Halloween Party with KV Students

未去Halloween Party之前，我地去咗冒險樂園玩，買滿一百個金幣，就可以請人幫手畫公仔係面或者手上，善如唔肯畫面，只肯畫手，佢就揀咗南瓜。

整曲奇餅

行Catwalk，唸住叫善如好似跳舞咁扭pat pat，佢都唔肯。

家長日

今日善如同爸爸要去游水，所以得媽媽一個人去學校家長日。起初媽咪唸住老師會話善如寫啲字唔靚啦，點知老師話善如做野好慢，姿姿柔柔咁，去toilet都係最遲那個，老師話例如個toilet有四隔厠所，有三間有人用緊，佢望咗好耐都唔會去剩番那隔，唔知在唸什麼，老師直頭要話如果好遲都唔入黎就閂門，入唔到黎了，咁佢就會快番啲。

又話佢好硬頸，叫極都唔肯聽，例如開學時每日要自己攞啲功課同埋手冊出黎，佢死都唔肯攞，到而家佢先至肯攞。

同埋老師話善如冇乜所謂既，老師會用遊戲方式等佢地做野快啲，例如得十張貼紙，頭十名先至有貼紙，次次善如都係繼續慢慢，唔要都唔緊要。

經過媽媽同爸爸既觀察，善如係好睇人的，好慢熱，如果佢覺得那人有啲惡佢就乜都唔敢做，好鬼細膽，佢肯定係驚咗個班主任Ms. Siu，因為我見佢有時都幾惡，但係善如唔可以咁樣既，要快啲適應同人地相處，成日都驚唔知驚到幾時，好似游水個教練咁，上咗咁多堂有時都會驚，真係唔知點攪，佢其實已經見好多人，但係佢都係咁，唔通性格真係改唔到。

飲茶 & 香港美酒佳餚2011

朝早游完水，下晝去咗同嫲嫲同埋太嫲飲茶。

帝京酒店 - $45 一串既牛肉都唔係特別好味

今年爸爸同埋姨丈丈又想黎飲酒，不過今次唔買品酒卷了，上年飲到佢地嘔咁濟，加上佢地又唔係好舒服，所以都係唔買好啲。

公公生日快樂!

公公生日快樂!!! 今年公公既生日，特別有意義，點解? 因為咁多年都冇同公公慶祝生日，唔係因為我地唔孝順，係因為公公咁多年來都話唔可以同佢慶祝，所以我地連佢既真實年齡都唔知架，係今年佢先至話講得出黎，同埋可以慶祝，原來公公已經七十五歲了，所以我地今次就喺酒樓book咗間房，同佢打吓麻雀，唱吓歌咁，真開心。



公公食糊，仲要係清一式



又食清一式，勁呀!

飲杯

默書

今日一早起身同佢默書，佢竟然完全冇抗拒，仲好鐘意添，真開心，其實佢全部都識哂，不過寫得唔係好靚啫。其實只要善如肯寫同埋專注啲，佢都可以的，十五分鐘都唔夠就默哂全部字，抵俾印章佢係咁玩架。不過我都唔係好明，在屋企同佢温佢就全部識哂，個小字同埋J字都唔會掉轉，但係到默書既時候，就錯哂，可能喺學校佢較為心散啦。不過講真呀，以佢呢個年紀識寫咁多字已經好叻，唔應該在乎佢既默書成績，當然，佢既然都識既，梗係想佢啱啦。

濕地公園

今日跟爸爸公司去做義工，第一次入濕地公園既我地，一去到就有人黎介紹吓啲昆蟲比我地認識，之後我地就要幫手除草，睇住人除草以為好簡單，原來都幾辛苦架，不過，我地真係應該做多啲野救救地球呀，每人都出一分力啦，希望可以由細培養到善如都會明白呢個道理。

默書成績

上兩星期善如已經開始默書了，中文同埋英文，因為爸爸媽媽覺得夜晚善如已經好疲倦，所以又唔係好想同佢溫習，又加上有啲懶，不過呢兩次見到個默書成績真係有啲驚，真係唔可以太hea要同佢溫習吓至得呀。媽媽因為唔係好想特別谷佢，怕佢辛苦，所以都係盡力啦，不過其實善如都識寫既，係成日唔小心寫錯隔離啫。

爸爸媽媽決定今個星期開始，逄星期六日搵啲時間同佢溫習吓，唔好成日掛住同佢出去玩。

得意事件簿

(一)

今日同善如飲茶，佢畫咗幅畫，唸住番到屋企用啲金粉再整靚啲，其實爸爸唸住善如會唔記得，加上張紙都有啲污穢，所以冇話俾善如聽就掉咗落垃圾筒。點知，善如突然間問番。

善如：[爸爸，頭先我畫那幅畫呢?]
爸爸：[唔知仲喺咪度喎，番屋企搵吓先吓。]
善如：[我要番去整金粉呀。]
爸爸見善如咁緊張，有啲驚咁答：[善如呀，唔緊要啦，如果真係搵唔番，咁你就畫過囉。]
善如：[你係咪要辛苦我呀?]
爸爸詐聽唔到問多一次：[你話乜野話?]
善如：[我話你係咪要辛苦我呀? 要我畫過?]

善如真攪笑，竟然識得咁樣講，不過講咗"辛苦我"。


(二)
善如喺屋企整到隻手好污穢，善如想攞tissue抺手。
媽咪：[你隻手咁污穢，去toilet洗手啦，唔好用tissue喇，環保呀，要救救地球呀!]
善如：[媽咪，咁用水洗手咪又係唔環保，浪費哂啲水。]

媽咪都唔知點答佢呀 : p

打羽毛球

今日一早同舅母﹑表姐﹑表哥一齊打羽毛球，善如當然唔識得打啦，但係佢都好開心要攞住塊板打。

清水灣海灘

今日天氣好好，帶善如去海灘玩水，嫲嫲隻腳好番又話想黎同善如玩，梗係好啦，多啲人仲開心呀!