拜年@Jones & Nelson哥哥家

今日入咗Jones 哥哥屋企拜年，首先去咗元朗食好味既豬扒雞翼飯先，之後先至入去屋企玩。

善如好掛住佢兩隻貓同埋一隻狗，佢只係鐘意白色既糖糖，唔鐘意黑色既飛古，一見到佢，佢就好驚即刻要走。

善如同Suki 姐姐同埋Owen 哥哥玩得開心，佢地好多節目，又玩狐狸先生幾多點，善如仲識得教人玩UNO添，佢地咁耐冇見，善如都仲記得佢地兩個個名。

夜晚番到屋企，覺得善如個頭好興，竟然發燒發到103度，俾佢嚇死，其實前兩日已經有幾聲咳了，明天要即刻帶佢睇醫生呀。

唔想搭校車

善如無端端喊話唔想搭校車，因為番學既時候，要坐喺張子朗隔離，佢成日好頑皮，成日打到佢，媽媽叫佢如果有同學打佢，佢一定要話俾老師聽，佢話冇講。佢仲話番學就唔想搭校車，但係放學就唔怕，因為張子朗放學唔係坐喺佢隔離。

龍華食乳鴿

夜晚天氣好凍，真係唔係好想出街，好彩book咗龍華食乳鴿，喺酒樓入面就暖烘烘，一出門口就凍到死呀!

在大哥屋企玩啤派，打麻雀

今次幫三個在一二月生日既慶祝

見新年咁開心，大家一齊玩吓魚蝦蟹咁，做庄通常都嬴，梗係俾公公贏吓錢啦，嘩，公公果然贏咗好多，勁呀!

夜晚在彩雲邨團年

每年既初二，都要在彩雲酒樓團年，四圍枱，年年善如都好怕羞，今年果然大個女，好似冇咁怕羞了。

整生日咭俾表姐

明天係表姐既生日，善如一早即刻話要整張生日咭俾佢，佢話我好鍚表姐架，我一定要整張靚咭俾表姐架，之後佢畫咗好多公仔，雖然啲字唔係好識寫，同埋寫得核突咗啲，但係都起碼睇到係乜野字呀。

太古城行街

初二朝早去婆婆家拜年，之後就同大舅父姨媽媽佢地一齊去咗太古城行街，嘩! 太古城有好兩棵好大既桃花呀，好靚呀! 不過最大那兩棵冇影到相，因為太高影唔哂。

初一食盆菜

今日首先去銅鑼灣嫲嫲家拜年，之後去香港仔太嫲家，再去奧運站姨婆家拜年，到夜晚番屋企同姨媽媽姨丈丈食盆菜，好忙碌的一天啊!

婆婆家食團年飯

今日番婆婆屋企食團年飯，我地有十五個人，公公婆婆就整十五樣餸，真係誇張，次次都食唔哂，不過，其實公公婆婆因為好開心有咁多個仔女同埋孫番黎食飯，又驚唔夠餸，所以先整咁多，難為佢地之後要食好多餐先至食得哂啲野。

銅鑼灣行花市及在嫲嫲家食團年飯



落雨濕濕行花市真掃興，所以行一陣就要走，因為越落越大添。　

至從之前試過夜晚去行花市多人都爆之後，我地都冇乜試過夜晚行了，今日下午去咗銅鑼灣行花市，再去埋圖書館先至上嫲嫲屋企食團年飯。

可能因為我太靚呀!

得意對話
善如：[媽咪呀，唔知點解呢? 張子朗唔鐘意我!]
媽咪：[點解既? 佢做乜野唔鐘意你架?]
善如：[我都唔知呀，通常啲男仔都係鐘意靚既女仔架，但係呢佢都唔鐘意我既，但佢就好鐘意Emily Cheung 喎。]
媽咪笑住問：[係咩，通常男仔都鐘意靚既女仔架?]
善如：[係呀，不過張子朗唔係囉，我都唔明白既。]
善如再唸咗一陣話：[可能因為我太靚喇，所以佢唔鐘意我。]
媽咪第一次聽到善如呢種咁自滿既說話，覺得佢好攪笑，哈哈，都好，等佢多啲自信心。

開利是Party!

今年有浚瑜表姐同埋善如幫手包利是，善如話好開心呀，佢問係咪開利是Party呀??

第二次番崇拜

今日係第二次番祟拜，講真，講道的時候真的有些悶，但係好開心，爸爸想瞓但係都冇瞓到覺，好彩都聽到，希望keep住啦。

龍皇酒樓飲茶

今日媽咪做個考順女，同埋公公婆婆飲茶，呢間係公公婆婆成日想試"幟哥"開既龍皇酒樓，間酒樓有幾巴閉，唔book位通常都話冇得入，仲要十一點先開門。今日終於一齊黎食吓，講真，我地又唔覺得有乜野特別，又唔係特別好食，只不過係每人自己隻杯都有蓋，驚你啲茶凍哂，其餘既野食又唔係真係好大驚喜喎。

之後再陪公公去配副老花眼鏡，唔記得同公公影張相添，好型仔架! 只係幫咗善如影咗佢個白兔look!

第一次番崇拜

今日係一個大日子，爸爸媽媽帶埋善如正式一齊番祟拜，因為媽咪唔想求其找間教會番，加上又想找間近啲，所以找咗Linda 姨姨幫手，同佢地一齊番，點都好啲既，呢間教會係宣道會，都幾大，有早堂同埋午堂，午堂仲有埋幼兒崇拜，善如可以同埋Austin一齊番祟拜，佢都幾開心，番完之後，出面仲有鞦韆俾佢地玩添。

而家都仲係試驗性質，俾爸爸媽咪同埋善如適應吓先啦，因為個個星期咁樣番，真係要好有恆心至得，不過點都好啦，我地會繼續努力。

嫲嫲生日快樂!

今日去咗APM同嫲嫲慶祝生日，善如一見到咁靚既佈置就話要影相了。