊食飯，都係想我地開心啲啫，多謝哂，希望問題可以快啲解決啦。而善如都好乖，肯講好多野。

做動作 (2)

其實善如仲識得多啲野，不過媽咪一次過問唔哂佢，下次都係要抄低佢先得呀。 :p

做動作 (1)

好耐都錄唔倒善如一次過做動作，今次終於成功，大家可以睇吓佢幾叻。

Roll the ball

善如最近鐘意roll, throw, give and kick the ball。

同Mickey Mouse Shake Hand

Playgroup

初頭睇呢個video，係咪以為善如俾阿Sir打跟斗呢?? 大家而家應該知道，那個唔係善如黎，係佢喺playgroup既朋友仔黎架。不過阿Sir話要同佢地玩吓轉吓，等佢地個腦發展得好啲喎。

不過其實喺第一堂既時候，阿Sir都係咁樣幫善如打，之後善如就驚咗阿Sir，每堂一到呢個時刻，佢就會好驚咁坐喺到，如果佢見到阿Sir一想捉佢出去，佢就喊定先，死到痴實爹D媽咪。

阿Sir都有讚善如好聰明，不過就喺一啲唔熟悉既環境同埋人既時候就太怕醜，阿Sir話要帶多啲佢見人。同埋佢係一個觀察型，阿Sir教啲乜，佢會望得好清楚阿Sir做乜，同埋周圍人既反應，佢先至會去做。

善如俾蚊蚊咬

善如俾蚊咬咗隻"五筒"喺個額頭到，連新陳代謝咁快既BB都要好多日都仲未好番，啲蚊真係衰。

將中麻雀皇大賽

每年屋苑會所都會攪麻雀皇大賽，我地成家每年都有參加，唸住咁黑，都冇乜運行，不過一早都報咗名，就至在參與啦，點知竟然俾姨媽媽同埋爸爸，攞咗第一名同埋第四名喎，真係攪笑，咁都好開心既，當係安慰獎啦。

爸爸好唔開心 ：(

今日發生咗一啲事，令到爸爸媽媽都好唔開心，不過我地相信呢件事好快會解決既，希望爸爸唔好唔開心，就算將來點都好，善如同媽咪會繼續支持您架。

呢張相雖然影得好黑，但係爸爸好鐘意，因為善如個樣好鬼冧，希望爸爸望到呢張相，乜野唔開心都唔記得啦!

同姨媽媽傾電話

姨媽媽得閒就會打電話黎同善如傾電話，又係要睇佢心情，佢先至肯講野，今次算做講得多野架喇!!

Hello Kitty 和服 Look

媽咪突然間唸起之前Alice 姨姨喺日本買咗套Hello Kitty 和服俾善如，初頭因為善如未啱著，所以放埋咗一邊，而家終於啱喇，仲好似細咗少少添，不過唔驚啦，都仲著得落既。

爸爸......爸爸

善如有幾痴身?? 大家睇吓呢兩個video你就知喇。佢係特別痴爸爸，爸爸沖緊涼，佢喺門口係咁叫爸爸...... 爸爸，攪到爸爸未著衫都想出黎呀，真係黏身鬼。

"嗒嗒聲"

善如咁細個就識得"嗒"，媽媽既四兄弟姊妹都好叻"嗒"架，當然唔係講緊細細聲啦，我地可以在地下"嗒"，樓上二十幾樓都聽到架。唔知善如第時得唔得呢??

P.S. 爸爸就唔得喇，嘻嘻。 :p

善如歲半喇!

時間過得真係快，轉眼間，善如已經歲半喇！ 祝善如快高長大，永遠都開心快樂！

今日有大收穫

善如今日有好大收獲，有姨丈專登叫人去Disney買既遙控Mickey Mouse，善如一見到就梗係好開心搶住玩啦，番到屋企仲係咁要襟制同埋要同Mickey Shake Hand添。 仲有係Albert 叔叔送既發聲洋娃娃玩具，呢個洋娃娃都好得意，肚餓會識得喊，你餵奶俾佢佢就會啜，之後俾奶咀佢佢會一路啜同埋咪埋眼瞓覺，仲有鼻"寒"聲添，瞓瞓吓佢又會喊，你拍吓佢心口佢就會唔喊，仲會笑添。 呢個玩具係可以俾善如試吓照顧吓人，不過善如一見到洋娃娃個枕頭就攞開咗洋娃娃，佢自己即刻瞓落去。

今晚同姨丈，姨媽媽同埋公公食晚飯，善如唔肯俾佢地任何一個抱，之後到走既時候，媽咪問善如:〔點解你今日唔俾姨丈佢地抱呀？？〕之後善如竟然答媽咪: [曵曵呀!] 真係俾佢激死呀。

凍......

善如摸啲凍野既時候個樣好攪笑，又覺得好凍但係又要摸，之後仲要"嘩"一聲添。

動植物公園

今日帶咗善如去動植物公園，雖然都知道唔係好多野睇，不過唔想成日帶佢行商場，所以就帶佢睇吓動物同埋植物咁啦，善如對住每樣動物都好有興趣睇，不過突然間有兩隻馬騮係咁叫，佢地好似合唱緊咁，即刻圍住好多人睇，佢就開始有啲驚啦，咁事實嗰兩隻馬騮又真係恐怖咗啲既。

嗰日其實都幾熱，見到有雪糕買，梗係食番杯雪糕先啦，BB一見到即刻搶住食，爹Ｄ媽咪忍唔住俾咗啲佢食，今次係佢第一次食，佢食到成個口都係，好攪笑。之後在銅鑼灣行咗一陣，就帶善如搭船過尖沙咀食野(善如第一次搭jah)。

表妹瑤瑤生日

今日幫瑤瑤表妹慶祝佢一歲生日，我地唱Happy Birthday既時候，佢好開心咁拍手。

善如嗰日乖咗好多，冇咁驚人，佢全日係咁側膊眨眼電姨媽媽，連佢平時最驚既二舅父，佢都肯俾佢抱一陣先至喊，善如叻叻呀！

BB 大個女

我地覺得善如好似大個女咗，佢而家識得叫"砵砵"，當然唔係每次都得，不過十次有九次都得。初頭我地試俾佢用痰罐，點知佢坐坐吓，"Boom" 一聲，舊"砵砵"跌咗落個痰罐到，都未抺pat pat 就驚到走咗入去睡房，嗰次之後佢就唔係好鐘意在痰罐去，反而鐘意坐在大人個塔度去。

至於殊殊呢就未識得叫，但係如果帶佢入toilet，殊吓佢，佢都去到既。BB叻叻，快啲介片，你就可以同片片講bye bye lu.

清水灣海灘

爹D媽咪成個夏天都冇帶善如去海灘，一係就打風落雨，一係BB就病，今日一早起身見到天氣咁好，就決定帶善如去海灘。原來將軍澳去清水灣海灘差唔多三個字就到，仲要屋企留吓就有車搭，所以好方便。

今日雖然都幾曬，攪到BB成日都皺眉頭，但係佢好開心，見到啲水都唔驚，同埋攞住個筒將啲水倒黎倒去，成手都係沙都唔驚。

P.S. 如果想清清楚楚睇吓善如妹妹既豬脾，就留意吓最後個video既尾段啦， 唔係成日都有得睇架!