賴尿尿

今日去咗姨丈丈舖頭剪頭髮，發生咗件尷尬事，因為而家善如已經喺呢一個月冇著片出街，一路都未試過喺街賴尿 ，點知今日好失禮咁喺姨丈丈舖頭賴咗，之後仲要攪到善如要除哂條襪褲喺度洗腳添，真係難為情呀。

夜晚同佢去食飯，喺條街到見到有人推住架百佳車，善如好奇怪咁望，之後媽咪問善如，呢架車喺邊度有架，佢識得答:[百佳超級市場。]

善如病了

今日發覺善如流鼻水，夜晚爸爸番到屋企帶佢去睇醫生，而家善如食藥已經好叻架，估唔到佢咁細個肯咁樣食藥水，話就話啲藥甜啫，其實點樣都好，藥水啲味都係怪怪地既，佢肯咁樣食，真係要俾個叻叻佢。

相片集(2)

相片集 (1)

最近個friend俾番幫善如影既相我地。

學校的勞作

大家欣賞一吓善如做啲勞作呀!!

飲茶茶

今日約咗爸爸啲friend去APM飲茶，Tina姨姨真係好鬼客氣，送咗對Crocs俾善如，但係善如好鬼怕醜，唔肯講多謝，之後其他姨姨買糖俾佢食，佢都唔係好肯講野，真係俾佢激死呀。

踏單車

善如而家好鐘意踩單車，因為佢識得轉左轉右，不過都係未識踩，佢隻腳郁吓郁吓就當係佢自己踩，其實只不過係我地推佢。

今日好忙呀

今朝帶咗善如去麥當勞食黑椒雞扒通粉，佢差唔多成碗食哂，之後搭車去咗新世紀廣場買衫俾佢，行咗一陣就要瞓覺，不過今次要媽咪抱，我地去大家樂食個下午茶餐，順便坐吓，媽咪就一路抱住佢，佢個衰豬唔肯俾媽咪抱佢低啲，一放低佢就喊，要媽咪抱高啲佢，攪到媽咪食唔到野要爸爸餵同埋隻手好鬼痛，抱咗一陣都係頂唔順，因為佢真係好重，成36磅喇，之後都係俾番爸爸，唉，真係唔知平時爸爸點抱佢咁耐架。

臨走買咗個牛角酥俾佢食，佢自己攞住黎咬咗兩啖，好開心咁跳跳吓，個包就跌咗落地，之後佢喊住話要食地下個包，我地話好dirty喇，我地買個第二個俾你啦，要氹咗好耐先至肯行去買第二個，真係俾佢激死呀。


今日荷里活廣場有個貓展，帶咗善如去睇，佢好鬼緊張，一去到即刻要爸爸抱高佢睇，佢見到啲貓貓又驚但係又好想摸，所以就俾佢摸吓，今次係佢第一次摸真貓貓咋。

之後去咗丈丈舖頭洗頭，同佢地去咗食韓國燒烤，善如又食咗好多野，食咗好多條腸仔，西瓜，飲咗成杯豆漿，之後佢個肚腩突咗出黎，我地覺得佢都好似唔係好知飽。


攪到成十一點先至搭港鐵，行緊去港鐵站既時候，佢已經好想瞓，你地睇吓佢個樣，真係爛瞓豬黎架!

迪士尼

二舅父無端端有平飛去迪士尼，咁我地就要咗佢啦，因為一買要買三張，所以就帶埋工人幫手攞野啦，我地都估到善如會驚啲卡通人物架喇! 不過唸住唔緊要啦，帶吓佢黎玩吓啦!

入到去巴斯光年玩槍槍驚到死，四周圍望，但係起碼冇喊。

帶住副3D眼鏡入去睇音樂劇唸住好啲，因為佢等既時候係咁玩副眼鏡，但係因為可能又黑又大聲，一開始聽到有聲佢就喊，好大聲咁話:[我要出去呀，我要去v v 呀!] 之後全場喺度笑，咁爸爸就即刻抱咗佢出去喇，費事嘈住人。

當到大約五點幾時，善如好似開始有些少眼瞓，咁我地唸起入迪士尼時有幾架BB車放哂喺度，我地以為佢好似啲商場咁，俾你地借BB車，唔使你帶黎咁煩，咁我地就唸不如俾善如試吓肯唔肯喺BB車都瞓啦，之後就去攞咗其中一架車黎俾善如坐，媽咪見到有啲人啲BB車有個名，媽咪就唸可能啲人驚唔認得架車，所以先寫名落去，唸住費事寫啦，睇吓善如肯唔肯先啦，點知善如真係肯坐喎，仲即刻合埋眼想瞓添，點知爸爸推唔夠一分鐘，發覺架車左邊個轆係轉唔到彎既，所以唸住去番入口度換過架，之後去到見到有職員，索性問佢喇，點知佢問我地架車喺邊度攞，我地話就喺呢度攞咋，然後個職員就好惡咁問:[架車冇寫名既?? 租車要俾錢架喎，你地唔可以就咁攞黎用架，你攞咗架車周圍行，啲保安見到你會捉你架。] 我地話係咩，仲以為你地就咁擺哂啲BB車喺門口，以為可以俾我地用添，咁我地唸都就黎走啦，無理由而家先至租架，好唔抵喎，之後我地就即刻抱番善如起身走啦，善如就冇得瞓lu。

一字馬

小朋友啲骨就係咁軟架喇，你地睇吓善如玩一字馬向前向後執野都易如反掌。

扮醫生

善如好鐘意扮醫生幫我地探熱同埋聽心跳，佢好鬼攪笑呀。

九華徑燒烤

今日一早成家人去飲茶，喺屋企打完麻雀之後夜晚就去咗九華徑燒野食，幫大表哥同埋表姐慶祝生日，我地仲買咗個好好味既魔鬼蛋糕去食添。

善如自從去完西貢燒野食有咗經驗之後，佢而家見到啲火都唔會行咁埋，因為佢知道會好熱同危險。

放完聖誕假要番學lu

啱啱放完個長聖誕假，善如尋日第一日返學，媽咪呢兩朝早送佢返學既時候，已經覺得佢好似怪怪地，見到同學仔好似好陌生咁，唔肯同啲同學仔打招呼，但好彩都肯笑住上校車。

今日爹D收到學校關老師既電話，話善如呢兩日喺學校唔係好肯玩，要老師氹佢一陣，佢先至肯，同埋佢個樣好似好委屈咁，想喊想喊咁。 仲有呢幾晚佢都要同爸爸媽媽瞓，希望善如只不過係扭吓計啫，唔好又係工人夜晚喺間房唔知攪乜啦，不過今次醒目會睇實佢多啲喇!

卡啦OK

善如好耐之前去過卡拉OK，今日帶咗佢去順便食過K Lunch，佢好鬼怕醜，成日唱唱吓知道我錄佢，佢就好細聲咁唱。

同大表哥踢波波

尋晚善如冇端端話要入黎我地間房瞓，我地唸住等佢瞓著咗就抱佢返入細房瞓啦，之後佢成晚都隔一陣就起身喊，唔知佢攪乜鬼，攪到我地三個都冇覺好瞓。

等埋媽咪收工，我地又去咗花卉燒野食，今次帶埋姨媽媽同大表哥去，初頭善如都係一見到表哥就驚，唔肯望佢，之後表哥同佢踢波同埋玩怕羞草，佢就好開心，仲肯拖住表哥行到好遠添。

又帶埋支吹波波槍去玩

今次有條滑梯玩，善如玩咗好多次呀!

我地由下晝一點幾燒到五點幾，之後仲約埋公公婆婆同埋大舅父一家去咗打冷添! 不過善如因為開心得制，由九點幾起咗身之後都未瞓過覺，最後仲喺食野度扭計喊，一時又話要去燒野食，一時又話要去睇魚魚，佢冇乜食野，之後就俾佢瞓咗一陣，點知返到屋企沖涼之後，佢又好精神咁喺度玩，俾佢激死呀!

飲茶茶

今早約咗姨媽媽同埋公公婆婆飲茶，下晝善如就返屋企同姐姐瞓覺，爹D媽咪去睇"十月圍城"，夜晚就同埋姨媽媽一家去咗佐敦打邊爐。