自彈自唱 (小小的宇宙)

大家欣賞吓善如自彈自唱小小的宇宙。

連線書

今日買咗本連線書俾善如畫，佢畫得好開心。

探BB

今日爸爸媽媽帶咗善如去探Joei姨姨啱啱出咗世兩個禮拜既傲舜，因為我地未上到去已經同定善如講我地唔可以咁大聲講野，因為有細BB喺度，佢都好聽話，當媽咪同Joei傾傾吓突然間大聲咗少少既時候，佢行埋黎同我地講叫我地唔好咁大聲，真攪笑。

不過影相既時候，媽咪抱住傲舜，叫佢過黎同我地一齊影相，佢唔肯，一定要媽咪抱住佢，睇黎善如應該係呷醋喎。

芒果布甸

下晝去咗行吓Jusco Supermarket，買咗芒果布甸同善如一齊整，佢都唔知幾開心。

珍珠末

善如呢幾日都係咁發惡夢，今日去咗買珍珠末俾佢食，好彩原來珍珠末係冇味既，佢用咗少少水就成啖啜哂啲珍珠末食，要連續食六日，希望佢好啲啦。

評估報告表

今日收到善如喺學校派既評估報告表，老師全部都剔哂已能掌握，今次仲有comments添，善如喺學校應該都乖同埋好守紀律既。

大扭計

善如呢幾晚都仲係好扭計，攪到爸爸﹑媽媽同埋工人姐姐都冇覺好瞓，都唔知佢攪乜鬼，臨瞓之前又話要去爸爸度，到爸爸抱佢佢又唔制，又唔肯喺自己張床到瞓，要同爸爸媽媽瞓，但係中途一醒咗就喊，一喊就喊成半個鐘唔收聲，但係又唔知佢扭乜，只係識喊，真係俾佢激鬼死。其實都唔知係咩野事，希望佢唔係嚇親啦，因為去旅行既時候，我地買咗啲炮丈燒，善如嚇到好似中槍咁，每燒一吓炮丈佢就震一吓，所以佢可能好驚，不過係唔係都好，都唸住放假去買吓保嬰丹俾佢食呀。

得意事件簿

洗頭
姨丈丈有日喺舖頭幫善如洗頭，丈丈問善如: [爸爸幫你洗頭舒服啲，定係姨丈丈幫你洗頭舒服啲呀?] 之後善如好攪笑咁答:[我舒服啲。]
笑死我地，佢又冇得失爸爸同丈丈，而個答案又真係啱喎，最舒服那個當然梗係善如啦，哈哈!!

刨鉛筆
善如第一次見到爸爸喺度刨鉛筆，係用最原始那隻鉛筆刨，唔係電動既，佢當然唔知呢個動作叫刨鉛筆，但係佢又想試吓喎，咁佢就同爸爸講:[爸爸，我又想好似你咁”撩”吓”撩”吓呀。]

好掛住你呀
不嬲善如都”痴”爸爸多啲，有一日媽咪打電話俾善如，但係善如都未聽到係邊個打黎，就即刻對住個電話講:[爸爸，我好掛住您呀!] 咁媽咪當然有啲失望咁話:[善如，我唔係爸爸，我係媽咪黎架!] 之後我唸住佢會講第二樣野，但係佢竟然答媽咪:[媽咪，其實我都好掛住您架!] 媽咪聽到即刻冧哂!

番禺野生動物園/大馬戲/澳門三天遊

今年新年特別好開心，因為年年新年都冇乜特別野做，今年全家人都放到假可以一齊去旅行，景點係番禺野生動物園/大馬戲/澳門，由初三開始去三日，計埋哂有成二十二個人，果然勁呀!
第一日仲要係媽咪生日，夜晚番到酒店，廿幾人一齊同媽咪唱生日歌，真係開心!

善如成個行程頭兩日都幾乖既，只係成日扭爸爸抱啫，但係到第三日就慘，唔知係咪因為佢幾日都唔夠瞓，所以佢好扭計，係咁喊，又話要番屋企瞓覺，好掛住隻佢成日攬開既狗仔，又話要瞓地下，佢既反應就係同上次工人姐姐喺房玩電腦，而攪到佢瞓唔到覺既一模一樣，點同佢講都唔制，係突然間同佢講話去買麵包佢先至冇事，真係俾佢激死。

個團包既野食當然就唔係咁好食啦，第三晚就去咗媽咪之前幫手Book既澳門新葡京自助山，嘩，好多野食，學姨丈丈話: [多到你唔信呀?] 以呢個價錢，真係算好多野食喇! 所以個個都食得好開心，善如就梗係開心啦，因為佢有得食之前去自助餐食過用朱古力噴泉整既棉花糖。

不過媽咪因為太凍冷親，番黎香港之後就病咗。

俾啲相大家睇吓啦!

摘士多啤梨善如就最開心，明明瞓咗覺佢都一定要起身摘。

有個人喺度扮狗仔，佢喺前面就驚，但係就夠擔喺人地後面玩人條尾巴同打人Pat Pat。

佢用朱古力噴泉整既棉花糖食得都唔知幾鬼開心!

善如被人邀請唱歌，喺旅遊車到唱得好開心!

善如玩吹波波，好鬼開心!

年初二

年初二都係去拜年，去完舅公舅婆到先至去婆婆屋企，善如都好乖，肯同人地講祝你新年快樂，身體健康，因為下晝有空檔時間，所以姨丈丈話幫善如set個靚頭，哈哈! 好鬼靚呀!!

初一拜年

今日年初一，善如去咗三個地方度拜年，嫲嫲，太嫲同埋姨婆 ，之後番屋企既途中已經好攰喇，瞓咗四個字，番到屋企就唔肯瞓，到夜晚姨媽媽姨丈丈佢地黎咗屋企一齊慶祝埋情人節，一齊食牛扒﹑剌身同埋鵝肝，不過因為一次過整咁多塊，所以啲野凍哂，不過唔緊要啦，最緊要開開心心。

善如喺十點半一食完奶就瞓著咗，我唸佢眼瞓到暈咁濟。

去維園行花市

善如無端端又流番鼻水同埋咳，所以今朝一早同佢去飲完茶就去睇醫生，之後帶咗佢去維園行花市，因為呢排善如成日都唔肯自己行，出親街都要爸爸媽媽抱，所以我地今日決定帶架BB車出街，同佢講定今日冇得抱，一係就坐車車。當然佢都肯，唔使自己行呀。

我地專登揀下晝去行花市，因為唔使咁多人，好彩都真係唔多人，得第一條巷較為多人，所以唔行那條，因為始終都推住架BB車，費事阻住人。之後善如見到巴斯光年汽球竟然話要，不過我地冇買俾佢，因為都唔得意，之後買咗個虎年風車，同埋兩隻虎爪俾佢，之後佢仲拿住兩隻虎爪黎唱"兩隻老虎"首歌添。

中途停低架車幫善如影相既時候，佢初頭笑得好開心架，之後無端端有兩個外國人見到善如話佢好可愛同埋好靚女，問可唔可以幫佢影張相，媽咪當然話可以啦，點知善如知道有人影佢，佢即刻收起佢個可愛笑容，仲"Dup "低頭唔肯望，攪到爹D媽咪好鬼唔好意思，不過佢地都照影咗佢，係咁同我講佢好靚女好可愛，媽咪唯有同佢講佢好怕醜啦。

之後去咗吉之島買野，好彩帶咗架BB車，善如瞓咗兩個鐘，爸爸唔使抱咁耐呀。夜晚去咗婆婆屋企食飯，但係因為見到二舅父，所以成晚都唔肯食，真係俾佢激鬼死。

用杯杯飲奶

善如今晚第一次試吓用杯飲奶，佢好肯去試，不過飲到六安就已經話好飽唔飲喇 。

中國服

今日係學校喺農曆新年前最後一日番學，今日唔使帶書包，學校既主題係農曆新年，所以佢地可以著中國服番學，我地梗係幫善如打扮吓啦，著番件中國衫，紮番條辮，好得意架!

善如放學番黎都好開心，仲帶咗好多揮春同埋利是封番黎添，原來迦南幼稚園有出利是封同埋揮春架。

善如預早同你地拜年先啦，祝大家事事如意， 身體健康!

善如仲未好番呀

善如啲咳仲未好番，夜晚瞓覺仲有好多啖，所以今日又去睇醫生。之前因為見善如冇流鼻水所以停咗啲藥，今次醫生話叫我地唔好停啲藥，雖然止鼻水那隻唔係抗生素，但係都要食哂佢，因為上次停咗藥攪到善如而家鼻水倒流，善如快啲好番啦，前幾晚聽到佢瞓一陣覺就成日咳，有幾晚仲咳到嘔添。

睇醫生既時候，幫善如度高磅重，佢而家99CM，36磅，嘻嘻，都真係幾肥呀，好彩都有番咁上下高啫。