BB 好眼瞓

昨晚爹D媽咪好夜先至出街，攪到好夜，BB挨咗好耐，終於頂唔住要瞓，但係佢知道媽咪錄緊佢，又引唔住笑，但係又唔想開眼。

終於今日都冇睇到醫生，因為唔係那個醫生註診，所以唔想睇。爹D今日要溫書，媽咪同屋企人Family Day，今次冇咁驚細舅父，但係見到公公都係唔俾抱，真係俾佢激死。

開懷大笑

善如開懷大笑既時候，爹Ｄ媽咪就最鐘意見到，無論爹Ｄ媽咪有乜野唔開心都好，一見到善如呢個天真，開懷既樣，真係乜都唔記得哂lu，希望BB永遠都開心快樂。

Koala

善如都認得哂呢張poster既字，但係佢唔會肯一次過答哂你，所以好難錄，佢有時好古惑，識都唔指俾你睇，只係望住，但係最攪笑都係有一次問佢邊到有Koala，你地睇吓就知道佢點答我。

No No No

善如而家玩乜都好投入，玩No No No，差啲跌低，好彩爹Ｄ捉住佢，真係俾佢嚇死。

放對手喺後面

善如突然間放對手喺後面，好似扮先生咁。

Turn Around

善如最近鐘意玩turn around，佢坐喺度又得，企喺度又得，幾叻呀。

仲未好番

善如已經咳咗好耐喇，轉過三次醫生，都唔好，佢啲啖仲係好勁，上次過醫生話佢都幾嚴重，條氣唔係好順，仲嚇我地話佢咳得太耐，好容易變哮喘添。 公公婆婆都好緊張，成日打黎問候阿B，BB其實係啲啖未清，但係好多，佢又唔識吐出黎，婆婆話不如同佢扣喉，唉，媽咪都係唔係好敢呀，聽日唸住帶佢去睇第四個醫生睇吓會唔會好啲啦。

玩得好開心

而家善如雖然大個咗啲，但係爹D都仲可以引到佢笑到咯咯聲呀。同埋佢開始成日跟我地啲動作，佢都跟得好似架。

BB 咳

善如呢幾日咳，夜晚瞓覺咳到嘔，攪到張床單都濕哂，初頭食咗兩日藥，睇媽咪公司啲醫生都係唔掂，所以爹D都係帶咗阿B去銅鑼灣睇醫生，要成$280，不過都冇辨法啦，其實呢兩日佢啲啖都咳得出黎，不過因為佢唔識吐出黎，所以就難啲好番。

詐喊

善如扭計詐喊，話爸爸攞咗佢個玩具，但係之後又想笑，俾佢激死。

用匙匙學食野

BB學緊用匙匙食野，有時攪到一地都係，但係都冇辨法啦，不過都好叻架啦，佢都可以識得對準個位放落口。而家去親飲茶，佢都好鐘意食腸粉同埋包包，佢可以食好多架。

開生日Party

善如上星期六去咗朋友仔Edward同埋Edwin屋企開生日會，因為佢地係孖仔黎既，媽咪專登揀咗樣玩具可以等佢地兩個一齊可以對玩既，果然佢地兩個都好興奮，就算連唔係主角既朋友仔朗朗都玩得好開心，希望佢地鐘意啦。 善如那日既表現普通啦，都有主動走過去同佢地一齊玩，不過有時佢地玩到好大聲，佢就會有啲驚，之後就走番去爸爸度。

BB 有靚衫著

上星期媽咪又約咗朋友食飯，Irene姨姨送咗套衫俾善如，好靚架，不過唔使問都知道靚啦，點解??，因為係Irene 姨姨揀囉，實靚啦。善如真係一個肥妹仔，件衫同條褲都......唔係好啱著，其實件衫都係有少少緊啫，不過條褲就直頭唔啱 ，不過姨姨好醒目既，當然係有得換啦，我地衫同褲都換大咗一個碼，咁BB就著得舒服啲。 多謝哂Irene姨姨。

呢件就係換咗大一個碼。

有禮物收

上星期媽咪約咗舊同事食飯，Lucia姨姨又送咗玩具俾善如，真係多謝哂呀，你睇吓善如玩得幾開心。

8號風球

今日8號風球唔使番工真係開心，可以陪BB玩同埋update個Blog， 上面張相那條裙仔係Vivian姨姨送架，幾靚呀，多謝哂姨姨。

認字

大家睇吓善如認字，其實都唔知佢係認字定係認圖，不過點都好啦，認到都好開心喇，不過最後錯咗一個，哈哈，BB努力啲呀。

學唱歌

BB聽住音樂學唱歌，佢一聽到"啦啦啦啦啦啦"就唱，佢個樣好似好大個女咁，仲擰埋頭唱添，媽咪揸住部相機笑到陣哂，之後俾BB見到媽咪笑佢，BB仲放電俾媽咪添， 攪到媽咪失哂暈喇。

Eye, toes, leg.....

BB識得聽我地講好多野喇，佢身體各部份既主要器官都識聽，雖然BB未識講，慢慢睇住阿B成長，爹D媽咪都已經好開心。

玩汪汪

姨丈喺玩具反斗城買咗隻搖控汪汪俾善如玩，我地錄低咗善如第一次玩既情況，佢仲拍吓隻汪汪個頭添。而家BB一扭計，我地就攞隻汪汪出黎引佢，次次都成功架，真係多謝姨丈先。

扭扭

表姐表哥送咗個公仔俾善如，善如初頭都真係有啲驚，不過之後就唔怕，仲跟住佢扭扭添，爹D媽咪覺得呢三段都好攪笑，所以三段都擺哂上網，BB仲識得跟住個公仔唱"woo woo woo"。

踢波波

原來BB細個既時候，真係冇分男女，好似有好多男仔都鐘意玩煮飯仔咁，所以唔係只係男仔先至鐘意踢波波架，善如都好鬼鐘意踢波架，每日就要姐姐同佢行黎行去，踢黎踢去，又要幫佢執波，冇番咁上吓精力都唔掂呀。