根德園第一次家長會

今日根德園既家長會，媽咪自己一個去，因為善如要去學音樂，老師話善如喺學校都唔算出好多聲既小朋友，起初就有啲心散，後來就好啲，留心啲，不過老師話佢啲小肌肉唔係幾好，例如油顏色，佢油好耐都係油某一個位，應該個幅度要大啲，其他小朋友油完佢都只係油咗好小範圍，仲有就係佢都係姿姿柔柔那種，去toilet要好耐先至攪掂，所以有時冇時間食茶點。
媽咪同老師講，佢喺學校唱既歌都會唱番俾我地聽，之後老師就話，咁即係佢其實都吸收到，咁幾好呀。媽咪順便趁機會同老師講佢食飯唔乖，老師話會幫我同佢講吓，睇下會唔會好啲。

美酒佳餚巡禮2010

今年既美酒佳餚巡禮喺西九長廊舉行，我地等埋姨丈丈收工就一齊入去食野飲酒，個感覺好得意，拿住酒杯在室外近海既位置試唔同既野食同埋酒，真係有另有一番風味。 爹D同姨丈丈每人要飲成十二杯40ml既酒，爹D一番到屋企就頂唔順瞓咗了。


適逢聽日哈囉喂，因為媽咪聽日去飲，冇得去玩，所以爸爸今日攞咗隻牛角俾善如帶，應吓節啦，

小曼谷既串燒同埋豬頸肉

牛肋骨

搵個盒載住既WHISK 三文治

仲有善如最鐘意食既香腸

太湖蟹皇翅

太湖蟹粉小籠包

善如 攰得濟，喺姨媽媽既懷抱裏瞓著咗了

學校第一次生日Party

今日係善如第一次參加學校既生日會，嘩，有咁多野食同埋禮物喎，佢拆禮物既時候仲好開心添。

唱歌

大腳板



London bridge is falling down

跳芭蕾舞

善如跳咗咁耐芭蕾舞，真係唔係好知佢學咗乜，剩係知道佢話學咗尖鉛筆同埋"掘"鉛筆，扮美人魚，同埋做一啲拉筋既動作。但係今日收到張通告，問參唔參加下年既考試，一個係澳洲舞蹈教師學會，另一個係英國皇家舞蹈學院既考試，我地都唸緊俾唔俾佢報好，老師話佢跳芭蕾舞或者爵士舞都得。

綠色同埋黃色樹葉

媽咪爹D放工番黎，見到有張工作紙係冇寫任何Instruction既，之後善如就同我地講，一邊要油綠色，另一邊要油黃色架，哈哈，好彩佢都肯講番老師講乜野出黎啫，唔係都唔知點做呀，佢今次油得好靚呀，冇乜出界。

搭車要俾$喇!!

尋日因為爹D媽咪都約咗人食飯，所以姨媽媽幫手揍善如去佢屋企瞓一晚，善如成十二點先至瞓，佢係咁叫姨丈丈轉呼啦圈，哈哈，轉到姨丈丈投哂降話要瞓覺。今朝姨媽媽帶善如去栢斯學音樂，姨媽媽就帶佢搭Van仔，因為姨媽媽攞住好多野，所以善如就自己行上Van仔，個司機叔叔竟然同姨媽媽講，你個小朋友好大個喇喎，要俾錢架喇，善如係第一次有司機要佢俾$呀，嘻嘻，大家都知啦，通常都再大個啲先至要俾架。

去公園玩

呢個星期因為媽咪唔舒服，只係可以帶善如去樓下公園踩單車同埋去公園玩吓，不過都好既，樓下啲空氣又清新，望吓啲樹木同埋個海，都幾舒服呀。

善如受傷了

今日媽咪唔舒服，喺屋企瞓咗成日，今朝一早媽咪同善如講，今日婆婆黎接你放學，下晝返黎你要乖乖地唔好嘈醒媽咪喎，你瞓醒覺，婆婆會帶你去跳舞架。到下晝善如竟然真係肯唔嘈醒媽咪喺自己將細床瞓，真係抵錫。

善如夜晚玩玩吓玩具突然間喊，原來佢整親隻手，之後媽咪同佢洗完個傷口之後就攞咗塊媽咪都唔捨得用既Pekkle膠布俾佢用，媽咪一度幫善如貼膠布，善如就話：[慘喇，我受傷了，我要入醫院喇!] 因為善如覺得受傷就要入醫院，之後媽咪解釋俾佢聽，呢啲小事黎唔使入醫院架，貼咗膠布好快就冇事喇!

學校生活

講吓善如既近況先，佢最近成日唔肯坐定定食飯，食成個幾鐘，俾佢激死，加上佢成日乜野都話唔記得，就算問佢爸爸個英文名係乜，佢都話唔記得，唔知佢做乜鬼呢排好鬼心散， 專注力好似麻麻地，不過最近出街就肯自己行多咗，等爹D冇咁辛苦。

番咗根德園大約一個月到，搭校車番學放學都唔係問題，不過善如成日都唔肯講番喺學校做咗啲乜野，有時都肯唱吓歌既。

今日因為突然冇人揍善如，所以媽咪臨時攞日大假揍佢，放學一見到媽咪，即刻叫我，而且仲好開心添。媽咪同佢食完午餐同佢行番屋企既時候，佢突然間同我講話老師話要執黃葉，只可以執地下既，唔可以摘樹上面既，媽咪好開心善如識得番講學校既野出黎，之後媽咪就同佢一齊執咗三塊俾佢帶番學校，媽咪相信老師一定有叫過同學執，不過唔知係咪今日啫，點都好啦，唔理喇，聽日帶咗番學先算啦。

學校開始正式上堂大約三個星期，善如已經教咗兩本書同埋學咗十個中文字。
大﹑手﹑腳﹑眼﹑口﹑耳﹑鼻﹑衣﹑人﹑一
A for apple, aeroplane
B for Bird

仲有應該學咗好多首歌，因為佢成日都唱一啲我未聽過既歌。

唱歌 - 上學去

係喺學校學既，見到佢啲動作真係攪笑。

探剛剛出世既灼垣弟弟

每次跳完舞佢都好開心架。

善如今日跳完芭蕾舞之後，就去咗探灼垣個弟弟，哈哈，啱啱出世好得意呀，成日抱住個差唔多四十磅既善如，突然間抱個咁細既，感覺好得意呀!

之前善如成日叫媽咪生個細佬俾佢玩，今日見埋灼垣個弟弟之後，佢就仲更加成日提起添，當今日善如再叫我生個細佬俾佢玩既時候，就有以下既對話。

媽咪：[善如，唔一定係細佬架，可能係細妹喎，咁你鍚唔鍚佢先
善如：[鍚。]
媽咪：[你要將你全部既玩具都要借俾佢玩架，得唔得呀?]
善如唸都冇唸就話：[得架，Sharing好冇, 佢玩一陣我又玩一陣呀?]
媽咪：[好呀，你好乖喎。總之係細佬同細妹你都要Share玩具俾佢玩架。]
善如：[你可唔可以生兩個呀? 一個男仔，一個女仔，咁咪有細佬同細妹囉。]
媽咪好驚慌咁話：[唔好喇掛。]

哈囉喂 - 蜘蛛

爹D每年差唔多到哈囉喂，就會攞哂啲南瓜公仔呀，蜘蛛呀黎嚇善如，當然佢而家已經唔驚啦，今日當佢一見到爸爸放咗兩隻蜘蛛喺佢個kitchen到既時候，佢就係咁笑，真可愛。

睇番佢得11個月既時候，同樣都係見到蜘蛛個樣，同而家真係好唔同，善如大個女咗好多喇!

唱歌 - I like Apple, Banana, Orange

今日善如唱I like apple.

I Like 香蕉，善如攪笑，中英合壁。

I like orange.

香港公園

好靚既蝴蝶

扮海寶

似唔似河馬呢?

睇完升旗禮仲好早，之後去咗嘆茶，嘆完茶就上咗香港公園行一陣，玩完水就睇昆蟲，善如見到佢成日扮既蝴蝶就好驚，但係蜻蜓佢就唔驚。

10月1日升旗禮

善如尋日夜晚無端端唱國歌，仲將隻手放喺個咀都扮吹喇叭添，我地估係老師教既，媽咪問佢去唔去睇升旗禮，佢話去，我地話不過要好早起身喎，佢話好。 今朝一早六點鐘叫醒善如，仲早過番學呀，但係佢好乖，即刻起身，我地約埋表姐同埋大舅母差唔到七點四就去到，善如拿住支國旗好興奮，好開心，仲一齊唱國歌添。

返到屋企都仲係未夠喉，要唱多幾次，佢啲動作好得意，支旗越升越高。

煙花匯演

夜晚去咗鳳城酒家食完飯，就去咗媽咪既堂阿哥屋企睇煙花，善如今次係第一次睇煙花。

睇完煙花表演，我地就睇鸚鵡表演，哈哈，隻鸚鵡識做好多動作，個個都睇得好開心呀。