媽咪唔舒服

媽咪係咁流鼻水同埋咳，休息咗兩三日，啲藥又唔可以食得重，所以好辛苦。善如知道媽咪唔舒服，冇點嘈住媽咪，只係有入房幫媽咪蓋被，真的很乖。

Show and Tell

今期善如既SHOW AND TELL內容係幫助別人的人，今次佢又話好細聲，同埋冇乜信心，都唔知幾時佢先至肯大擔啲，ANYWAY，佢都係k2啫，慢慢來啦。不過係驚考小學既時候，善如乜都唔肯講啫。

翠華豬扒包

今日去咗尖咀食翠華豬扒包，YUMMY YUMMY!

天文台開放日

善如去到天文台，扮電視天氣節目小姐，好靚女，好可愛呀!

其實呢次天文台開放日，好似冇乜野睇，又要排隊又要行斜路，攪到媽咪好似狀態唔係咁好，唔係好舒服，所以要坐一陣抖吓，等爸爸帶善如周圍睇。

寶康公園

善如同瑤瑤表妹去公園玩，非常之開心，玩到兩個都冇瞓晏覺，不過唔緊要啦，難得佢地玩得咁開心，瞓少一日囉。

游水堂

因為善如有時唔肯去游水，話個潛水鏡入水，隻眼好痛，上星期爸爸媽咪決定買個新鏡俾佢，今日帶個新潛水鏡上堂，佢話真係冇入水，仲好開心添，之後爸爸偷偷拍咗條片添。

食雪糕

善如在樓下食雪糕時，見到Emily，佢地好開心，玩轉哂成個雪糕屋，又跑來跑去，又要人整汽球俾佢地玩。

川川生日會

爸爸行完環保行，就join我地一齊去川川生日會。

環保行

嘩! 啲路咁崎嶇不平，因為之前落雨，地下仲有少許滑添，真係要好小心行先得呀!

爸爸今日冇番教會，因為參加咗長春社安排既環保行，因為要行成三個鐘，媽咪大肚實行唔到，唔可以一齊去參加添，所以爸爸自己去。

真道簡介會

今日爸爸媽媽去咗聽真道簡介會，覺得學校管理很差，老師完全冇合作性，再加上校長及一些高級的consultant都相繼離職，我相信學校都係有啲問題。

這間學校係活動教學，由小學到中學係一條龍學校，小學到中學時沒有參加大抽獎，佢地有三分一學生係行IB課程，普通學校小學至中學是十二年，真道係會俾人讀少一年，得十一年。我覺得真的很不適合，不過都會申請等善如學習一吓interview。

打筋斗

今日善如在家打筋斗，佢肥肥地好輪盡，媽咪都估唔到佢會打到呀。

二姑丈突然去世!

今日真的非常之唔開心，因為善如既二姑丈突然去世了，只不過四十幾歲就離開了呢個世界，雖然已經成事實，但所有親友都真的很難接受，希望二姑媽能夠勇敢去面對，去照顧自己及她的仔仔。 我地會為你們祈禱的!

經過呢件事，更加令我們體會到，要珍惜身邊人，幸福真的唔係必然既，無論你係貧窮或富有，只要可以健健康康﹑開開心心咁生活在呢個世界上，係一件非常感恩既事! 今日唔知明天發生什麼事，要令自己每日都過得很充實，很有意義。

希望二姑丈在天國能夠開開心心，快快樂樂!

照結構

今日媽咪去咗廣華照結構，醫生話小龍女冇問題，所有器官都齊全，不過只係照了十分鐘，好似快咗啲，因為私家好似話有時要照成個幾鐘的。 不過點都好，聽到小龍女健康冇事，就行了。

生活

呢排媽咪好努力要善如獨立啲，叫姐姐唔准再幫佢去toilet同埋刷牙洗面，而家進步咗好多，已經快了，雖然善如話俾爸爸媽媽知，佢在學校都係最慢那個，不過媽咪同爸爸都俾多啲支持佢，希望佢可以越來越好。

因為善如番下午班，其實善如可以有時間自己學著衫著鞋，媽咪已經叮囑工人姐姐預多些時間唔好幫佢著襪同鞋，等佢自己試吓，希望工人姐姐幫吓手教啦，因為媽咪喺webcam成日見到工人姐姐幫佢著，因為佢費事煩，唉，如果工人姐姐唔幫手教佢，佢好難學既。

因為之前老師家長日講過，善如太過姿姿柔柔，所以要俾多啲野佢做，等佢冇時停，俾佢落去跑步又好，搵多啲野俾佢做吓，因為老師覺得佢唔夠interest in learning。所以，媽咪呢排在早上叫工人姐姐俾多啲野佢做，唔好成日喺屋企冇野做，一係俾enopi 佢做吓，一係俾手工佢做吓，等佢唔可以在屋企游手好閒，可以積極啲。媽咪覺得好似善如進步咗，希望真係幫到佢啦。

喺功課方面，善如呢排又突然間積極咗好多，爸爸媽媽番到黎佢已經做哂功課，媽咪仲獎佢睇電視添。食完飯之後，沖可以有時間同佢溫吓書，佢有好開心好想默，成日叫媽咪同佢默多啲添，希望持續都係咁啦。

善如病了!

因為之前爸爸病，但係佢地竟然一齊飲一支荳漿，攪到善如今日係咁流鼻水，陰公，睇到佢個樣就可憐了，啲鼻水係咁流，隻眼紅哂。

爸爸好後悔，攪到善如咁樣，下次睇吓仲敢唔敢咁冤氣，病都仲兩個人飲一支荳漿。

廸士尼入場卷

今日媽媽知道公司會派兩張廸士尼入場卷，番到屋企，媽咪同爸爸專登問善如，去廸士尼玩好唔好，佢聽到超開心。
媽咪：[我地得兩張入場卷，咁邊個去好呀?]
善如唸咗一陣就話：[咁爸爸同媽媽去啦!]
媽咪：[咁你呢?]
善如：[我同Biscuit (即刻佢既至愛玩具狗)喺屋企玩囉!]
媽咪：[咁你唔想去咩?]
善如：[想呀，不過冇辨法啦，得兩張飛。]
媽咪：[如果你乖既，不如媽咪買多張飛俾你一齊去啦，好嗎?]
善如：[好呀!]

善如真係好乖，知道得兩張飛話自己唔去，佢真係好生性。不過爸爸媽媽又點捨得唔帶你去呢!

番教會

善如都已經習慣咗返教會既生活，返完教會我地去咗食飯，食飯之前善如仲要求我地祈禱添，哈哈，真係會俾佢感染架。

好忙呀!

最近媽咪很忙呀，善如今年要選小學了，很多開放日﹑簡介會要去聽，又要搜集資料究竟邊間小學好，媽咪又要預備生小龍女，又要轉工人，今年媽咪真的很忙碌呀! 不過，為咗善如同小龍女什麼都值得既，只希望樣樣都可以順順利利。

好開心，今日剛剛收到agent電話，佢幫我找到一個在香港做咗八年，每個家庭做咗四年，由new born 開始揍到四歲，有一個家庭仲係twins來的，有個咁好既梗係即刻要咗佢啦，雖然工人姐姐已經番咗印尼，所以冇得試工，但係佢之前兩個僱主都肯續佢約，應該都唔差得去邊既，真的感謝神，為我地既安排。希望好事繼續來啦。

渠務署開放日

今日係渠務署開放日，我地去咗參觀吓，其實就唔係好多野睇，不過有啲攤位遊戲俾善如玩，佢已經好開心。