波波池@冒險樂園

今日番完教會，之後就同善如去咗冒險樂園玩，佢話要玩波波池，就俾佢玩一陣啦，$40 玩20分鐘，點知到夠鐘既時候，個姐姐叫啲小朋友出黎，個個都唔應佢，繼續玩，個姐姐又冇所謂繼續俾佢地玩，點知玩咗成個鐘，善如成身濕哂，爸爸叫佢好多次佢都唔走，因為大舅父要過來接我地走了，所以唔可以再玩，媽媽出馬一叫佢就肯走了，哈哈!

Celebrate Jones and Maggie's Birthday@Irvin Home

善如今日好叻，自己一手一腳好有耐性咁，一粒一粒正方形砌幅圖出黎，真的要好多心機同埋耐性，我地仲驚佢要分幾次先做完，點知佢可以一次過整哂，真叻女!

今日喺屋企同Jones & Nelson哥哥飲茶，玩吓先，之後就車我地去Irvin哥哥屋企，Irvin哥哥自己下廚，真的好味!

今日善如係好大進步呀，我地玩pictionary，佢有份幫爸爸畫，爸爸叫佢畫乜佢就跟住畫，好叻呀，次次畫完我地真係估到係乜野黎架。

善如有個細妹陪佢呀!

今日係2月23號，媽咪終於知道肚裏面既BB係女來的，我地即刻話俾善如聽，佢真係超開心，佢喺咁周圍跳，一路跳一路話：[好野，我有個細妹呀!好野，我有個細妹呀!] 睇到佢咁開心，真係值得為善如生多個小朋友陪佢呀!

起初我地問佢想要細佬定細妹，佢都已經話細妹了，不過那時未照到係仔定女，驚如果係細佬佢唔鐘意，所以就教佢，其實細佬都冇所謂架，佢都好乖，都接受咗就算係細佬都唔緊要。但係其實佢個心都係好鐘意細妹，我地一同佢講佢就開心到跳起，之後佢仲話，如果係細佬，細佬會講極佢都唔聽架，哈哈，真攪笑! 喺佢心目中，男仔係冇咁乖，因為可能我地啲朋友既仔通常都係冇咁乖啦。

其實善如好早就知道媽咪有咗，不過未夠三個月時，我地叫佢要保守秘密，佢真係可以做到，好叻，想講關於BB既，佢會在爸爸媽媽耳邊講，唔會大聲講俾人聽到。

喺呢段日子裏面，媽咪好開心，因為善如知道媽咪有咗BB，好照顧媽咪。
例如：1) 入地鐵會拉媽咪企入啲，唔好撞親。
            2) 媽咪教善如做功課，踎低，佢會話：媽咪你有咗BB唔好踎低，坐喺張椅到啦。
            3) 地下濕會捉實媽咪，話要拖實
            4) 見到前面有人行得埋少少，善如會搵隻手保護住媽咪個肚，然後同媽咪講：[小心前面那人個袋角呀，好尖架!]

仲有好多好多數唔哂，媽咪每次都真的很窩心，很感恩有個咁鍚媽咪既女女，真的覺得自己好幸福!

媽咪生日快樂!

爸爸一早就同媽咪去一風堂食拉麵，真的很好味!

之後，去咗旺角行街，食媽咪最鐘意好耐未食過既豬腸豬紅，仲有生腸，正呀!

夜晚去接善如放學，去咗九龍塘食晚飯。

善如真係好鐘意食肉醬意粉，睇吓佢食到連個碗都想食埋呀!

食飽飽就瞓咗覺

我地叫醒佢，要佢自己行，佢就扭計扭到拆天，唉，小朋友扭眼瞓真係唔野少架，喊到收唔到聲，仲喺地鐵度添，個個都望住，幾驚有人將我地放上You Tube呀。

因為激到媽咪好嬲，爸爸即刻整番呢張相黎氹番媽咪笑!

媽咪最近唔知點解唔係好鐘意食蛋糕，同爸爸講唔使買，所以媽咪都以為冇蛋糕食，點知番到屋企媽咪沖完涼之後，兩父女俾個surprise媽咪，同媽咪唱生日歌，善如仲同番媽媽講對唔住添!

不過，記得上次爸爸生日，我地又係接咗善如放學帶佢食野，食完野後佢全程瞓咗覺，要爸爸由尖咀抱佢番屋企，下次真係要唸清楚放學係咪帶佢出街，因為佢好眼瞓呀，可能都係二人世界好啲，真係唔好搵自己笨呀!

食雞脾

我地今日買咗成隻雞蒸，超好味，媽媽同善如每人一隻雞脾，爸爸同埋工人姐姐每人一隻雞翼，呢隻係超肥美既雞，好多肉好正呀! 善如就最鐘意食雞脾了，佢真係食到好滋味架。

情人節快樂!

爸爸整既情人節咭!

媽媽煎既牛扒

好似好多年既情人節都冇出去食了，因為喺屋企可以同善如一齊，加上有媽咪煎既愛心牛扒，已經好幸福﹑快樂了，祝願每年既情人節大家都可以咁開心﹑快樂。

婆婆65歲生日快樂!

善如送咭咭俾婆婆

善如好早已經整訂張咭送俾婆婆了，佢好期待呀，等咗好耐了。

海港城朱古力展覽

見到同學仔一齊影相

去完派對就去咗海港城既朱古力展覽，善如好鐘意，影咗好多相，到到都話要影。

Owen Birthday Party @ McDonald

今日去咗同學仔既生日派對，善如初頭唔係好肯同人玩汽球，之後就好開心咁玩了。今日佢成日俾個男仔搭住，玩遊戲時仲俾人鼻貼鼻添，爸爸真心痛呀!

放完新年假第一日番學

今日係善如放完新年假第一日番學，佢無端端又提番起話唔想見到張子朗，好驚佢蝦佢，所以唔肯番學，要姐姐講咗好耐先至肯出門口，媽咪決定要打去學校同老師講，老師下一日覆話張子朗唔係坐在她隔離，應該唔會有問題。原來問清楚姐姐，善如係之前坐在她隔離，不是而家，同埋原來張子朗都係在維景灣畔上車，所以在等車既時候已經試過幾次張子朗行過來嚇善如同埋其他小朋友，所以善如咁驚。不過，anyway, 都叫咗老師多加留意，同埋原來校車老師話善如有時搭搭吓校車都會喊，話好掛住爸爸媽媽。

同老師傾咗好耐，媽咪順便問吓善如學校既情況，老師話善如在學校其實都係一個乖既小朋友，佢係去洗手間，同埋寫字特別慢，去toilet次次都係最尾那個，仲要係好遲，所以茶點都食唔切，但係佢做手工就快些，唱歌都冇問題。其實一句講哂，佢鐘意做既就ok，唔鐘意做既就好慢，有時慢到真係要隔離同學幫手做。

因為媽咪有一次接善如放學聽過老師在善如面前話佢，善如個樣好冇信心，好唔開心，同埋有一次同學gathering，睇到善如啲同學望住善如話：[呢個就係成日俾老師話佢唔肯寫字做野好慢的楊善如了。] 爸爸媽媽聽到都好唔開心，唸緊老師係咪日日都閙佢，所以啲同學先至咁講。所以，今日媽咪同老師講驚善如冇哂自信心，可否唔好成日話佢，俾多啲鼓勵佢，老師話其實我地都唔係成日話佢，因為話佢佢都唔會聽，唔會快啲，用什麼方法(貼紙) 引佢佢都係咁慢，所以都冇話佢，老師仲話其實到K3啲節奏仲快，到時更加要跟得切，老師話其實在根德園讀書既學生，我地大部份都train到佢地可以好自動自覺，快快脆脆做功課，學野，(其實亦都係爸爸同媽咪想佢入呢間學校既其中一個原因)，奈何善如不是一個快手的人，爸爸媽媽決定努力啲，由屋企開始，俾多些鼓勵善如，等佢做野可以爽手些，唔好慢吞吞。