戒尿片

今日老師打黎俾媽咪，話善如而家喺學校都開始講多咗野，所以可以開始試吓同佢戒片，因為佢如果有需要既時候都會夠膽同老師講去洗手間，加上老師話佢半日條片都冇乜點濕過。

其實善如喺屋企就已經冇著片好耐(除咗瞓覺)，係出街先至有著，爹D媽咪都係有啲驚，所以照同佢著，不過就成日帶佢去洗手間，所以全日條片都冇濕過既。

爹D生日快樂

爹D今日生日，因為爹D要Training所以請唔倒假，放工就去咗食爹D最鐘意既日本放題喇，雖然驚攪到好夜，善如聽日又要番學，不過爹D都係想番去接埋善如出黎食，善如一見到爹D媽咪，開心到痺。

睇吓佢食雪糕食到幾鬼得戚!

因為食日本野冇蛋糕切，所以番到屋企就切番蛋糕，善如就最鐘意喇，因為佢好鐘意唱生日歌同埋吹蠟燭。

創價幼稚園Interview

今日去咗創價Interview，去到有個室內既playground俾小朋友玩，比佢地warm up下, 之後就入間房interview，一入去到，因為間房都幾大，有兩個老師坐喺最入嗰度，善如行咗十幾步都未埋到去又開始驚同退番後喇，死都唔肯行前多幾步坐低，之後老師唯有問媽咪野啦.

1. 平時邊個照顧善如呀?

2. 放假同善如去邊到玩呀?

3. 平時放工同佢玩啲乜呀?

4. 佢係咪比較慢熱? 驚啲陌生人呀?

5. 讀緊幼稚園適唔適應呀?

6. 對小朋友有乜野期望呀?

再過多陣老師攞啲膠生果俾善如玩，佢又唔玩，不過終於肯坐低喇，之後攞本書俾佢，佢就只係答咗本書入面個公仔: [係爸爸同媽媽黎喎~]，媽咪即刻問，書入面個爸爸揸住乜野呀? 善如答:[鑰匙。]

喺playground既情況

九龍灣睇Bear Bear

同善如玩咗一陣，之後就帶咗佢去九龍灣睇Bear Bear，好多好大隻既Bear Bear 佢好鐘意呀，加上佢仲揸住姨媽媽個朋友Winnie Chan姨姨送既Bear Bear黎影相，特別開心呀!多謝哂Winnie Chan姨姨。

維園打鞦韆

善如真係好鐘意打鞦韆，爹D媽咪今日未唸到去邊到，之後問善如想去邊? 佢話想去打鞦韆，咁爹D媽咪就順佢意帶佢去維園打啦，佢真係好開心，原來一個鞦韆就可以令到一個小朋友笑得咁開懷，咁開心，我地做大人既都要學吓佢地，爹D媽咪見到佢啲咁天真既笑容，真係乜煩惱都冇哂，真係好多謝善如俾倒咁多開心同歡樂爹D媽咪。

扭腰腰做運動

著住全套運動衫做運動，特別可愛呀!

飲思樂冰

爸爸曳曳，俾善如飲思樂冰，點知佢覺得好凍，所以吐番出黎。

根德園幼稚園Interview

今日要去根德園幼稚園interview，時間係3:15pm，驚住善如會瞓覺，都儘量令到佢精神啲，同佢玩吓同埋俾吓糖佢食，搵咗一陣先至搵到間學校，一去到門口見到幾十人企哂喺門口，真係好誇張，去到門口話只係可以一個人家長陪善如入去，咁呢樣野梗係媽咪做啦，由3:15pm開始等，等到4:00pm先至有得見，中途入過幾間waiting room度等先至正式入去interview，喺啲waiting room到，善如都已經好眼瞓，有啲開始"炆"，唯有用糖黎引佢等佢唔好瞓，中途仲去咗一次toilet添。

到正式interview，有兩個老師負責見我地，一個老師叫善如坐喺張椅度，佢唔肯，個樣仲好似好驚咁，老師講咗好多野黎引佢，之後善如見到老師有個用刀切麵包既玩具，佢好想玩，先至肯行過黎，再之後就玩顏色加形狀既積木配對，雖然佢冇乜點玩過，但係都做啱哂。

喺呢個時間，突然間佢就肯坐低喇，之後再有以下既測試：

1. 有隻磁石羊仔，分開咗隻羊仔要佢合番埋佢，善如都OK做到

2. 有幅圖問佢呢個係邊個黎，佢一手俾番老師唔要，話要玩切麵包

3. 之後老師就再同佢玩切麵包，玩咗一陣老師就問番善如幅圖既野

呢個時刻另外個老師就問媽咪野喇，所以媽咪聽唔到善如答咗啲乜。

媽咪都有好多問題要答架：

1. 善如介咗片未呀?

2. 平時邊個湊呀?

3. 平時幾多時間陪善如?

4. 平時同佢玩乜呀?

5. 點解會識得我地呢間學校?

6. 點解要選我地呢間學校?

最後，老師要求善如同媽咪一齊唱歌，咁媽咪就選咗"太陽伯伯"，善如第一次唔係好肯唱，之後媽咪就叫善如，不如你放低把刀先啦，我地一齊大聲啲唱啦，之後佢突然間又好開心話好，就肯唱哂成首太陽伯伯，雖然佢始終有啲驚，所以有啲字唱得唔係好清楚，但係都好叻喇，臨走叫佢同老師講拜拜佢都肯，唸住攪掂啦，點知老師叫我地交張Form去門口時，又有個老師坐喺度，會俾糖糖食，老師問善如:[頭先有冇同老師玩呀?] 善如答有，之後老師問:[同老師玩乜野呀?]，善如唸咗一陣，佢話:[玩麵包囉。] 但係老師好似聽唔到，唔知望鬼咗邊度，之後媽咪就講多次，係喎，頭先同老師玩切麵包喎。]最後佢都肯同老師講多謝同拜拜，不過要媽咪提既。

成個過程攪咗成個鐘，4:15pm先至走得，爹D喺學校個公園等，見到爹D善如好開心，爸爸一抱佢，佢唔夠一個字就瞓咗。

雖然呢間係媽咪最想佢讀既學校，不過一切都係由天注定啦，以善如咁眼瞓有咁既表現，爹D媽咪已經覺得好開心喇!

Happy Birthday

今日預早同爹D慶祝生日，今日善如好乖，講好多野，仲唱咗好多首歌俾哥哥聽添，因為多人喺屋企，善如好野性唔肯瞓覺，下晝只係瞓得三個字，所以夜晚冇帶佢出去食飯，善如冇得食大閘蟹lu，啲蟹好好味呀!

Butterfly

善如扮butterfly飛

Hide and Seek

善如同爹D最近既新玩意就係玩hide and seek喇，善如個樣好鬼馬架!

唱歌歌

善如又學咗新歌喇。

做運動

伸伸手，彎彎腰，跑跑轉轉轉

做運動，身體好，一起跳跳跳

買Boots

今日同善如去銅鑼灣買鞋，見到ELLE有對boots幾靚，就即刻叫個Sales俾善如試，之後搵左一對大小小的，唸住佢隻腳好快大，之後試既時候，個姐姐叫我地唔好幫佢拉拉鍊住，塞隻手入去對鞋到，睇吓隻腳既size啱唔啱，有冇位剩先，咁我地度過都大咗啲，不過都OK既，點知一拉拉鏈就出事，條拉鏈竟然拉唔埋喎，之後爹D對住個Sales話:[點解隻boots個"筒"會咁窄架。] 之後個Sales一度笑住但係又唔係咁好意思咁講:[其實唔窄喇，係佢隻腳比較多啲肉啫。]

慘啦，善如唔通真係要減肥!!