今日善如俾人襲擊

今日爹D媽咪同姨媽媽喺恒豐行街，善如啱啱瞓醒，爹D因為想去Toilet就放佢落地，媽咪同姨媽媽就帶善如入一間舖頭度睇野，入到去見到一個應該大過善如少少既女仔，佢一見到善如就好大力咁抓住善如兩塊面，我地都阻止唔切，之後善如好驚，姨媽媽喺佢隔離，佢就即刻攬住姨媽媽係咁喊，仲喊到"扯哂哮"添，個小朋友既阿爸阿媽就一啲反應都冇，對唔住都唔講聲，之後我地就走咗出舖頭門口錫番善如先，之後見到善如個鼻同個咀中間流咗少少血，真係嚇鬼死呀，以為佢流鼻血，原來係個小朋友好大力咁抓，啲指甲整損咗善如，之後姨媽媽好嬲咁走入去話佢地攪到善如損咗，對唔住都冇聲，嗰兩公婆剩係答"唔係吓?"都冇出黎講句對唔住同埋睇吓善如，善如一路都未喊完，仲"扯緊哮"，爸爸終於去完Toilet番黎，知道咗之後即刻抱實善如，嗰兩公婆就出黎同我地講話佢已經打咗個小朋友喇。之後我地都冇鬼理佢地就走咗，費事善如見到個小朋友仲喊多幾錢。
其實嗰兩公婆係咪應該教個小朋友講句對唔住或者自己都講句對唔住呢?? 打佢都冇用架。

之後姨媽媽知道附近有雞蛋仔就即刻去買俾善如食，等佢分散吓注意力唔好咁驚，爹D媽咪就即刻帶佢去九龍公園吹波波(好彩咁啱帶咗俾善如玩啫)，之後隔咗一陣善如先至抖番條氣唔喊，去咗玩吹波波咋。

幫媽咪拿拖鞋

善如而家好鐘意攞拖鞋俾爹D媽咪著，通常佢攞完之後，我地都會同善如講唔該哂，佢就開心到連自己都會講埋一份，你地睇吓個video就知喇。

新玩具

呢個玩具係用Pampers印花換既，而家終於啱善如玩lu，佢一見到就好開心，仲將珠珠一粒一粒咁數1至10添。

善如仲未好番

善如既咳同傷風都仲未好番呀，呢幾晚成日咳到醒，睇咗幾次醫生都係唔得(同媽咪一樣)，又要去第二度睇，媽咪放假帶咗善如去銅鑼灣睇，見到啲藥就驚呀，不過有啲係有需要先至食既， 善如您快啲好番啦。

幫公仔打跟斗

善如除咗鐘意自己打跟斗之外，仲好鐘意幫公仔打跟斗，佢啲手勢仲好正確添。

沙田拜山

今朝一早坐二舅父架新七人車去鑽石山飲茶，善如竟然同媽咪一樣咁"渣"，暈車浪喎，嘔到舅父架車同埋爹D條褲污糟哂，可能因為善如啱啱飲完奶，加上喺架車到睇表妹啲書，所以攪成咁囉，善如真係要Sorry二舅父先至得呀。之後善如呆呆地喺酒樓都冇乜點食野呀。

飲完茶就去沙田寶福山拜山，拜完山去沙田行吓街，有間舖頭擺哂啲玩具狗仔同埋豬仔喺地下俾小朋友玩，善如一見到就捉住咗兩隻狗仔玩，仲話好得意添。 之後仲去咗Snoopy Town玩一陣添。

善如唱歌表演 (2)

Ten Little Indian Boys

善如跟住個畫面黎唱歌同埋做動作，好得意!

善如唱歌表演 (1)

Happy Birthday!

跑步步

Five Little Ducks

最近善如好鐘意聽歌，同埋唱歌仔，仲成日跟住黎做動作添。

大澳一日遊

今日姨媽媽同姨丈丈放假又帶咗善如出街，今次佢地向高難度挑戰，竟然帶咗BB去大澳，去到咁遠，佢地好勁呀!

善如今次都好乖，冇扭計，佢喺車度就瞓覺，上次夜晚見到爹D媽咪就喊，今次夜晚番到屋企我地問番善如開唔開心，佢就梗係話開心啦，睇吓個video佢答啲乜。

爭野玩

今日爹D媽咪約咗朋友出黎補祝媽咪生日，所以善如見到灼垣哥哥，兩個小朋友都影唔到一張係兩個都望住鏡頭既相，呢張當係啦。睇住佢地兩個爭野玩真係好得意，男仔就活躍啲，所以灼垣哥哥成日攪善如，但善如一於少理，繼續食佢既粟米，好攪笑。

善如"嘩嘩嘩"

今日同善如去咗行街，之後夜晚去咗大舅母屋企食飯，善如同表哥表姐玩到好High，佢肯用中文同英文數1-10，玩保齡球仲係咁"嘩嘩嘩"，好似睇煙花咁，嘩到唔停，唔夠氣既時候，仲吞啖口水再嘩過添。

善如病咗

善如頂唔住媽咪啲細菌，終於病咗lu。佢有流鼻水，少少咳，同埋隻眼發炎，要滴眼藥水。每次同佢滴親眼藥水就喊到拆天。

平時我地會將啲藥水放在奶到俾佢飲，不過而家飲得兩餐奶，啲藥又要飲四餐，唯有試吓用匙羹餵佢啦，俾第一啖佢，佢已經變哂樣，之後媽咪就話食完一啖就食一塊餅，佢就再行過黎，媽咪又俾多一啖佢，佢又變哂樣，之後就唔肯再過黎，咁媽咪唯有將粒餅放喺匙羹到，唸住等佢用匙羹食餅可以將啲藥一齊食落肚，佢見到之後即刻行過黎，媽咪就唸住佢中計，咁咪即刻餵佢囉，原來佢行過黎係用隻手攞走粒餅，咁就唔使飲到啲藥啦，善如你真係好鬼醒目架啫。

善如得意事件簿

善如越來越講得多野，所以會有好多得意野聽。

大舅母問善如: 善如乖唔乖呀?
善如: 乖呀.
大舅母: 咁大舅母乖唔乖呀?
善如竟然答：Ok 啦!

有一日媽咪喺屋企食緊豬扒。
善如: 媽咪食乜野呀?
媽咪: 媽咪食豬扒囉?
善如: 媽咪豬扒囉。

媽咪喺房用緊電腦，爹D同善如玩隻紙蝴蝶，善如整爛咗，之後爹D叫善如入房搵媽咪用膠紙"痴"番隻蝴蝶，善如入到房同媽咪講: 媽咪痴根呀! 媽咪痴根呀!

善如真係攪笑呀!

海豚

善如識好多指令，成隻海豚咁，其中一個指令就係只要媽咪將隻手轉一轉，唔使出聲，佢就會識得自己擰轉面，等人地抱抱佢。

騎牛牛 四圍走

善如好鐘意爹D同佢玩騎牛牛 四圍走，佢仲成日對住塊鏡話好高喎，又話騎牛牛，四圍走，仲成日話"yeah"之後個身就軟哂lu。