造型照

我地帶咗善如去咗影造型照，佢初頭去到就好開心，之後到影相既時候，因為影相啲哥哥姐姐會引佢笑，反而佢覺得仲驚，喊到拆天唔肯影，之後又氹吓佢，佢又肯影幾張，不過後來又喊，攪到要中途休息，順便俾埋支奶佢飲。最後係用隻熊仔攪掂咗佢，笑耐咗，咁我地就拿拿淋影埋佢，所以影出黎啲相都唔係好多笑，所以都係要咗package既相jar。其實BB影咗成兩個幾鐘頭，佢都好攰，大人影婚紗相都好攰啦，仲要係咁細個，又要換衫，又要笑，所以我覺得BB已經好叻叻。

出浴照

大家都好耐冇睇過BB既出浴照喇!

BB 既第一句說話

大家估吓BB講既第一句說話係咩?? 唔係爸爸，唔係媽媽，唔係mum mum，而係"冇咯"。其實喺25號晚，因為佢唔肯食粥，掛住望住個電視，所以我地就熄咗個電視，之後佢無端端望住我地話"冇咯"，仲要做埋手勢添，佢真係好攪笑，咁我地以為佢可能唔小心講出黎啫，之後我地咪再試吓同佢講"冇咯"，佢又真係識講喎，所以BB識講既第一句話就係"冇咯"喇。 不過到夜啲，成十一點幾，佢竟然講咗第二句說話，就係"爸爸爸爸"喇，最開心嗰個梗係爹D啦，之後BB因為聽到自己發音同我地一樣，佢仲成日講添。不過其實媽咪都好開心架，因為BB開始學講野，又識多啲野呀.

Snoopy Town

今日帶咗BB去Snoopy Town，不過佢眼瞓到暈咁濟，所以木無表情，見到Snoopy，Woodstock都冇乜反應，你地睇吓佢個樣幾眼瞓呀。

每日最開心的時刻

每晚八點幾至十點幾就係BB最開心既時間，點解?? 嘻嘻，因為有爹D媽咪陪佢玩囉，佢真係好開心架，你睇吓佢個樣，佢攞住條褲同埋毛巾係咁fing，high 到連自己見衫都想除埋呀。

鰂魚涌公園

我地帶咗善如同灼垣哥哥喺鰂魚涌公園行吓，等佢吸吓清新啲既空氣。其實BB好眼瞓架，不過見到咁多綠色野望，佢就眼甘甘望到實。

BB Playgroup

善如而家上緊個Playgroup, 因為爹D要溫書，媽咪一個人帶BB加埋架BB車驚攪唔掂，所以唔該哂姨媽媽幫手同媽咪帶咗BB去幾次。 BB喺Playgroup既表現點呀? 都OK啦。佢好留心聽導師講野架，仲成日拍手同埋拜拜添。因為呢個課程係訓練佢既大小肌肉，所以成日要佢瞓喺地墊上面，佢就好唔鐘意，喊到七彩呀，不過好多小朋友都係咁。 有一個叫彤彤既BB女女好叻，佢已經識行喇。

同表姐表哥去會所玩

今日善如去咗表姐表哥個會所同佢地一齊玩，玩到幾開心呀，姨媽媽同埋舅母都一齊添，有好多玩具同埋波波池，佢玩到癲哂仲成日伸條脷仔出黎。不過就冇爹D份，因為爹D要溫書，爹D努力啲啦，善如同埋媽咪會支持您架，好快就讀完架喇，之後咪可以盡情咁同我地玩囉。

BB十個月喇

話咁快BB十個月喇，佢有八隻牙仔，仲有兩隻出緊黎喇，佢而家識得做bye bye, hello, clap your hands, put your hands up, 搖船船, 請請，俾個叻叻佢，佢識得攞，仲識得用口鍚鍚媽咪，不過佢鐘意錫媽咪多過鍚爹D架，唔通佢覺得唔應該亂鍚男仔，叻叻，仲有佢識得扶住網床側邊行，不過爬爬都係好似爬得唔係好順暢咁。