唱歌 - 讚美主

善如喺學校唔知係咪學咗表演完之後就要鞠躬，佢好攪笑，又要鞠躬，又要怕醜，之後就擘大個口走咗去，向住爸爸媽媽都要怕醜，真係俾佢激死。

得意對話

嫲嫲今日黎揍善如，帶咗佢去大快活食飯，善如著住條校服，點知整到條校服裙污糟咗，善如講：[死喇，俾爸爸閙死喇。] 嫲嫲答：[唔緊要啦，你同爸爸講對唔住囉。] 之後善如再講：[講咗對唔住，爸爸都會閙架。] 哈哈，原來爸爸喺善如心目中係咁惡既。

柏斯音樂班 - 第二課

善如每次出去示範既時候，都好怕羞，示範完每次番到黎就擘大個口得個窿 ，即刻攬住爹D，俾佢激死。

中秋節快樂!

中秋節喺婆婆屋企做完節，之後番咗屋企樓下個公園到同表哥表姐玩燈籠，玩到成十一點幾先至走，善如玩得好開心。

栢斯音樂班 - 練習篇

善如學栢斯音樂班，番到屋企都要練習吓架，我地今次就教善如唱Happy Song同埋If you're happy and you know it "clap your hands". 佢一唱就要唱成十次咁濟，好鬼開心，爸爸媽媽都覺得善如好鐘意音樂，睇吓大個啲，佢係咪真係有天份然後裁培吓佢先。

忙碌的一天

今朝一早起身，善如就要去跳舞，跳完舞就趕住去銅鑼灣，爸爸媽媽之前俾善如傳染咗之後，咳咗成個月都未好番，終於定唔順走去銅鑼灣睇醫生，希望快啲好啦。食完野之後就趕住去媽咪個中學同學既結婚典禮，本來唸住帶埋善如去可以恭喜吓姐姐，點知佢未去到已經瞓著咗，到個典禮完畢佢都未醒，激死。

等緊睇醫生既時候冇野做，爸爸同善如玩心不對心我至勁，睇吓佢幾鬼開心。

部相機好唔掂，影得好差呀。

喺銅鑼灣行咗一陣街，去咗板長食壽司，善如見到個兒童餐好開心，不過佢竟然食唔哂，之後我地試下食，完來都幾難食下，只係虛有其表。

最後，我地帶善如去咗維園睇花燈，雖然天氣好熱，但係佢心情非常之好，仲係咁叫我地幫佢影相呀。

尖沙咀睇花燈

下晝去冒險樂園玩咗一陣

今日下晝去咗冒險樂園玩完之後，約咗姨媽媽同姨丈丈喺海港城食越南野，之後去咗海旁睇燈籠，全部都係懷舊野，全部都係六十年代既特別野，好得意呀。

柏斯音樂班

善如今日喺柏斯上第一堂既親子音樂班，佢好開心，好鐘意，老師叫佢出去將隻Bear擺在鋼琴到，佢即刻飛出去咁濟。

因為媽咪星期六要番長短週，所以要爸爸一個不懂樂理既人去陪善如上堂，希望爸爸都努力啲一齊學啦。

天天天晴

善如前一排因為去咗表哥表姐屋企食飯，所以成日聽到天天天晴呢首歌，佢非常之鐘意，一聽到呢首歌就忍唔住停喺度拍手，今日專登影咗佢個陶醉樣。

芝麻咀

今日俾善如食芝麻糊，佢食到個咀好似生咗鬍子咁，好鬼得意。

瞓多一陣啦......

今朝善如不出我地所料，起身喊到拆天，佢話要瞓多一陣，梗係啦，尋日下晝都冇瞓過覺，到夜晚食得飯黎都成十點幾先至瞓，今朝點會夠瞓呀，可憐既善如妹妹。

生日Party

九月係姨丈丈同埋細表哥生日，下晝打完麻雀之後就去咗酒樓慶祝，善如掛住玩，成個下晝都冇瞓覺，真係驚佢聽日番學唔肯起身呀。

Mega Box

今日帶咗善如去九龍灣同埋Mega box行，去到Mega box可以用Mega Club會員績分去換汽球，上次有個Gathering有個小丑扭咗把遮出黎，所以善如今次都話要把遮，仲夠膽自己同個小丑講添，因為把遮都幾大把，好多人都望到覺得好得意，好多人走黎問邊度有得攞。

學畫畫

善如上星期去咗試堂去學畫畫，做手工，呢間都好似幾好，幾Creative，仲要係好近，喺樓下個商場，正考慮緊俾佢學，因為佢都好似幾有興趣，不過媽咪唸住等佢習慣吓啲番學時間先，之後先至慢慢學。

第三日番學

今日善如第三日番學，搭校車方面佢就完全冇問題，某啲同學仔喊都冇影響到佢心情，不過係早咗起身啫，今日等車既時候，專登留意吓其他啲小朋友，其實佢地好多個都係好細個，爹D媽咪先至冇咁過意唔去。

昨晚有個根德園既家長打電話黎，原來善如本手冊同佢掉轉咗，之後番去睇吓，原來唔只同一個掉轉咗，最少應該係三個，我地今朝上校車既時候都順便提吓老師，等老師幫我地換番，同埋唸住都等佢地留意吓，因為手冊入面都有啲個人資料，好似唔係咁好。 唔知關唔關我地唔記得帶佢個名牌事呢??

第二日番學

今朝善如唔肯起身，因為昨晚攪到成十點九先至瞓，所以佢唔夠精神，佢係咁話要繼續瞓，爹D媽咪聽到都覺得佢好慘，本來媽咪唸住遲啲先起身，唔送阿B番學既，聽到佢啲喊聲都一早起埋身同善如打氣，攪咗成兩個字都唔肯刷牙食奶，好彩佢隔咗一陣都冇事啫，之後仲好開心咁出門口添。

爹D媽咪今日唔記得幫善如掛名牌喺身上面添，明天一定要記得至得，如果唔係，老師好難認佢係邊班同埋邊間學校架。

第一日正式番學

今日善如第一日正式番學，爹D同媽咪成晚都瞓得唔好，因為要好早起身預備善如既一切，攪到大家都好緊張。一早起身，好彩善如都好合作，同埋心情都好開心，我地7:30am已經去到等校車，等車個地方好多人，而裏面都有成四五個係根德園既同學仔。

校車係一架大旅遊巴黎既，每一邊坐三個人，佢地冇安全帶但係最出面那個會有個欄欄住，架車有兩個老師喺度，都冇咁擔心，咁啱善如坐最出，如果佢瞓著咗，我地都驚佢會跌出黎，不過希望有兩個老師喺度睇住會好啲啦。

新工人姐姐啱啱到

新工人啱啱到咗兩三日，暫時既評語係唔係幾好，不過好過之前剛剛走那個菲律賓工人，起碼佢會同善如笑吓，雖然唔係好主動，加上佢完全唔識煮野食，所以真係乜野都要由頭教過，唔知點解佢唔肯抄低野，佢話佢既記性好好，但係又成日唔記得野，點都好啦，再睇耐啲啦，都係兩三日啫，希望佢好啲啦。


前幾日新工人姐姐未到，善如無端端晨早就對住我地喊，話好掛住Indah姐姐，話哂Indah都由一歲照顧到佢三歲，佢可能都真係好掛住佢，不過我地為免佢太唔開心，爹D媽咪只係答佢Indah姐姐番咗自己屋企湊仔仔，然後拉開話題，講第二樣野。

根德園家長會

今日係善如第一日番學，不過其實係家長會，只係上一個鐘同埋係冇校車接送架，所以爹D媽咪就帶佢番學，我地同善如講，你細個既時候就番迦南幼稚園，而家你大個女喇，所以要番根德園幼稚園，佢好開心，覺得自己真係好大個女。

善如係讀Kent Road 既1D班，不過一班有成二十六個人，即係一對十三，都幾多人，由兩個老師帶住，個班主任係姓米。今日學校派咗好多野，書包﹑顏色筆﹑字咭﹑夏﹑冬天既運動服﹑通告等等。

今日聽老師講野既時候，善如都好有心機坐定定聽，之後老師問邊個想幫我做一啲野既時候，善如竟然立即舉手，爹D媽咪都想讚佢叻呀，但係當老師叫佢既時候，佢又唔肯出去喎，哈哈，又開始怕羞lu，之後老師叫咗佢一陣都唔肯，就叫咗第二個同學試。再隔一陣老師又要同學仔幫手，媽咪就同善如講，不如媽咪陪你出去呀，佢就話好，然後自己已經出咗去，唔使媽咪陪呀，之後爹D媽咪都即刻俾個叻叻佢。

上咗大約一個鐘就完lu，下次要到9月6號先至正式自己搭校車番學，番學時間係由8:45am 至12:10pm，不過架校車好早呀，以前迦南8:30am上車，而家要7:35am上車呀，即係話要搭一個鐘頭車，善如要差唔多6:50am起身，好陰公呀...... 不過冇辦法啦，間學校好啲，都值得既。