超級無敵傳奇異果

爹Ｄ同ＢＢ唔知係咪睇得超級無敵獎門人多，玩超級無敵啤啤夫（唔記得係咪咁叫呀），所以喺度傳奇異果，好攪笑。

BB第二次剪頭髮

BB第二次剪頭髮，佢轉咗個新髮型，係平頭黎架，不過啲頭髮未夠多，遲啲多啲我唸仲得意呀。

BB 皺眉頭

媽咪因為陀住善如既時候成日皺眉頭，所以攪到善如而家都成日皺，不過爹Ｄ媽咪就覺得佢皺頭好攪笑，佢仲可以一時皺一時就fly kiss，又可以皺皺吓即刻笑添。

BB識行喇

個工人姐姐都幾好，算有心機湊BB，晏晝仲成日教BB行，之後到夜晚姐姐試俾爹D媽咪睇，佢果然識行兩步喎，呢個video係爹D媽咪第一次見到BB行，好有紀念價值架。

學步寶寶

BB學緊行，佢如果扶住啲野都行得幾穩喇，你睇吓佢喺會所自己扶住啲玩具行，佢可以一路行一路Hello架。

氹Elmo瞓覺

爹D媽咪好鐘意見到BB聽到音樂扭扭，我地都覺得佢扭得好得意，晏晝姐姐仲教佢如果Elmo眼瞓咁點呀? 佢仲識得拍吓佢氹佢瞓添

BB 識得扭蓋蓋

善如識得扭開支cream既蓋，好叻叻。

Bee Bee

BB學野好快，爸爸揸住隻蜜蜂教佢Bee，佢就即刻學到喇。

BB 沖涼玩水

話說有一個夜晚，媽咪未放工，所以爹D同工人姐姐幫BB沖涼，突然間發生咗啲攪笑野，BB而家都仲係用個盤沖，雖然BB平時都成日潑水，攪到地下都有啲濕，但係又唔想爹D媽咪條腰骨痛，所以都仲係將個盤放喺廳將食飯枱到沖，。那晚沖沖吓涼，突然間成地水，原來BB將個盤既塞抽起咗，放咗啲水出黎，好彩都及時塞番住，但係都已經攪到成地水喇，媽咪放工番黎爹D即刻話俾媽咪聽，媽咪笑咗好耐，因為真係好攪笑，BB又會識得抽起個塞既，好彩有工人姐姐啫，如果唔係抺死爹D呀，哈哈，BB叻叻。

BB一歲進度

善如一歲喇，不如講吓佢而家識得做乜野，講乜野同埋食乜野呀。

動作
Hello, bye bye, clap your hands, touch your head, ear and nose, roll your hands，Give me five, put your hands up, shake your body, 請請，點蟲蟲，飛吻，Cute Cute (佢會指住自已塊面)，搖船船，叫佢俾俾或者擺擺佢都識，識放玩具落個筒到，跌咗野落地或者熄咗電視佢就會話”冇咯”兼做埋動作，聽到音樂會”扭扭扭”，識用飲筒飲水，摸爸爸頭頭讚爸爸乖乖，爸爸叫善如”Pat”媽咪，善如識得打媽咪膊頭，扶住啲野黎行。

說話
冇咯，爸爸，媽媽，嫲嫲，識細細聲講bye，問佢邊個係善如佢識得指住自己講”我”，掉完野落地佢識話”曳曳"，想要某樣野會指住然後"鳴鳴"聲。

食物

南瓜，紅蘿蔔，薯仔，蛋黃，豬肉，菜心，菠菜，西蘭花(不過佢唔鐘意食)，橙，蘋果，奇異果，香蕉，木瓜，啤梨，提子。

記得就係咁多。

BB 超短網球裙

BB今日著咗條超短網球裙出街，令到佢既玉腿表露無遺，仲要加上今日佢心情超好，周圍聊人Hello同埋望住人甜笑，真係唔知殺死幾多靚仔引唔住望佢呀。

因為BB而家開始學緊行，晏晝喺商場俾佢推車車，佢都唔知幾開心，突然間聽到聲仲停喺度周圍望添。

BB 一歲去母嬰健康院

BB 今日去母嬰健康院做一歲檢查同埋打針，BB既重量係.......11.26kg (即係24.8磅)，大家睇吓啦，係超咗磅既大碼BB，女仔黎講就更加大隻添，佢高過條正常線好多呀，不過好彩BB既高度都算高(有78cm)，所以姑娘話都OK，唔使減肥。媽咪就話BB都係肥啲好，好咬啲呀，嘻嘻。今日姑娘叫善如將兩粒積木放落個碗度，佢都係揸住唔肯放，之後俾粒星星糖佢睇吓佢識唔識放落口，佢都係唔做，所以姑娘問媽咪佢平時識唔識架，我話識不過佢喺街又或者有陌生人既地方佢九成都唔肯做，姑娘話正常既，只要佢平時識就得喎。 之後到打針，BB梗係喊啦，不過都唔係喊咗好耐，有兩滴眼淚，之後搵塊棉花氹吓佢就得嘞。

去太婆屋企玩

因為爹D放緊假，所以有時間帶善如同埋嫲嫲去奧海城探吓太婆，順便可以同善如既表叔叔一齊玩添。表叔細善如一個月，但係都幾大舊架，咁啱姨公公早咗放工，佢仲攞咗好多玩具俾善如玩添。

BB 電眼

媽咪好衰，咁細個就教BB電眼，佢梗係即刻學啦，但係BB學得好攪笑，連佢自己都引唔住笑，哈哈。

很開心的一天

善如今日好忙碌，同公公婆婆飲完茶，之後去咗表姐屋企玩一陣，到四點幾大舅父就做咗司機車咗我地去最後一堂既Playgroup，因為表姐同埋公公都一齊去，善如玩得特別開心。因為今次係最後一堂，姐姐要考吓BB，睇吓佢識唔識得做某啲動作，但係善如都係一貫佢既作風，唔肯做，叫佢放低啲野佢唔肯，問佢邊個係杯杯佢又唔肯指，只係眼甘甘咁皺哂眉頭望實姐姐，之後就要爹D媽咪抱抱，好彩姐姐最後都肯俾張certificate 善如啫，我仲唸住冇添 :p

喺度順便唔該哂大舅父做司機車我地出去，佢成個幾鐘要喺條街到等，真係唔該哂，叫善如錫番啖先。

之後我地同善如去咗公園同埋會所玩，佢係咁爬係咁爬，好開心，表姐又同佢一齊爬，爬到兩個都污糟哂，佢都好大膽，夠膽企喺條樓梯度。大家睇吓個video，唔好以為佢個pat pat 做乜鬼咁大舊野呀，其實我地張條裙"攝"咗落佢條under 度，因為佢爬既時候成日"cake"住" 呀。 大家不妨睇吓BB既大脾仔啦，好肥美架，真係好想咬落去呀。

今晚其實成家人就係幫善如同埋大姑姐一齊慶祝生日，大姑姐係五月三號同善如生日係差一日jah. 所以BB過咗好開心又疲倦既一日........

BB 玩汽球

今日去咗Pizza Hut食野，有個姐姐送咗個汽球俾善如，之後返到黎屋企爹D同BB玩個汽球，BB笑到咯咯聲。

BB 一歲生日

BB一歲生日，本來唸住帶BB去海灘玩吓水，點知又落雨。唸住帶佢去波波池，報紙又話波波池多細菌，唔好去，攪到都唔知去邊到，最終帶咗BB去維園食餅仔同埋飲果汁，媽咪第一次俾BB飲呢啲果汁jar，佢只係打咗個冷震啫。 之後帶咗BB去玩具反斗城唸住買個公仔俾佢，但係又睇唔啱心水，因為我地唸住遲啲帶佢落會所游水，所以買咗個海龜浮床俾佢，佢好興奮，喺玩具反斗城又同爹D玩到成身軟哂，之後返到屋企爹D吹咗隻海龜俾佢玩，佢直頭開心到暈咗咁劑，你地睇吓就知喇。

BB 1st Birthday Party

Babykingdom 5月1號喺朗豪坊攪咗個生日會，我地帶咗BB去，有成80個家庭參加，好熱閙。當日有最燦爛笑容獎，最似爹D媽咪餅印獎，爬行比賽和競技比賽。 BB參加咗最燦爛笑容獎，雖然冇獎得到，但係BB都抽到份禮物，係本書仔黎架。



隔離呢個BB，係同善如同年同月同日出世，仲要住喺同一座樓添，真係啱喇。

工人終於到喇~~~

經過咁多波折，期待已久既工人終於順利黎到香港，初頭BB梗係唔慣啦，一見到工人就喊，唔肯俾佢抱，爹D媽咪都好擔心，好彩爹D媽咪輪流放假，俾啲時間BB適應，我相信BB一定會好快肯跟姐姐既，希望佢可以好似張相咁開心，而工人姐姐就俾心機啲照顧BB，等佢健康快樂咁成長。

你地睇吓第二張相，BB似唔似跳緊Hit Hop咁。

BB 最近成日都"嘩"

BB最近一見到啲野打開，佢就會"嘩"，伸埋條脷出黎，好攪笑。 其實係媽咪教架，嘻嘻!!