得意學生相

爸爸媽媽今次真係失策，唔記得幫善如影學生相，攪到要即刻落去快圖美影，八張相交哂俾老師，番到屋企爸爸媽媽即刻自己幫佢影過，靚好多，喺街影佢就唔係好自然，喺屋企就當然唔係問題啦，睇吓佢幾多表情幾得意。

溜冰

今日帶善如去咗溜冰，善如今次叻咗好多，可以扶住隻企鵝側邊就已經可以行，當然唔係好穩，不過起碼佢肯先呀，今日爸爸專登選咗條裙著，襯埋對溜冰鞋，雖然隻腳肥咗少少，不過爸爸媽媽覺得好可愛呀!

玩咗一個鐘，因為我地趕時間，所以要走，點知善如竟然發大脾氣唔肯走，攪到全場人都望住，乜野都唔肯，一定要留喺度唔肯走，俾佢激死。爸爸媽媽話咗如果下次再係咁就冇得去溜冰。

高過長頸鹿?

我地而家俾善如用八達通，就同佢講因為你高過呢隻長頸鹿，所以要開始用八達通，而家善如每次睇到呢隻長頸鹿，佢都要同佢鬥高。

好忙碌呀!

呢兩日好忙碌呀，因為善如張床唔啱瞓了，我地想買張床俾佢，不過因為呢間屋唔係買既，本來都唔想攪咁多野，但係都冇法啦，唔通叫善如打側瞓咩，所以呢兩日都周圍搵傢俬舖訂做床，行到好累呀。

加上因為嫲嫲整親腳，我地驚嫲嫲悶，所以今日一早搵佢飲茶，飲完茶去圖書館，之後善如要去跳舞，跳完舞就去落訂，最後善如攰到死仲話要游水添，之後即刻番屋企，五分鐘就落到樓下游水，善如勁開心，因為游水教練教緊佢潛水，所以佢夠膽張塊面浸喺水中。

Angry Bird

真係做得好得意呀!

爸爸喺街一見到呢個Angry Bird 遊戲，真係唔捨得放手呀，真係好得意好好玩，最攪笑係竟然會配埋聲，同個games一模一樣。

做功課

善如不嬲都係下晝同姐姐做功課，佢唔係好想做，成日慢條斯理，加上呢排知道姐姐對住佢做功課好炆，爸爸媽媽都想自己夜晚先教，但係如果第時多功課，等到夜晚先至做，我又驚佢太多做唔哂，不過，唔緊要啦，暫時都係爸爸媽媽教住先啦，因為K2佢都要番下午班，都係要夜晚先至做得。

嫲嫲整親腳呀!!

今日我地去咗銅鑼灣屋企搵嫲嫲，嫲嫲跌親腳呀，仲有少少骨折添，真可憐，我地扶佢喺屋企樓下飲茶，善如好乖，成日扶住嫲嫲。我地祝嫲嫲快啲好番，等佢可以出吓街，游吓水，因為日日都喺屋企真係好悶架。

亨亨生日派對

今日學完英文，就去咗大圍亨亨同學仔既生日會，嘩，有好多野食好多野玩呀，個小丑哥哥好鬼馬，仲識得變埋魔術添。 善如係咁玩鞦韆同埋滑梯，冇停過。到魔術表演都係話要媽咪企喺後面陪，其實佢已經睇咗好多次喇。

善如仲坐得落

勁呀，個小丑連反斗車王都扭到呀!

善如就話想要Pluto

善如玩呢個鞦韆，嚇死人，成個反轉跌咗落黎呀，好彩唔係個頭落地先啫。

波波池又玩得一大餐

呢個就係亨亨喇

善如突破表現，佢話要做鯊魚捉人喎，夠大膽，叻叻。

Webcam

請咗呢個工人一年都覺得佢幾好，不過最近買咗個Webcam有埋聲，聽到工人對善如既態度，同俾我地平時見到工人時既態度真係差天共地，佢喺善如隔離係咁自己煲電話粥，叫善如食野又大聲到死，同佢做功課又惡到死，媽咪聽到真係好心痛，真係好想自己去湊番善如。

媽咪同爸爸講番工人惡對善如既時候，爸爸當然好唔開心，但係都安慰媽咪話，工人個個都係咁，好過佢喺你面前都惡呀，爸爸都講得啱，總之佢唔好害佢，對佢唔係太差都好了。希望個工人都係因為善如頑皮既時候先至閙佢啦。

Jones's Housewarming & Irvin's Birthday Gathering

今日同善如去完學英文，就帶咗佢入元朗Jones哥哥既新居玩，間屋好大，又有花園，好正呀，善如玩到都唔捨得走。媽咪問善如鐘唔鐘意住呢度，佢都話鐘意呀，不過真係遠咗啲。

未黎之前，媽咪叫善如帶吹波波去Jones哥哥屋企吹，善如即刻問：[喺屋企吹波波，唔係麻?]
嘻嘻，因為善如未黎過，佢唔知道可以喺花園吹。

Irvin哥哥帶埋個姨甥仔黎，真好，等善如唔會咁悶。

Nelson哥哥仲要煮埋野俾我地食，真係唔好意思呀!

善如見到四隻狗就好驚，見到貓佢都有啲驚，不過因為有一隻好細隻，所以佢就唔係好驚，仲敢摸佢添，番到屋企仲係咁話掛住佢添，

媽咪：[ 下次仲同唔同隻貓玩?]
善如：同呀，佢好得意呀!
媽咪：[不過佢下次就大隻咗好多喎
善如即刻好似好唔想咁：[點解呀?]
媽咪：[ 因為你都會長大啦，貓都會長大架。]
善如好似唔係好開心咁，希望佢下次見到隻細猫長大咗都唔驚，會同佢玩啦。

充實的一天

今朝一早去探嫲嫲，因為嫲嫲跌親腳，好彩冇乜大礙，不過喺屋企打石膏休息緊，我地今日帶埋善如買野食上嫲嫲屋企同嫲嫲食下午，之後去咗圖書館還書，又要趕住番黎綵排，因為善如跳舞遲啲有大匯演，所以要帶佢去練習，哈哈，善如跳完舞已經攰到死，買咗碗米線俾佢食，再問佢去唔去游水，佢都話去。

落到去游水，我地問番善如，教練教咗佢啲乜，佢都肯做番俾我地睇，真係叻咗好多咁。喺個大人池度游只係用手袖或是浮板，但係我地仲驚過佢，因為佢掂唔到地，加上佢又未識游，浮板唔同水泡呀。佢有時突然間成日都要黏住爸爸媽媽，不過自從見到有三個讀St. Catherine既小朋友，佢地好主動咁話想同善如玩，佢地學咗三十幾堂就已經識游，善如見到佢地識游，又識潛水，佢突然間好有鬥心，喺咁練習游水，游番哂教練教佢既野，一啲都唔驚，好大膽，仲係咁叫爸爸教佢潛水添，見到善如咁樣爸爸媽媽好開心。

有自己既八達通

因為你話緊張咪緊張囉，哈哈，攪笑呀!

唔該增值一百元

好興奮，自己有八達通嘟。

小小英語音樂人 - 第三堂

今日學整第三種樂器，善如好鐘意玩。