打8號風球!!

今日無端端打8號風球真開心，個個都唔使番工番學，可以留喺屋企休息吓。 善如同爸爸一齊整手工，幾靚呀，整咗一隻雀仔同埋蝸牛呀，雖然隻蝸牛都唔似。 :p

之後落咗街買芒果啫喱粉整芒果布甸，善如都有幫手架。之後仲去咗表姐屋企玩咗一陣添。

隻腳有毛毛

工人今日話俾媽咪聽，下午善如去臭臭既時候，可能坐得耐，善如應該腳痺，但係佢唔識表達，佢同姐姐講：[姐姐，我隻腳好似有毛毛咁呀?] 姐姐笑到死咁濟，佢腳痺覺得係有毛毛，好攪笑呀。

善如有新床喇!

善如將舊床已經唔啱瞓了，隻腳已經掂到床尾，所以要買過將新床了。



善如將新床終於送咗黎喇，佢極之興奮話要上上格床，但係又落唔到黎，哈哈。



母嬰健康院

今日帶咗善如去母嬰健康院驗眼，其實四歲就要去既，不過book咗好耐先夾到時間去，去到都係指定動作，度高磅重先，嘩，善如又高咗喇，已經106.5cm，20kg，姑娘話佢重多一kg就超磅，而家都係貼住最頂條線。

到驗眼喇，個驗眼師真係唔係好掂，初頭善如都好合作，好似我地驗眼咁，叫佢睇啲好細既字睇吓佢睇唔睇到，佢都好叻，全部都睇到晒，但係因為問得太多，同埋突然間要熄燈叫佢睇個水晶球，佢就開始有少少驚，點知個驗眼師係咁話睇埋呢個冇架喇，睇埋呢個可以走架喇，善如就信佢睇埋呢個，點知又再叫佢睇其他，仲要睇咗好多個添，善如開始覺得個驗眼師講大話，唔可信，所以善如唔係好耐煩，好彩臨尾都俾爸爸媽媽幫手攪掂啫。

游泳班第二堂

今日係游泳班第二堂，善如今日好叻，好乖咁落去游水，唔使人講，由頭學到尾。
學完善如仲同媽咪講話好好玩添。

善如隻腳痛！

善如唔知係咪尋日游水太過用力，又冇乜做熱身，所以隻腳好痛，真係俾佢嚇親，今朝一早起身，佢話隻腳好痛，起唔到身。
爸爸問佢邊度痛，佢就話：[啲皮入面痛呀?]
爸爸：[我幫你捽吓啦?]
善如：[啲皮阻住你捽唔到架!]
陰公，全日睇住佢都一拐一拐，真係心痛呀。

@赤柱海灘

爸爸送俾媽咪既!

今日去咗赤柱海灘，一去到俾善如玩下水，佢就話我賴尿呀，之後就賴到條褲濕哂，爸爸今次又乜都冇帶，唯有喺赤柱買個晒啲衫褲同埋under啦，哈哈，爸爸仲買咗豹紋底褲俾善如添。

之後仲約咗姨媽媽姨丈丈去K11食好味既吉列豬扒添。

游泳班第一堂

善如暑假既游泳班就完咗喇，之後要報正常班都真係幾難，因為太多人報而又得好少位，好彩早前爸爸同媽媽七點四十五分走落會所排隊，先至可以幫善如報到，仲要係報到星期六朝早添，因為爸爸媽媽星期六可以睇住佢就好好多，爸爸媽媽開心到震呀，因為爸爸媽媽知道之前工人帶善如上暑期班既時候，善如成日都話驚，攪到得最後三個字先至肯落水。

今次有爸爸媽媽喺度，頭五分鐘善如都係唔肯落，經媽咪一輪輔導，佢終於肯，仲好開心乜都肯做添，之後個教練都忍唔住同爸爸講﹕「佢之前唔係咁架，佢好驚，成日都唔肯落水，今日你地喺度唔同晒，直頭係大躍進。」，爸爸媽媽即刻開心晒。

中秋@小欖

初頭冇野做，帶咗小朋友去沙灘玩。

今日難得姨丈丈放假，我地去咗小欖燒野食，今日天氣真係好熱，四點幾去到，都熱到死，等到差唔多六點，個太陽落山先至開始燒野食。

喺屋企表演跳舞

善如見到件跳舞衫，又話要喺屋企表演多一次跳舞，都好啦，因為件衫就黎要還番俾小公主學校，等佢再表演吓都好既。

做節@婆婆家

今晚去完婆婆屋企做節之後，就去咗屋企樓下影吓相，樓下都佈置得好靚。

大匯演

善如跳舞都跳咗成年幾了，今年既大匯演終於有佢份表演喇，爸爸媽媽期待咗好耐呀，雖然只係得兩分幾鐘，我地見佢初頭就好似一啲都唔驚，之後望吓望吓就開始有啲驚，不過佢都好叻，佢肯郁已經偷笑呀，以善如一個咁怕羞既人黎講，喺個台到對住幾百人，真係好難得呀，善如叻女。同埋老師之前已經話佢扭pat pat 扭得好靚，真係好靚呀。

啱啱瞓醒既善如，同姨丈丈影相。

做節@CWB

至從媽咪番咗新工之後，就唔使番星期六，啲時間真係好用咗好多。日日都過得好充實。

首先去咗APM食野，之後行咗一陣。

下畫去咗圖書館竟然撞到Astin，同佢喺圖書館門口影張相。

之後就去咗嫲嫲屋企樓下做節，爺爺又送咗個燈籠俾善如，多謝哂爺爺先。

食完飯就去咗維園睇花燈，好彩今日都唔係好熱啫，不過善如都出哂汗。


行到好攰，之後去咗甜姨姨食甜品，佢個芒果豆腐西米露都幾好食，善如都覺得好好味。