約咗灼垣去銅鑼灣

今日約咗灼垣去食晚飯，首先去咗玩具反斗城，爹D媽咪買咗隻薯蛋先生俾佢玩，哈哈，好得意，可以掉亂哂啲眼耳口鼻。一番到屋企就急不及待要拆，不過佢都好乖，肯沖完涼先至玩。

初頭就梗係玩得好開心，之後就開始爭野玩。

去姨媽媽屋企瞓

因為爹D媽咪唸住明天一早去書展買書，所以我地想善如去姨媽媽屋企瞓，等我地方便啲行書展，但係我地都驚善如唔肯，好彩之後姨媽媽同姨丈丈成功用支雪條引到善如去佢地屋企，不過姨媽媽話臨瞓之前，善如都有話好掛住爸爸，之後姨媽媽同善如講瞓醒帶你去搵番爸爸，佢都冇野，攪到成十二點幾先至瞓著覺。

唔使番學lu

今日善如開始放暑假，不過佢好似唔係咁開心，今日媽咪一早帶善如去婆婆到，搭緊港鐵既時候，可能因為善如覺得奇怪，點解唔使搭校車，所以佢就問媽咪：[媽咪，我地而家係咪去搵Teacher呀(佢可能以為今日唔使著校服，所以好似星期六咁去揾學英文個Teacher)，之後媽咪答佢話唔係，之後佢再問：[咁係咪番學校去揾關老師呀??] 媽咪答：[唔係喎，呢段時間都唔使番學喎。] 之後佢即刻dup低個頭好唔開心咁仲有少少扁咀。

好彩爹D媽咪幫佢報咗暑期班，8月中就有得開學，如果唔係，佢肯定成日都好掛住番學呀。

巴斯光年@時代廣場

今日約咗爺爺同埋嫲嫲，去到時代廣場見到好大隻巴斯光年，開心到佢死，仲即刻攞隻細既巴斯光年出黎添。

迦南N1畢業喇!

善如喺迦南幼稚園都已經渡過咗一個年頭，唔計暑期班，今日已經係最後一日番學，其實善如喺呢間學校好開心，識到好多同學仔，放學番黎成日唱老師教佢既歌，同埋成日講啲同學仔既名出黎，其實如果唔係根德園收善如，我地都會繼續俾善如讀呢間學校，老師仲好有心機整咗一本成長日誌俾每一個小朋友，仲有埋畢業證書添。

我的成長


老師的評語都寫得善如好好，又話佢係一個聰明既小孩子，又話佢非常之有興趣喺唱遊活動。

呢張係畢業證書，超得意。

今個學期，善如仲攞咗個紀律獎添。

媽咪同善如講：[你好叻喎，今個學期攞咗個紀律獎。]

善如：[梗係啦，老師話我好乖架，唔會成日同同學傾計呀。]

善如果然知道乜野叫紀律喎，媽咪仲以為佢攞咗乜野獎都唔知添。

呢個係紀律飲食獎狀。

每日食水果既良好習慣

記唔記得之前學校旅行，我地幫善如參加咗個"最溫馨感人獎"同埋"最佳笑容獎"呢，善如最終攞咗最溫馨感人獎呀，仲有份小禮物送俾我地添。

笑話一則

善如啲頭髮拮眼，所以要去姨丈丈到剪頭髮，姨丈丈問善如：[你想剪乜野型呀?]

善如竟然答：[我想剪長方型。] 哈哈，笑死人呀!!

剪完頭髮之後我地就再問佢：[咁下次想剪乜野型呀?] 善如話：[不如剪Circle呀?]

唱歌仔

今日善如好好心情，唱咗好多首歌俾爹D媽咪聽。

清水灣海灘

今日應承咗善如去海灘玩，爸爸媽媽當然唔會選擇最熱既時候去啦，如果唔係就曬死喇，我地差唔到五點先至去到海灘，玩到成七點鐘，其實善如都好似唔係好夠喉咁，不過冇法啦，天都黑喇，加上開始有啲凍，所以一定要走喇，善如臨走仲食咗差唔多兩隻雞脾添呀。你地睇吓佢個樣幾為食呀!

又要請過個工人姐姐

呢個工人姐姐真係好唔掂，黎到先至話唔識照顧小朋友，但係個Portfolio又寫咗有經驗，仲要一啲愛心都冇，婆婆都頂唔住話要炒佢，所以而家又等緊第二個工人黎睇善如，希望下次呢個好啲啦，呢兩個月又要勞煩婆婆揍善如了，辛苦哂。

幫同學拉椅子

善如今日番到學校，我地見到佢幫同學拉椅子，然後自己先至拉第二張椅子坐，好乖既妹妹!!



善如一放學出黎，因為爸爸去咗排隊接佢，所以媽咪就喺塊玻璃到望吓佢先，點知佢係咁講野，大家睇唔睇到佢想講乜野呀? 佢問爸爸喺邊度呀?? 個衰豬見少一陣爸爸都唔得架!!

之後見到爸爸就好開心，仲同爸爸做鬼臉添。

食藥

善如又病喇，善如之前食藥都好乖，而家大個咗反而仲唔聽話，成日要人氹，真係俾佢激死呀，有時食之前仲會扮過曳豬樣先至食添。

唱歌歌

我地等緊巴士既時候，善如突然係咁唱歌，所以我地即刻錄咗佢。

照顧同學仔

今日爸爸媽媽喺學校門口接善如放學見到啲好得意既野，就係善如拖住茵穎出黎，仲幫佢攞住個袋添，之後啲姐姐就將茵穎個袋俾番茵穎攞，隔一陣我地就見到善如好照顧佢，善如見佢擺隻手喺個口，佢又幫佢拿開，就連老師叫佢個名佢都聽唔到，要姐姐叫先至知道，不過佢個樣好得意呀，睇到善如突然間咁識得照顧人，爹D媽咪真係好開心呀，唔知幾時佢先至識得照顧埋我地呢!

新世紀廣場 & APM

今日去咗新世紀同埋APM行街，善如初頭紮咗條賓辮，之後佢自己就除咗，所以令到啲頭髮
鬈哂，好靚女呀，那日特別多人讚佢靚女同埋撩佢玩呀。