善如瞓覺樣

善如個瞓覺樣同爸爸個瞓覺樣係一模一樣的，真係成個餅印架! 唔知細妹似邊個呢? 好緊張呀!

媽咪個肚仲大過個西瓜!

媽咪而家先至七個幾月，個肚已經大過個西瓜，媽咪今次辛苦了很多，大腿﹑臀部﹑腰骨都成日痛，爸爸日日都同媽咪一齊番工，亦都差唔多晚晚都在尖沙咀接媽咪收工，雖然有爸爸幫手拿袋，但係都係好疲倦啊!

5月生日之星!

今日補祝番五月既生日之星，有Nelson, Owen 同埋善如，今日Suki病了，所以冇黎到，善如好少同男仔玩得咁開心，因為Owen 都係一個好乖既小朋友，善如重成日主動話想拖人添，真難得!

今日很忙碌啊!

今日既行程非常忙碌，一早媽咪要去上產前產後運動班，而爸爸就要去聽聖三一堂簡介會，所以工人姐姐帶陪善如游水，之後仲要叫工人姐姐去報暑期班。忙完一個早上，下午就帶咗善如去同嫲嫲﹑太嫲飲茶，之後又要去吉之島買"走佬袋"，嘩! 媽咪既體力勞動真係好勁，好疲倦，加上今日落雨添。

爸爸在聖三一堂簡介會，竟然撞到表妹瑤瑤喎!

在太嫲家坐咗一陣

空歡喜一場!

善如既默書成績不嬲都麻麻地，好少有一百分，有時仲低到得五十幾分添，其實爸爸媽媽都有幫佢默書的，不過佢一係就唔記得，一係就話寫唔切。今日見到老師派咗默書既成績，爸爸媽媽都好興奮，讚咗善如一輪，之後突然間俾媽咪睇到，原來將默書唔係楊善如，係陳善如既，真係空歡喜一場!

唔知陳善如既家長收到楊善如既成績，以為係自己個女得咁低分會有咩反應呢? 我唸佢地都嚇一跳。

善如病了

今日善如病了，有鼻水同埋成日打噴嚏，放學即刻去咗銅鑼灣睇醫生，有99度燒，番到屋企見到佢好疲倦，真的可憐啊!

接善如放學

今日媽咪一早起身唔係好舒服，所以請了一天假，睇完醫生冇乜野，瞓多一陣就好番好多，善如臨番學係咁問媽咪係咪接佢放學，媽咪都唔敢應允佢，驚到時唔舒服接唔到佢，所以話睇吓點先，到最終媽咪都係有去接佢，佢見到媽咪個樣真的很開心。

母親節快樂!




善如在學校做的母親節禮物，在星期五放學時打給媽媽：[媽咪，你一番到屋企就入房望吓自己個枕頭，我有啲surprise俾你呀!] 媽咪當然估到係乜，但係梗係扮唔知啦。

點知番到屋企，爸爸同善如講話不如母親節正日先送俾媽咪啦，佢又肯應允喎，之後仲收埋咗張咭添。

到星期日一朝早，爸爸媽媽都未起身，佢已經好掛心咁拿張咭入來爸爸媽媽房送張咭俾媽咪，同媽咪講母親節快樂! 她真的很上心啊! 一起身就記得呢件事，乖女!



善如成日都同妹妹傾計，同埋成日鍚佢架，有次爸爸攬實媽媽，善如好緊張咁話：[爸爸你小心啲呀，唔係咁大力攬咁實呀，會整親妹妹架!] 因為善如知道有時爸爸肉緊上黎，真的好大力架!

 



夜晚就去咗酒樓同婆婆食晚飯!

Lego "Cafe"

終於砌好呢份生日禮物了，善如很鐘意呀! ，砌完仲成日問，冇喇?! 仲有冇得砌呀?!

小龍女4D照



今日去咗照4D，終於見到小龍女個樣了，哈哈，好興奮，好似同善如都幾似樣。



今日個姑娘話小龍女已經有3.5磅，佢既重量係超越咗平均線，剛剛搭住咗超磅線，佢話如果當照呢個重量去，預計在35週已經會有七磅幾，(正常預產期係第40週，而37週出世就已經算係足月，但35週就未算。) 不過始終仲有兩個幾月變化，都唔知到時點，到尾段會去醫院密啲，到時先至算啦。

義賣樂施米

善如愛心爆棚，成日去做善事架!

媽媽都有來支持佢架!

姨媽媽當然有來支持佢啦!

爸爸最近積極參加義工活動，一有機會就會帶埋善如去，媽咪最近體力有限，只好留待遲些先一齊參加。今天他們去幫手義賣樂施米，每包$20，喺街見到咁細個小朋友大聲叫：[唔該幫手買包樂施米啦!] 唔知大家會唔會都受感染去買番包呢? 善如好落力，喺那個場賣得最多既就係佢，只要佢大聲叫，隔一陣就有人來幫佢買。有人問佢係幫邊到買架，佢有時怕羞，有時就識得答係幫助中國貧窮既農民脫離貧窮。

仲有啲婆婆，同佢買咗一包，仲行番轉頭同善如講，你咁落力，婆婆同你買多一包啦，真開心!

不過因為要企成兩個鐘，佢有時都會坐低休息吓，不過坐低都有幫手叫架。

同嫲嫲慶祝母親節@海港酒樓

Owen表哥仲送咗張生日咭俾善如添!

今次同嫲嫲慶祝母親節，有叫埋姑媽姑姐佢地出來，善如今日好叻，冇怕羞，仲好大膽叫人添，都係多得媽咪一早同佢講，如果佢乖乖地唔怕羞，今晚就俾貼子佢，果然有效!

Disneyland

起初來到就落雨濕濕，媽咪就好驚滑到，行咗三個字就已經冇落雨了，仲好熱添。

善如上次黎仲係驚，今次唔驚了，仲好大膽同米奇米妮影相添!

媽咪公司送兩張廸廸呢票終於到手，因為5月23號到期，所以要快快用咗去，因為之後啲星期六日都唔得閒，所以雖然今日都係有雨，但係都係要去，如果唔係就浪費了兩張票了。

好彩天公造美，最終都係冇落雨。媽咪其實全日都好疲倦，行行吓就要找位坐，好彩因為可能啲人唸住落雨，所以唔係好多人，周圍都有椅子坐。

當等緊排隊入去聽米奇音樂戲時，因為冇冷氣，媽咪差啲暈低，之後要在出面坐低等，要同工作人員講到時才俾媽咪入去。

我地今次去睇4D，之前已經幫善如打定底，係咁同佢講表妹睇咗好多次，好鐘意睇，4D好得意既，帶住副眼鏡可以摸吓啲蛋糕呀，米奇呀，因為佢上次一入去就喊，睇唔到，所以佢係正式第一次睇啫。一入到去熄燈，佢都有啲驚，之後開始睇時，佢好開心，笑到格格聲，點知睇到中間，獅子王出場，佢即刻又驚話唔睇，之後經過爸爸媽媽既鼓勵下，佢又肯睇了。

雖然媽咪好辛苦﹑好疲倦，又冇得玩，但係睇見善如同爸爸玩得咁開心，都抵既，爸爸都好開心呀，因為善如同佢玩機動遊戲呀! 善如好叻，勇敢咗好多。