朗誦

善如成日都得閒就唱啲歌，或者朗誦俾我地講，有時都真係唔知佢講乜，要上網check番先至知道佢唱乜。

忙碌的一天

xf

今日善如朝早去完畫畫同跳舞，就約咗灼垣同埋灼圻去飲茶同媽咪補祝生日，飲完茶就去維園玩，睇吓灼炘得四個月，肥嘟嘟幾得意。
善如到五點幾都冇瞓過，去完公園走既時候，佢竟然要抱(其實佢最近都真係少咗好多要爸爸抱)，之後媽咪唸，好啦，爸爸抱一陣啦，媽咪順便叫佢瞓一陣，點知唔使一分鐘就已經瞓著咗，好彩我地係搭巴士，如果唔係，抱住隻44磅既豬豬，攰死爸爸呀。



其實每次邊個生日都好，最開心既都係啲小朋友，因為有得吹蠟燭。



之後就同屋企人去咗酒樓食飯，都係補祝媽咪同埋二舅母生日。

畫班 - 第四幅畫

呢幅係上次畫既畫

尋晚媽咪同善如瞓覺，喺張床度既時候。
媽咪就問善如：[聽日我地去學跳舞同埋學乜野呀?]
善如：[學畫畫。不過，我唔想去學畫畫喎。]
媽咪好出奇地問：[點解呀?] 因為善如不嬲都好鐘意學畫畫。
善如：[我唔想呀。]
媽咪：[你唔想見到畢老師咩?]
善如：[想呀。]
媽咪：[咁點解唔想畫畫呀?]
善如之後就冇再講喇，都唔知點解佢會咁講，點解佢無端端唔想番既，不過點都好啦，俾佢學住先啦。

公園

今日帶善如跳舞同畫畫就去咗飲茶茶，今日善如都食好多野，一個奶皇飽﹑一舊珍珠雞﹑兩條腸粉，二粒燒賣同埋半碗腐竹雞蛋糖水，好似仲食得多過媽咪呀。

飲完茶之後，就帶咗善如去公園玩，竟然呢個公園都有上次去清遠呢啲運動機喎。

婆婆生日快樂!

今晚去咗APM慶祝婆婆生日，屋企人加埋舅公舅婆有成18個人一齊同婆婆慶祝，大家都好開心。
第一樣上既菜係海哲，爸爸自己冇試過就俾咗善如食，點知原來有啲wasabi喺度，辣到善如係咁撳住個口，之後即刻俾啲水佢飲，但係佢都係覺得好辣，攪到善如全程都唔係好肯食野，要媽咪安撫咗好耐先至肯食少少，最後，佢見到蛋糕就係咁食，可能佢知道蛋糕唔辣。

得意事件簿

錫二舅父

善如一路以黎最驚既就係二舅父，佢見親佢都好驚佢，可能因為二舅父個樣惡，所以如果要善如主動錫佢面，都真係好難。

話說剛剛去清遠旅行，有一段時間，二舅父要同時照顧瑤瑤同埋善如，唸住俾個機會善如冇咁驚二舅父，佢地三個一齊玩啤牌，善如好high好開心，玩咗一段時間，二舅父叫善如錫佢，佢竟然即刻錫佢，其實可能佢玩到忘咗形，點知玩玩吓二舅父又叫善如錫佢，佢就話：[瑤瑤錫先啦。] 瑤瑤當然唸都冇唸過就錫自己爸爸啦，之後善如都竟然真係有錫到二舅父，不過錫完之後，善如竟然係咁抺咀，真係笑死人呀，咁耐以黎，都好似未見過善如錫完人會抺咀，唔知點解佢會咁樣既，哈哈，真係好攪笑呀。

過紅綠燈
爸爸媽媽帶住善如過馬路都一定會跟住交通規則既，不過有時真係好趕既時候，爸爸就忍唔住過紅燈。有一次爸爸唸住善如睇唔到，個公仔紅燈未轉綠燈就過咗，點知善如原來睇到，仲話爸爸唔可以咁樣架。點知前幾日，爸爸又再次係咁，善如今次好大力咁捉住爸爸隻手好大聲咁話：[唔可以過架，我上次咪同你講咗囉，你又過既?] 死都唔俾爸爸過，善如真係叻叻呀，爸爸要檢討一吓喇。

派上學期成績表

善如派咗上學期既成績表喇，好開心，見到有幾個A呀，哈哈，四份Assessment - 中文﹑英文﹑數學﹑常識都係100分。

都有好多人攞A，不過都真係有啲同學係一個A都冇既，善如既成績如下：
General Subjects
English Oral = A-
English Reading = A
Chinese Reading = A
Number work counting = B+
Number work application = A
General Knowledge = A
Singing = B
Games = B
Rhythm = B+
Toys = B
Handwork / Art = B
Nursery Rhymes = B+

另外，關於佢既development方面，大部份都ok，只係有幾樣野唔係成日都做到。
1.  Expresses ones emotions appropriately
2.  Shows interest in learning
3.  Stays at task
4.  Fine motor skills (pencil grip, pencil skills, use of scissors...)

不過，有一樣就All the times 都做到既，就係Being Cheerful。爸爸媽媽睇度呢樣野都好開心，因為起碼喺學校佢成日都好開心。

媽媽生日快樂 (2)

夜晚同善如一齊去尖沙咀Monster Susui食日本野，佢去到梗係食最愛既加州卷啦。

善如話要扮個公仔影相，哈哈!

善如因為聽日要番學，所以好快食飽喺商場影咗兩張相就走lu。

媽媽生日快樂 (1)

今日媽咪生日，爸爸同媽媽一齊去睇咗一套要喊既戲-新少林寺，喊都唔緊要啦，因為有劉德華呀，哈哈，上網搵咗一間叫天機棧既食午餐。

鵝肝鴨胸沙律 - 都幾好食

牛扒 - 普通



蘋果卷&心太軟 - 都ok 





喺朗豪坊行街，真係難得冇乜人，可以去影吓相。





情人節快樂！

有小朋友既爹Ｄ媽咪通常情人節都寧願留喺屋企同佢地一齊過，有佢地喺度做電燈泡又有另一種開心，今年都唔例外，我地都決定買扒番黎食，仲飲咗少少酒，呢個情人節都一樣咁快樂！

又要睇醫生喇！

爸爸今日覺得自己好似發燒咁，最近因為豬流感都幾嚴重，所以唸住即刻去睇醫生，帶完善如學跳舞同埋畫畫之後，就去咗銅鑼灣睇醫生，再加上善如上次發完燒都仲有啲啖未清，所以帶埋佢去睇。善如好鐘意睇姚醫生，佢一有唔舒服就話要去睇佢，佢見親姚醫生都好乖咁俾佢睇。

成家一日到黑都睇醫生，真係要做多啲運動先至得呀。

飲完茶之後就落咗姨丈丈舖頭，爹Ｄ媽咪話要落舖頭派利是，善如即刻好快話：［我要落舖頭派糖呀？］　哈哈，不過最終善如瞓咗覺，都冇派到糖。

畫班 - 第三幅畫

善如畫既第三幅畫，有時真係好想知道，究竟有邊啲係善如畫，邊啲係老師畫呀。

Birthday Party



今日Jones, Nelson 同埋Irvin 哥哥黎咗我地屋企同Jones同埋媽咪開Birthday Party，善如今次好快就同佢地熟絡，唔使warm up咁耐，仲揸住支咪唱咗好多首歌添。善如玩到唔肯瞓晏覺，所以我地唸住八點鐘等善如瞓咗覺，我地先至自己出街食飯，點知善如都係唔肯瞓，咁我地唯有出街先，等姐姐同佢瞓，出門口既時候，善如話：［我都想出去呀。］爸爸媽媽就話：［唔得呀，你要瞓覺呀，我地好快食完野番黎呀。］點知善如喊到七彩，好慘呀，但係都冇辦法，因為爹Ｄ媽咪都唔知食幾耐先至番到黎，費事佢攪到咁夜，所以就算佢喊，我地都走咗。

點知善如成晚都發惡夢，醒咗好多次，係咁話要爸爸，要爸爸，爸爸媽媽好內疚呀，尤其是係爸爸啦，因為佢係咁叫爸爸呀。

Parson Music - Goodbye Songs

善如上音樂堂，喺呢班黎講，佢算係最大舊，哈哈。善如都好enjoy唱歌，每次唱親歌佢都好開心。

善如又發燒了

媽咪昨日唔使番工，帶咗善如去公園踩單車同表哥一齊玩，玩咗成個幾鐘，到今朝善如又開始流鼻水，仲發燒，好彩咁啱今日婆婆約咗嫲嫲喺屋企樓下同善如一齊飲茶，嫲嫲可以帶善如去銅鑼灣睇醫生。媽咪懷疑善如可能喺公園俾啲小朋友傳染都唔定，所以都係穩陣啲快啲睇醫生，最近流感好鬼恐怖。

得意對話@清遠

得意對話(1)
大家都知道要幾個小朋友一齊望住鏡頭影相都好難，媽咪見到善如同瑤瑤一齊玩緊個鞦韆，媽咪唸住即刻影佢地相，點知瑤瑤又即刻走開咗，大家都好無耐之際，點知善如就話媽媽：[乜你慢吞吞架?]


得意對話(2)
婆婆買咗個兔仔汽球俾善如，點知姨丈丈話睇唔到，善如即刻話：[隻兔仔有兩隻咁大隻耳朵你都睇唔到?] 咁又係既，又真係幾大隻既，哈哈。

清遠三天團 - 第三天 (3) 蒸氣打邊爐

去完公園之後，就去哂打邊爐，怪怪地係用蒸氣既，感覺已經唔係咁好了，點知仲激到一肚氣，首先就個爐出煙，之後就個煲出煙，啲煙喺個煲底到噴哂出黎，真係嚇都嚇死呀，好彩冇事啫。

清遠三天團 - 第三天 (2) 高鐵

最後，就係俾我地體驗吓高鐵既速度，睇住架車過，真係好快不過好嘈，又嚇到善如話唔搭，好彩黎那架唔嘈啫，唔係善如唔肯上車就煩了。



清遠三天團 - 第三天 (1) 馬鞍山公園

今日食完早餐就去咗呢個叫做馬鞍山公園玩，真攪笑，真係叫馬鞍山公園架，好啱小朋友玩呀。

清遠三天團 - 第二天 (3) 泥燴雞

今晚冇夜市行，走去酒店對面買咗幾隻雞番酒店食，都幾抵幾好味，只係$68啫。

清遠三天團 - 第二天 (2) - 燒炮杖

上年燒炮杖，善如已經好驚，今年都唔例外，大家睇吓佢驚到個樣都變哂就知喇，姨丈丈已經帶到佢去好遠，喺遠處望，但係佢都係好驚。



清遠三天團 - 第二天 (1)

尋晚去咗行夜市既時候，婆婆買咗隻吹氣兔仔俾善如，佢好開心，成日要拎住佢。

睇唔睇到係乜野字呀，壽字呀。

呢個係福字。