笑蛋迎復活

屋企樓下會所今日攪咗個笑蛋迎復活，有攤位遊戲玩，善如玩得好開心。

善如今次同咁大隻白兔仔影相都唔驚。

善如射籃球，三球有兩球中架。

擲彩虹

Creative English Workshop

影埋Miss個樣

今日又要上英文堂，平時冇乜機會入去學校影相，今日可以入去影吓相，見到善如張班相，番到屋企叫佢講番啲同學名出黎，佢都講到喎，不過有啲佢會話，呢個我唔識喎。

出風癩

善如喺星期日夜晚開始無端端成身都係一粒粒野，大家都唔知佢做乜鬼，因為越來越嚴重，到夜晚一點，帶咗佢去將軍澳醫院睇醫生，醫生話佢係風癩，幫佢打咗支針，但係都係冇好轉過，
之後醫生話你可以留喺度等佢地觀察，不過佢只係風癩，應該就冇乜野，所以我地都決定番屋企，不過佢只係俾咗支藥水佢，一啲都止唔到痕，善如成晚都非常之"炆"，又好疲倦，但佢又痕到瞓唔著，爸爸媽媽成晚冇瞓係咁幫佢"抓"，到星期一好彩媽咪咁啱放假，所以帶佢睇皮膚科，都係俾咗藥水佢，話要痕十日八日，媽咪個心唸，唔係掛，痕咁耐，好辛苦喎，之後那晚都係瞓唔到，善如係冇停過咁痕，到下一日媽咪又帶佢去睇番平時睇開個醫生，醫生話佢都幾嚴重，只係食抗敏係止唔到痕，醫生就開咗啲藥水同埋藥膏俾善如，之後善如到星期五先至正式好番，可以番學開生日party.

芭蕾舞裙

媽咪今日同啲同事傾開，話想同善如報芭蕾舞，佢地都好想睇吓善如著芭蕾舞裙既樣，到夜晚媽咪突然間唸起爸爸之前有個friend俾咗兩條芭蕾舞裙俾善如，因為之前覺得天氣太凍，所以唔俾佢著住，但係今晚都係忍唔住，開住暖風機俾佢著，哈哈，不過媽咪覺得條裙唔夠短，似晚裝多啲，不過都好靚。

黃泥涌水塘公園﹑赤柱一日遊

今日二舅父車我地一齊去黃泥涌水塘公園踩水上單車餵魚魚同埋餵龜龜，本來應該有得餵埋鴨鴨既，不過唔知點解唔見哂啲鴨。


善如餵魚魚時都好興奮，仲係咁話叫啲魚魚"唔好搶喇"。



之後去咗赤柱睇吓野，影吓相，善如同表妹玩吹波波玩得好開心。
善如始終都係好驚二舅父，不過已經越來越進步，睇吓下面啲相你地就知道佢有幾驚佢。

同爸爸影相，笑得好鬼甜!

之後二舅父一企埋黎，佢就即刻變樣。














二舅父抱埋瑤瑤過黎，佢又笑番哂!














好彩最後都肯同二舅父單獨影相，雖然個笑容牽強少少，都好過冇呀!

學校旅行 - 馬鞍山公園 (2)

今次學校旅行有個親子旅行攝影比賽，有兩個參賽項目，一項係最佳笑容獎以及最溫馨感人獎。

其實都幾難揾，不過冇所謂啦，最緊要係參與啫。













呢張就係唸住用黎參賽既最佳笑容獎














而呢張就係最溫馨感人。

學校旅行 - 馬鞍山公園 (1)

今日係善如既學校旅行，去一個爸爸媽媽都未去過既地方 - 馬鞍山公園，那裏有迷宮，雕像，同埋有好多草地可以俾佢地玩，善如都玩得好開心。














見到媽咪既friend個仔"立一"，媽咪叫善如坐埋去佢地影相，佢竟然好開心好樂意，仲請人飲維他奶添，反而立一就怕怕醜醜咁成日想行開。














善如飲野個樣好得意呀!

呢個就係海豚雕像喇

玩完遊戲要去老師到拿禮物














媽咪同善如玩得幾開心!














善如攬住同學仔影相 (善如係大舊過人一些喎)!!



玩集體遊戲，善如都好投入架














呢個盈盈不嬲都好怕醜，不過今日佢爹D媽咪喺度，佢就即刻生猛哂，佢仲無端端攬住善如攪到佢不知所措添。



之後善如同盈盈玩捉黎捉去，之後善如突然間俾盈盈捉住，佢即刻又唔知點做，俾佢激死!

唱歌 - 落大雨

呢首歌應該係媽咪讀幼稚園既時候教既，媽咪竟然仲記得，就教咗善如，啲字咁難記佢都記到，真係叻喇!
其實個歌名係咪叫落大雨都唔知，當係啦。

落大雨啦，雞仔貪玩，冷到傷風真真慘，乞嗤，excuse me
論盡鴨仔擔咗花灑，論盡散開小雨傘
魚仔貪玩，蝦仔貪玩 ，青蛙水中跳低欄，遇著母雞今天生蛋，五隻雞仔通處逛。

約咗爸爸friend食飯

今晚約咗爸爸既friend食飯，多一個小朋友同佢玩，都係影唔到一張三個小朋友都望鏡頭既相，激死!

英文班

今日善如同爸爸接完媽咪放工，就去咗飲茶，之後帶咗善如番學校第一次既英文班，佢見番啲同學仔好開心，仲逐個介紹俾爸爸媽媽識添，佢都玩得好開心，接佢放學既時候，專登錄低咗佢。

喺學校門口見到善如張相，係新年既時候影既。

第一次俾老師投訴

剛剛學校評估先至話善如好守紀律，都話唔讚得咁多架啦，媽咪今日第一次收到老師寫既紙仔，話善如走到電腦處隨處亂按電腦，之後善如喊，我問工人姐姐番到屋企既時候，善如係咪喊緊，佢話唔係，即係可能喊一陣啫。 其實小朋友有時百厭吓都幾可愛呀!! :p

終於有覺好瞓

講番上次善如嚇親，攪到好多日無覺好瞓，其實食咗珍珠末都冇乜用，佢都係咁，不過直到佢上星期病咗，食咗藥，可能因為太疲倦，所以先至冇扭計，但因為佢唔舒服，爸爸媽媽都係一樣冇覺好瞓，不過呢兩日突然又乖番，肯自己同姐姐瞓，終於爸爸媽媽都有覺好瞓咗兩三日。

前幾日媽咪陪善如瞓既時候，瞓瞓吓佢突然間起身，好慘咁望住媽咪話:[媽咪，我有眼淚呀?]
媽咪:[你點解有眼淚既?]
善如:[因為我喊囉?]
媽咪:[你做乜野喊呀?]
善如:[我唔開心呀?]
媽咪:[點解唔開心呀?]
善如:[因為要瞓覺囉?]
媽咪唸住趁機問吓佢點解瞓覺成日扭計:[瞓覺點解會唔開心呀?你瞓覺見到啲乜野呀?]
善如:[我見到甴曱呀?]
媽咪:[你見到甴曱呀?? 佢地做乜野呀?]
善如:[佢地咬我隻腳呀?]
媽咪:[唔使驚架，如果你有沖涼呢，啲甴曱就唔會咬你架喇!]
善如:[哦。]

媽咪:[乖，你繼續瞓啦，唔使驚架，媽咪喺度。]

善如:[知道。]

認字

最近教善如啲中文字，佢都好快認得，教識佢之後，而家喺街或者餐廳見到啲字，佢都會自己講出黎，好叻叻呀!

暫時教咗佢以下既字，佢都認到。
人﹑手﹑口﹑上﹑下﹑大﹑小﹑一

著媽咪對鞋

究竟係咪每個小朋友都鐘意攞媽咪對鞋著呢? 善如就經歷咗喇，佢覺得好好玩，著住媽咪對鞋行黎行去，好鬼驚佢跌親呀。

邏輯篇

善如而家講野好有邏輯，聽佢講野真係好鬼得意。


唔知點解最近善如唔係好肯俾丈丈抱，

今晚媽咪同善如講: [善如呀，你要俾丈丈抱喎，其實好多人都抱得你架，唔一定剩係爸爸媽媽架。]

善如答:[係呀，丈丈可以抱我啦，姨媽媽啦，爸爸啦..]

媽咪:[咁大舅父得唔得呀?]

善如答:[得架。]

媽咪:[咁二舅父呢?]

善如唸咗一陣，(因為佢不嬲都好驚二舅父，唔係好想俾佢抱)，不過佢都答:[得架。]

媽咪:[咁細表哥呢?]

善如:[唔得架。]

媽咪:[咁公公婆婆呢?]

善如:[可以架。]

媽咪:[咁表姐呢?]

善如:[唔得架。]

媽咪:[咁表妹呢?]

善如:[都唔得架。]

媽咪:[點解細表哥，表姐同埋表妹都唔可以抱善如既?]

善如:[因為我會跌架。]



叻叻，佢真係識分邊個抱倒邊個抱唔到佢喎。

__________________________



上星期五，媽咪夜晚放工番黎見善如喺咁咳，就問佢:[你做乜野會咳架。]

善如:[我病囉。]

媽咪:[點解無端端會病架??]

善如:[我俾人傳染囉?]

媽咪:[你俾邊個傳染呀?]

善如:[我俾彤彤(同學仔個名)傳染呀。]

睇醫生

今日全日都冇乜出過街，本來唸住同表哥表姐去打一陣籃球，但係無端端落雨，所以冇得去，之後就同善如睇醫生，成日就喺屋企瞓覺，善如反反覆覆咁發燒，但唔知點解，雖然佢食咗藥，但佢又唔係好肯瞓。

婆婆Happy Birthday!!

今日婆婆生日出咗APM食飯，善如今日心情幾好，又俾人抱，又肯講野。 不過佢今日咳得好犀利，點知夜晚番到屋企就發燒，攪到爹D媽咪成晚冇瞓添。

Buffet

有四張自助餐既coupon，姨丈丈放假早啲帶善如出去尖沙咀食先，雖然間buffet真係麻麻地，好彩唔使錢啫，不過善如好開胃，飲咗好多湯同埋食咗好多菜，