Step in Step Out 轉個圈

善如喺Parson Music學咗一首歌係要跟住啲拍子黎跳舞既，Step in Step Out 然後轉個圈，哈哈，同爸爸好合拍喎，臨尾仲鞠埋躬添。

Christmas Party

今日約咗根德園隔離班既同學仔開聖誕派對，因為自己班冇攪，唯有參加隔離班既Party啦。

個Party既攪手真係有心機，整咗張聖誕咭送俾小朋友，有佢地個樣架，好靚呀!



有得自己設計聖誕樹曲奇餅

去完呢個聖誕Party先至知道，原來小朋友玩拔河係咁攪笑架，原來善如係咁大力架，哈哈。

要令到一大班小朋友聽指令，真係唔係咁容易呀，真係佩服啲老師。

善如初頭見到呢個彈床好開心要玩，點知入到去俾人踩到隻手之後，就好驚，一有人喺入面就唔肯入去，要全部人走哂先至肯入去，俾佢激死。

要全部人影一張大合照望鏡頭既，真係可以話冇可能咁濟。

最後仲有大抽獎添。



Boxing Day

今日既天氣仍然好凍，好似仲凍過前兩日添，所以真係唔係好想出街，今日只係帶咗善如去飲茶，之後近近地去咗寶康公園玩吹波波，不過可能因為天氣凍，善如咳得好犀利，成日玩玩吓就咳到死。

夜晚姨媽媽同姨丈丈入黎我地屋企食扒同埋刺身，姨媽媽仲買咗善如至愛既加州卷添。

對話
自從舊個工人走咗之後，善如都仲未肯番細床瞓，不過加上而家天氣咁凍，如果得姐姐睇住佢，我地都驚佢凍親。 但係上幾個星期，媽咪都唸住試吓用啲方法，睇吓佢肯唔肯，因為爸爸瞓窗台好辛苦呀。

媽咪：[善如就黎聖誕節喇，如果張隻襪放喺細床邊，聖誕老人會放禮物喺乖既小朋友隻襪到架。]
善如：[咁放喺大床到啦。]
媽咪：[放喺大床到，唔係小朋友床，可能聖誕老人睇唔到架，咁善如咪冇禮物囉。]
善如：[咁放喺細床到囉。]
媽咪：媽咪以為攪掂添。[好啦，咁善如就要喺細床瞓喎。]
善如：[唔好呀，我要瞓大床呀。]
媽咪：[聖誕老人要見到張床有人瞓，同埋有隻襪先至會派禮物架。咁你要唔要禮物呀??]
善如：[咁我唔要喇。]

當然爸爸媽媽都唔想善如唔開心啦，所以照叫咗善如放隻襪喺大床側邊，睇吓聖誕老人睇唔睇到啦，最終當然善如都收到禮物啦。

Boxing Day對話
爸爸：[今日係Boxing Day，應該今日先拆聖誕禮物，不過你之前拆咗，所以今日冇禮物拆。]
善如：[不如我今日放隻襪喺張細床到，睇吓聖誕老人會唔會送聖誕禮物俾我好唔好呀?]
爸爸：[聖誕老人走咗喇，要等到下年先至有聖誕禮物架喇!]
善如：好失望既樣子。

西貢市中心

善如開始沈迷媽咪既Iphone game，要喺公園坐喺度打機，不過媽咪買得都預咗架啦。嘻嘻!








聖誕快樂!

















今個聖誕節天氣好凍呀，爹D媽咪帶咗善如去西貢食松記車仔麵，有媽咪至愛既豬大腸，不過善如喺巴士度已經瞓著咗，所以爸爸媽媽食先，唸住等善如瞓醒睇吓有乜野啱善如食再買俾佢食，點知到差唔到食哂既時候善如就起身，媽咪唯有將剩番少少既米線同埋菜俾善如食啦。

睇吓佢食得幾滋味!

善如見到好多唔同種類既狗，佢好開心，成日都好想掂啲狗，但到隻狗行埋佢面前，佢就好驚，到而家都係仲未夠擔掂狗。



見到熱辣辣的雞蛋仔同埋格仔餅，爸爸忍唔住買咗黎食，不過，真係好耐未食過啲咁......難食既雞蛋仔同埋格仔餅喇!



玩完一陣，我地就去咗姨丈丈舖頭剪頭髮，搭小巴時，善如又瞓著咗，真係難為爸爸喇，要由采頤花園抱呢隻42磅既豬豬去舖頭，都咪話唔辛苦，不過佢瞓著咗就冇辨法啦。去到舖頭要叫善如起身剪頭髮，佢初頭扭計喊，點知姨丈丈同佢講，洗頭都可以繼續瞓覺架，咁佢就肯喇。

睇吓佢有幾舒服，真係洗頭都瞓得著架。

夜晚約埋公公婆婆出黎一齊食羊腩煲。

錫錫爸爸

因為善如成日都要爸爸抱，但係爸爸而家開始會同佢講話冇力，有時爸爸會叫善如鍚吓先有力抱，所以當爸爸一抱起善如既時候，佢就不自覺咁係咁鍚爸爸，為求佢多啲力抱佢，爸爸真係冧到爆呀。

聖誕快樂

爹D送咗部iphone俾媽咪做聖誕禮物，當然BB都唔少得啦，我地買咗盒Hello Kitty整Sticker既機俾善如，哈哈，我地尋晚就叫善如放隻聖誕老人襪喺間房到，今朝一起身善如見到份禮物好開心，佢問係咪聖誕老人送架，我地當然答係啦。

善如急不及待整咗幾張Sticker俾爹D媽咪，仲有一把小朋友剪刀俾佢剪紙，佢好開心呀。

平安夜

善如呢排喺屋企冇得番學好悶，佢每朝早起身都問，今日星期幾呀，使唔使番學呀，頭兩日就話好野唔使番學，之後開始佢就話點解唔使番學既，媽咪答佢：[係呀，放緊聖誕假呀，呢個假期好長架。] 善如又問：[點解呢個假期咁長既，我好掛住米老師呀。] 之後仲喊添。其實媽咪都好開心架，因為起碼佢都鐘意番學。

今日媽咪起身番工，差唔多出門口既時候，突然間見到善如醒咗，
善如：[媽咪，你使唔使番工呀。]
媽咪：[要呀，媽咪而家番工呀。]
善如：[點解你要番工既，我好掛住您呀媽咪?] 之後就係咁喊，
媽咪即刻攬實善如同佢講：[你同姐姐玩一陣玩具先啦，媽咪番埋今日工就可以放幾日假陪你喇。]
 之後佢就扁哂咀咁點頭，但係都係咁攬實媽咪唔俾佢走，隔一陣先至肯放開。媽咪見到呢啲情況真係好唔捨得走呀。

今日平安夜本來唸住留喺屋企陪善如，因為佢學英文要學到七點鐘，終於都係忍唔住，爸爸去接善如放學，之後就去咗搵姨媽媽姨丈丈去九龍城打邊爐，因為呢間打邊爐竟然冇腸仔食，姨媽媽去咗百佳買咗一包腸仔，善如食咗好多條腸仔﹑蝦﹑丸同埋粟米。我地大人都食咗好多野，有老虎蝦﹑好好味既肥牛﹑蜆﹑牛柏葉等等，好滿足既一餐。

有人鐘意咗善如呀???

爹D陪善如瞓既時候，突然間

善如：[鄧浩然鐘意咗我？］
爸爸聽到即刻叫媽咪入黎聽，然後爹Ｄ媽咪一齊問善如：［邊個係鄧浩然呀？係咪同學仔黎架？？］
善如：［係呀。］
媽咪：［佢點解鐘意你既？］
善如：［因為呢，老師叫鄧浩然揀個女仔呀，之後呢，鄧浩然揀咗我呀。］
媽咪：［係呀，咁鄧浩然有冇同你講話鐘意你呀？］
善如：［冇呀，不過佢揀咗我呀？］
媽咪：［哦，咁你鐘唔鐘意鄧浩然呀？］
善如：［我都鐘意呀。］

哈哈，好攪笑呀，善如個樣仲要好可愛咁講架，笑死媽咪爹Ｄ呀。

做冬

今日１２月２２日做冬，爹Ｄ媽咪放工收四點，番屋企接善如去婆婆屋企做節，等埋大舅父一家車我地去，善如真開心，公公買咗聖誕禮物俾啲小朋友，善如就收到佢至愛既波波，佢全場冇停過咁拋黎拋去，好鬼開心。仲有就係聖誕老人頭飾，哈哈，幾靚女。

認字

善如番咗根德園三個月到，佢最叻既就係認到好多中文字，爹D媽咪都唔知學校點樣教咁多中文字，因為學校有送埋字咭俾我地喺屋企同佢玩，所以媽咪間唔中都會攞啲字咭出黎問佢既。

學校好得意既，除咗要佢地認得個字之外，仲要佢地記埋個配詞，例如：鳥 - 小鳥。善如個字就基本記得哂，不過因為開始多字要認，個配詞有時就會唔記得咗。不過點都好啦，以K1黎講有咁既成績已經好開心喇，不過，唔知佢會唔會好快唔記得呢。

幫手照顧灼圻弟弟

今日叫咗stephen叔叔黎我地屋企整電腦，要jailbreak iphone呢啲野真係難攪，都係要搵專家幫手至得呀，爸爸媽媽掛住學用i Tune所以唔得閒理灼圻，善如好乖好幫手，又幫灼圻蓋被，當佢喊既時候又拍吓佢，不過佢就較為大力咗啲，因為之前有個BB公仔，當佢喊既時候要大力拍佢，佢先至會唔喊，點知善如又以為要咁大力拍，媽咪好緊張呀，好驚佢拍親灼炘呀。

Parson Music

Do Re Mi Tapping Song

I can tap my knees, I can call it do, do, do
I can tap my tummy, I can call it re, re, re
I can tap my chest, I can call it mi, mi, mi
Tap a do, re, mi and a mi, re, do

喺Parson music學咗呢首歌，善如唔夠快，成日攪亂Do, re, mi 同埋mi, re, do.


Old McDonald had a farm


Mr. Elephant - 善如扮得似唔似Elephant 呢，佢隻手喺度扮緊Elephant個鼻呀。

iPhone4

媽咪終於出咗個iphone4喇，今日媽咪放咗工，就同爸爸去咗買iphone貼同埋殼，原來都唔算好多款，攪咗成個下晝，終於買到，要download多啲game俾善如玩吓先。

善如就喺屋企同姐姐瞓覺，因為佢食咗藥，瞓到成七點鐘先至起身，到夜晚唔該哂二舅父車佢去南山邨一家人食飯。

聖誕假

善如番埋今日Birthday Party，就開始放聖誕假喇，放成兩個幾星期，到一月三號先再番學，雖然媽咪攞唔到假，都唔緊要啦，好彩爸爸攞到月尾假陪佢，如果唔係就悶死佢lu。

不過善如放假有功課呀，有幾張連線要做，都好既，唔使佢咁悶。

今日開Party又有好多禮物，仲收到啲同學仔既聖誕咭添，嘻嘻，媽咪冇幫善如整添。:p

流浮山海鮮一日遊

今日媽咪公司攪流浮山海鮮一日遊，雖然爹D媽咪已經去過好多次，不過唔緊要啦，當陪善如去玩吓啦。


香港教育片場 - 呢啲就係佈景黎架，哈哈，好攪笑，有茶餐廳﹑警車﹑銀行連醫院都有。


警車

茶餐廳

善如學人整鮑魚麵

大尾督

完咗個活動之後我地去咗又一城行一陣然後食野，叫咗碗三文魚菇菇米粉俾善如，佢自己食仲要食得好快，一啲都唔剩仲話要食多啲添，食完仲開心都死。如果你日日食飯都係咁就好喇。媽咪發覺佢食粥食粉就快好多，係食飯就慢都死，善如，你唔可以揀飲擇食架。

寶康公園

啲靜電攪到善如啲頭髮幾得意

好似好耐都冇同善如去公園玩lu，所以今日等善如跳完舞，帶咗善如去公園玩吹波波，佢玩公園啲設施都仲係好論盡，成日都要爸爸媽媽扶佢，佢先至夠膽玩，真係俾佢激死，咁細膽。

尖沙咀睇聖誕燈飾

我地今日約咗灼烜哥哥去尖沙咀睇燈飾，攪到好夜呀，成十二點幾先至瞓，好彩善如聽日9:30am先至學跳啫。