游水水

今日朝早同善如游水，好耐冇游喇，游水之前仲坐喺隻龜龜到，同Monkey傾計添，佢無端端叫隻Monkey Look out the window，好攪笑，之後落會所泳池游水，善如好開心，雖然飲咗一啖水，不過喊咗兩聲就冇事喇。　

之後同善如去飲茶，無端端扮Cutie，你地睇吓個Video，好得意架！

今日善如好醒目，第一樣係我地今日搭港鐵出油麻地，善如瞓咗覺，落車出咗月台既時候，善如無端端成個彈起，隻眼紅哂（因為佢瞓緊覺）咁指番入車廂入面，媽咪即刻入番車廂睇，原來善如隻鞋跌咗喺車廂到，好彩趕得切未關門，如果唔係就冇lu。其實善如由出世以黎，有六七次試過跌咗隻鞋，佢每次都會話番俾我地聽，由佢細細過未識講野既時候開始，佢會指住隻鞋＂鳴鳴聲＂到而家識講"BB甩鞋呀＂，善如真係好叻呀！不過今次我地特別驚訝係因為佢瞓著咗覺，都即刻起身講，所以覺得佢特別叻。善如，爹Ｄ媽咪俾個叻叻您呀。

第二樣係我地今日去太子行街順便上去華松仙館拜太婆，我地只係帶過佢去一次，那裏有好多幅相，佢竟然認得邊個係太婆，指俾我地睇，之後仲問我地唱ＡＢＣ歌俾太婆聽好唔好？因為我地上次去既時候唱過一次，佢咁都記得，你咁乖，太婆實保佑妳快高長大！

食西瓜

善如好鐘意食西瓜，一食就停唔到口，佢一次過可以食好多塊。

善如有自己張新床喇

講番善如要同姐姐喺一間房瞓，由頭幾日佢會扭計咁話: [爸爸，一齊瞓覺呀!] 到而家臨瞓會話:[Good night爹D ; Good night 媽咪。] 然後自己走入房搵汪汪瞓，善如真係好聽話，好抵錫。

因為張網床已經唔夠善如瞓，加上其實瞓網床都唔係咁舒服，所以訂咗張床俾善如，終於今日送貨喇，善如見到好開心，仲成日要自己上落床，覺得好好玩，加上有Mickey Mouse 公仔，佢就更加開心啦!

表妹瑤瑤

啱啱知道瑤瑤表妹因為熱水而淥親手，隻手起泡又腫咗，而家日日都要去母嬰健康院洗傷口，佢喊到成層樓都聽到，真係心痛，希望佢快啲好番，可以快啲同善如一齊玩啦。

得意事件簿

1. BB 未洗頭呀?

我地成日會去姨丈丈舖頭等佢收工，之後一齊食飯，善如呢幾個星期開始好Enjoy洗頭，所以去親舖頭都必定幫善如洗頭。 有晚善如好攪笑，因為姨丈丈好多野做，加上未有位俾善如洗頭，我地就坐喺到等，善如一路都冇出過聲，到7:30pm收舖，通常會拉閘先，之後等啲客走咗啲先，有位先至幫善如洗頭，點知善如一見到有人拉閘，佢就望住姨丈丈好大聲咁話:[BB未洗頭呀?] 佢既意思係佢都未洗頭你地做乜鬼拉閘呀?? 好攪笑，之後全場都大笑，仲讚BB好叻，識得咁樣講。 BB你真係好得意又攪笑呀。

2. 媽咪，你唔記得咗呀?

媽咪幫善如沖完涼，會抱佢入房著衫，有一日媽咪唔記得咗攞埋BB條褲入房，BB同媽咪講:[要攞褲褲喎，你唔記得咗呀? 媽咪攪笑呀。]

吹牧童笛

善如最開心既就係同表哥表姐玩，可能因為佢地都係小朋友，今日善如攞咗表姐支牧童笛黎吹，之後佢竟然無端端同支笛打關斗添。

善如吹波波

我地買咗把新既吹波波槍俾善如玩，呢把槍好揸好多，BB隻手咁細都啱，佢真係好鐘意吹波波，有日我問善如我地去公園玩好唔好呀?? 佢話:[好呀，我地吹波波好唔好呀?]