猴棗末/猴棗散

善如已經咳咗好耐，雖然唔係成日咳，但係一咳就聽到佢啲痰聲好犀利，上星期終於買咗余仁生既猴棗末俾佢食，每日一支，總共食咗八支，好貴，要成千幾元，講真，初頭爹D媽咪都有啲懷疑猴棗末既功效，每日只係食細細支，係咪真係得架。 食完咁多日，善如真係好番好多，都可以話清哂啲痰，其實計起上黎都唔係好貴，最緊要係好，之前食咗好多次西藥都唔得，起碼唔使善如咳得咁辛苦呀。

啱啱訂定咗啲猴棗散(平啲)放喺屋企，有需要既時候就可以俾善如食。

畫班 - 紙黏土

善如好似愛上咗畫畫，昨晚臨瞓既時候，

媽咪：[善如，你快啲瞓，因為明天要學畫畫同埋跳舞呀。]

善如一聽到即刻問：[可唔可以學完畫畫先至跳舞呀?]

媽咪：[點解呀?]

善如：[因為我鐘意囉。]

媽咪：[畢老師未咁早黎架，所以要跳完舞去就啱啱好喇。]

今日善如上畫班係教整紙黏土，一放學佢好開心咁將製成品展示俾爹D媽咪睇，暫時佢都仲係好enjoy番畫班，希望佢繼續努力，可以從中學到多啲野啦。



善如既兩幅作品

老師既評語係：[雖然善如未識得自己畫啲圖畫出黎，但係佢肯好俾心機油顏色。]

太陽眼鏡 Look

今早善如上完Parson Music就交咗俾工人姐姐，等佢瞓一陣覺，爹D媽咪就去咗行街買野，夜啲就叫工人姐姐帶善如出黎食飯，因為約咗姨媽媽姨丈丈食飯，佢地未到，所以喺永安行一陣，見到副小朋友太陽眼鏡就俾善如帶，善如即刻話要影相，貪靚豬。

同爺爺嫲嫲行花市

今晚約咗爺爺同嫲嫲去泉章居食晚飯，因為食飯要限時，食完就即刻要離開酒樓，見咁早就帶咗善如去行花市，嘩，今晚已經好多人了。

爺爺嫲嫲買咗隻兔仔公仔同埋吹氣兔仔俾善如，佢好開心。



力奇打邊爐

善如好番啲喇，但係未好得哂，不過都再有睇醫生，又要抗生素，食到佢個人好炆同埋發脾氣，所以今日下晝帶完佢去Parson Music，就等姐姐陪佢喺屋企瞓覺，夜晚都費事接善如出街，費事到時佢出到黎發脾氣就煩了。見善如冇出黎，所以爸爸媽媽就約埋姨媽媽姨丈丈去咗媽咪個朋友介紹既力奇打邊爐，因為要排隊等位，排咗差唔到四十五分鐘，終於到了，啲野食果然好味，同埋大大碟，個豬骨煲好大個，下次真係要叫多啲人食至得。

畫班 - 第一堂

今日係善如第一堂學畫畫，仲驚住佢發燒去唔到，點知起身冇發燒，問佢去唔去跳舞同埋畫畫，佢即刻話好，然後好緊張咁問媽咪喺邊度學畫畫，媽咪答話其實媽咪都係第一次去，一陣跳完舞就去啦，佢就好開心咁起身刷牙洗臉。

去到畫室，善如雖然因為第一次去有啲怕醜，不過經過老師同佢傾吓計之後，佢好快就同老師熟絡咗。呢個幼兒畫班係適合由三歲半至五歲既小朋友，一班最多六個人，成班最細係善如，都好呀，等佢同啲大啲既小朋友一齊學習吓都好。

今日既主題畫係魚，我地偷睇到老師有幫善如畫，咁當然要啦，善如咁細個，都唔識畫啦。

下午番到屋企，善如又發番燒，仲燒到103度添，善如快啲好番啦。

善如發燒

善如夜晚一點幾無端端發燒，即刻俾退燒藥佢食，佢就成日話隻腳好唔舒服，應該係啲菌喺身裏面攪到佢好唔舒服。到今朝又完全冇哂事，今日就照帶佢去Parson Music，然後去咗APM攞野，食食吓野又突然間發燒，我地摸到佢條頸好興，之後帶佢去睇醫生再番屋企瞓覺，夜晚就去咗大舅父屋企同表姐慶祝生日。

點解唔見咗條底底既??

今朝凌晨四點幾，善如急weewee，所以爸爸帶咗佢去toilet，之後繼續再瞓。到朝早起身換衫番學既時候，媽咪仲瞓緊覺，突然間聽到工人姐姐問：[善如，你條底褲呢? 點解唔見咗條底褲架??] 攪到瞓緊覺既媽咪聽到都即刻起身睇吓乜野事，原來當工人姐姐幫善如除褲既時候，見到善如冇著到底褲，之後大家都係咁周圍搵番條底褲，最後都係搵唔到，而爸爸就話明明兩條褲一齊著番架。後來都唔理了，媽咪叫工人姐姐攞過第二條俾善如著，同埋叫佢一陣得閒就搵吓啦，點知工人姐姐都係搵唔到。

到放學番黎，姐姐同善如換換吓衫，無端端善如感覺到自己有啲野喺個身到，摸摸吓個身，然後攞咗啲野出黎，善如就話：[姐姐，點解條底褲喺度既?] 之後姐姐笑到死咁濟。

肯定係爸爸凌晨同佢去完toilet既時候，根本就冇穿到條底褲落隻腳到，攪到條底褲攝咗喺件衫入面，真係攪笑，好彩善如今日唔係上體育堂，如果唔係跳跳吓，肯定跳咗條底褲落黎，真係笑鬼死呀!  其實都係爸爸論盡，所以先至攪到條底褲攝咗入衫入面，不過都完全明白，啲天氣咁凍，爸爸咁辛苦凌晨四點幾帶善如起身weewee，都應該讚吓既!!

唔記得番Parson Music呀!

今日雖然係1月1號，但係其實都要番Parson Music，真激死，爹D同媽咪都完全唔記得咗善如要番，到下午十二點，爸爸無端端記得：[唔記得咗番Parson Music添。]但係已經太遲了，善如可能唸，呢兩個大頭蝦既爸爸媽媽，真係俾佢地激死!!