Halloween

今晚Halloween，同善如去咗食韓國燒烤，因為差唔多九點先至食，所以善如好肚餓，佢食咗好多野，真係唔變肥豬都唔得呀。

善如今日剪頭髮都好定架。

同嫲嫲和太嫲去維園

今日同嫲嫲同太嫲去銅鑼灣飲茶茶，之後又去咗維園打鞦韆，善如今次玩得好開心，仲可以玩得比上次高啲添。

工人姐姐生日快樂

工人姐姐今日生日，爹D媽咪買咗個蛋糕同佢慶祝，最開心就梗係善如啦，因為佢又可以唱生日歌同埋吹蠟燭。

維園打鞦韆

難得焯垣同善如玩得咁開心，所以專登帶佢地去維園玩一陣。善如今次係第一次坐鞦韆，佢好似好鐘意咁，但灼垣哥哥就唔係好鐘意坐。

新都城睇馬馬

今日去咗新都城睇馬馬，善如唔敢掂，剩係夠膽望。

帶佢去睇烏龜，有個男仔無端端衝埋黎捉住善如件衫領，我地仲以為佢捉住佢條頸，嚇到爹D 即刻扯開個細路仔，爹D隻手仲比個細路抓損咗添呀，之後善如只係識得行埋黎爹D到，今次佢就冇喊，但係都係唔識反抗。

善如打保齡球

善如咁細個就識打保齡球?? 係呀，不過係打機啫。

工人姐姐

學校要求我地喺屋企每日都要幫小朋友探熱，每朝早工人姐姐幫善如探完熱之後，就會寫個溫度喺張學校預備既紙到，之後佢就要俾我地簽名確認，先至可以交俾老師。尋日工人姐姐因為唔記得咗俾我地簽名，佢就自己簽，其實我地已經好嬲，但我都係唸住佢簽自己個名啫，原來佢仲要係簽我個名，嬲到我地死。番到屋企問佢:[點解你要簽太太個名?] 佢仲要答我:[太太，咁唔通唔使填咩?] 真係俾佢激死。我相信大家都明白，其實呢件係好少事，但係佢個concept唔得，點解可以隨便簽我個名架，佢仲要唔覺得自己有錯，真係激鬼死我呀。

就係因為夜晚閙完個工人，所以瞓得唔係咁好，所以五點幾就醒咗， 唸住入房睇吓善如，之後我一打開門，竟然見到個工人坐咗喺自己將床到，開住盞燈玩電腦，仲要見到善如開咗一半眼，叫我媽媽，我真係激到死咁濟，問個工人點解會有部notebook，又話人地送，遲啲會俾佢自己個家姐玩，問佢用咗幾耐，就話大約兩三個星期前開始用，一個星期用三次到，每次都係呢個時間用。 我問佢你知唔知咁樣會攪到善如瞓覺瞓得唔好(因為佢同善如張床係平排咁濟)，我話你個電腦啲光閃吓閃吓咁，善如瞓瞓吓覺醒咗見到會好驚喎，我終於知道點解善如上一排會唔肯同姐姐瞓，寧願瞓聽，我真係覺得善如好慘，一個星期兩三次都冇覺好瞓，仲要之前我已經係咁問個工人，你喺床有冇做過啲乜，點解善如咁驚，佢仲要死都答我冇，而家終於水落石出。

喺呢件事到我唸番起善如好叻，其實佢有任何唔對勁既野，佢會用盡佢既方法話俾爹D媽咪聽，所以善如唔肯同姐姐瞓，唔肯入房瞓，寧願瞓地下係有佢既原因既，佢扭咗咁耐計，都係要話俾我地聽佢瞓得唔好，同埋可能真係驚。所以忠告大家，有時小朋友做咗啲野出黎，可能真係有佢既原因架，好彩今次媽咪知道咗，如果唔係，善如晚晚都瞓得唔好，但我地又唔知，真係慘呀。

唱歌

又有新歌聽喇

快樂笑笑

快樂笑笑，快樂笑笑，每個小孩快樂笑，

HaHaHaHa, HoHoHoHo, HeHeHeHe, 快樂笑。

我的身體

我有一雙小眼睛呀，我有一雙小眼睛呀，眨一眨，眨一眨多明亮。

搭校車

善如而家喺搭校車好開心，每次喺屋企樓下等車既時候都好乖，一見到架車就好開心，仲喺咁同我地講拜拜同埋話自己叻叻添。

善如畫畫...好得意呀

今日爸爸教善如畫畫，爸爸叫佢畫個大圓圈，之後大圓圈入面畫隻眼，佢真係識得畫兩個圓圈，然後爸爸叫佢畫眼珠，佢就畫多兩個圓圈喺隻眼入面，(爸爸就教佢填黑隻眼珠)，再畫nose, 佢就畫一點係中間，之後再畫口口，佢就畫一條線，畫埋耳仔，同埋頭髮，佢全部都識得每個位喺邊度，之後爸爸就叫佢畫多一次，佢已經可以畫到個成個公仔形出黎，呢張就係佢畫既公仔喇，勁得意呀!

媽咪番到黎，叫善如畫多一次俾媽咪睇，你地睇吓個video，佢真係畫倒喎，真係開心死爹Ｄ媽咪呀。

唱歌

爹D媽咪最鐘意都係聽善如唱歌，好鬼可愛架。

滑梯

善如最近好鐘意喺樓下公園玩滑梯。

扭計

善如呢個星期扭計扭到暈，朝早又唔肯起身番學，唔肯刷牙，抱佢又唔得，一時又要爸爸媽媽企喺度，一時又要我地坐喺度，到坐喺度佢又要我地企喺度，佢一喊就喊足一個鐘，俾乜佢都唔制，又無端端要放個枕頭喺地下瞓，夜晚又唔肯喺自己房同工人瞓，零晨四點幾就醒咗喊到成層樓都聽到咁濟，又唔知佢係驚定係乜，有一晚因為成晚都冇瞓過咁濟，朝早就唔肯番學，話好眼瞓，其實佢搭校車就已經冇咁驚喇，都唔知佢做乜鬼，爹D媽咪想唸出原因，專登等佢冇咁扭計既時候就問吓佢學校既野，佢又答得好開心，唔會驚番學或者老師，所以都唔知佢做乜鬼。又唸吓佢係咪驚喺間房瞓，因為成日要爹D媽咪陪住佢，佢先至肯，又再唸吓佢係咪驚工人，點解無端端唔同佢瞓，係咪工人對佢唔好，乜都唸過都唸唔到。學校都打埋去了，都係冇乜特別野發生，都唔知佢攪乜鬼。 所以爸爸就用強硬既方法對佢，大聲啲話佢，佢一時就聽一時就唔聽。

爹D媽咪好耐都冇覺好瞓喇，善如你乖啲啦! 唔好扭計啦。

海灘游水

今晚媽咪要去飲，之後梗係同善如玩吓先啦，見過天氣唔係好熱，又驚遲啲凍去唔到海灘游水，所以帶咗佢去游，佢初頭竟然驚啲沙，之後就冇咁驚喇，仲好似唔係好捨得走添。

山頂賞月

中秋節喺婆婆屋企食完團圓飯，二舅父車咗我地上山頂賞月，善如望住天空既月光同埋星星好開心，成日喺度唱歌。臨走善如啱啱瞓著咗，點知我地一講話去食雪糕，佢就成個彈起話又要食，俾佢激死。

楊紫瓊個立像真係好鬼似，善如同埋表妹瑤瑤兩個都皺哂眉頭望到實，可能佢地唸緊佢究竟係真定係假。成龍個立像聽講都好似，不過唔俾入去睇，爹D媽咪近視睇唔清楚。

你"喞"我啦

一路以黎善如都唔俾爹D喞媽咪，或者媽咪喞爹D，因為爹D媽咪每次都俾人喞到笑到好辛苦咁，善如可能覺得我地好辛苦，所以每次佢見到都會用手阻止，同埋會講：[唔好呀!唔好呀!] 佢好似好驚我地俾對方恰咁。今晚善如仲攪笑，我地喺張床到扮玩緊喞，善如初頭都係同平時一樣咁阻止，不過今次好攪笑地加多咗一句:[唔好呀!唔好呀! <然後自己瞓低喺張床到講>你喞我啦，你喞BB啦。]

彈波波

姨媽媽送咗個著燈既彈波波俾善如，佢成日攞黎玩，佢彈得好鬼得意。