善如好重呀......

啱啱睇咗手冊，原來老師喺十一月頭幫咗佢地度高同埋磅重，嘩嘩嘩，原來善如十一月五號已經有102cm，同埋19kg(即係41.8磅)，唔怪得之爸爸都話最近抱善如都覺得佢重咗啦，我地仲成日話佢得38磅，真係勁呀。善如，你成四十磅喇，幾時先至唔使爸爸抱呀。

得意事件簿

搽咗牛油

媽咪之前同爹D去咗大陸揼骨，而媽咪就有叫人收腳甲，所以油埋腳甲油，善如番到黎見到媽咪隻腳唔同咗，佢問媽咪：[媽咪，點解你隻腳搽咗牛油既?] 哈哈，笑死媽咪呀，媽咪即刻同番善如講，媽咪唔係搽咗牛油呀，係搽咗腳甲油呀。

蕉皮

媽咪同善如講故事，本書係有個小朋友踩到蕉皮跌咗落地，教啲小朋友唔可以笑佢，要扶起佢。媽咪將呢個故事講咗一次俾善如聽，當第二次媽咪再講既時候，佢就記得媽咪講過既野，就自己講，不過佢講咗:[有個小朋友踩到招牌呀! 我地唔可以笑佢架!] 哈哈，好攪笑!

九龍灣影相

今日等善如瞓醒晏覺，夜晚就帶咗善如去九龍灣影相，善如見到啲鴨仔同埋聖誕老人好開心呀，不過媽咪平時見到啲鴨仔係郁既，但係今日冇郁。

約咗爺爺嫲嫲食飯

爺爺送俾善如既頭飾

今晚媽咪公司攪燒野食，所以唔得閒同爸爸同善如食飯，爸爸同善如約咗嫲嫲食飯，食完飯之後爸爸帶咗善如去買咗好多有用既Pekkle送俾媽咪，番到屋企善如叫媽咪咪埋眼，逐樣逐樣送俾媽咪，哈哈，開心死媽咪喇!

學校既Assessment

善如不知不覺已經番咗學差唔多三個月喇，老師都教咗善如好多野，老師會在唔知會家長既情況吓做咗個Assessment，睇吓小朋友學咗幾多野。今日收到學校同善如做既Assessment，善如好叻呀，佢差唔多全部啱哂，除咗英文科有一條，佢睇唔到那隻係飛機，所以唔識答之後，其他全部都啱哂，爹D媽咪成日驚善如喺學校唔肯出聲，老師問佢野就算識都唔敢答，見到今次既Assessment都冇咁擔心，證明佢肯答啦。

媽咪放工番黎睇緊善如啲Assessment既時候，佢就走過黎，問媽咪：[呢個係乜野黎架，我唔識呀?? 你教我呀?] 媽咪：[呢隻咪飛機黎囉。] 善如：[ 哦，原來係飛機黎呀，即係A for Aeroplane啦。]

其實呢間學校都仲有個好處，就係唔需要爹D媽咪喺咁同佢溫習，老師係兩個禮拜先至話俾家長聽，佢地教咗啲乜野，又唔會話俾你知呢個星期做Assessment。

善如識得睇譜彈琴呀

善如識得睇譜彈琴呀，雖然係得個D key同埋quarter rest，但係都起碼彈得啱呀，善如好叻呀!

油顏色

善如油顏色真係越來越有心機同埋越來越油得靚，你地睇吓隻貓，啲顏色幾豐富，條尾幾似彩虹咁靚。

爸爸生日

今日爹D生日，爸爸媽媽一朝早就約咗姨媽媽同姨丈丈去大陸揼骨，之後夜晚番到黎就同善如去佐敦食海鮮，最後仲食埋甜品添。

真係失策，今日唔記得影相添，只係影咗小小甜品。


芒果腸粉


焦糖燉蛋

BBQ

善如今日一早咳得好緊要，所以同公公﹑大舅父佢地飲完茶之後，就去咗銅鑼灣睇醫生，之後番到屋企踩單車過去二舅父屋企玩，玩玩吓無端端發燒，本來今日係慶祝大舅父﹑大舅母﹑爹D同埋表哥生日既，點知要番屋企冇得燒野食，善如好唔開心，因為佢知道燒野食係有腸仔食，點知而家冇得食，媽咪唯有喺二舅父屋企叫工人煮兩條腸俾佢食，佢就好開心咁食完先至走。

善如發燒燒到102點幾度，仲成塊面都紅哂添，睇吓爹D個樣幾唔開心!

Yuki姨姨結婚了

今日係Yuki姨姨結婚既大日子，善如今日番完Parson Music同埋食埋野之後，就去咗九龍城浸信會恭喜Yuki姨姨，點知搭緊車去既時候，善如又已經忍唔住瞓著咗，去到觀禮全程都係瞓緊覺，真係激死。

i-phone apps

I-phone啲Apps真係好得意，呢個就係影張相睇吓你似邊個名星，哈哈，媽咪啲同事攞咗善如張相黎玩，哈哈，善如連張國榮都有62%似呀。

今日唱好多歌呀!

Three Balls

A little ball

A bigger ball

A great big ball

I see

now let us count the ball

one two three 啪啪啪

善如識得分男仔同女仔鞠躬的分別

London Bridge is falling down

一二三四五

五個手指頭

揮揮手 握拳頭

是我的小小手

Farmer in the dell

The farmer in the dell

The farmer in the dell

Hi-ho, the derry-o

The farmer in the dell

Jack be nimble

To Market
今日肯做埋動作呀!

Happy Birthday!

等善如去完Parson Music之後，就番黎同Nelson哥哥一齊慶祝生日，其實約咗Nelson哥哥好耐都約唔到，要攪到而家先至可以同埋爹D生日一齊慶祝生日，今日善如唔怕羞，仲唱歌俾哥哥聽添。因為有人喺度，所以冇瞓到下晝覺，善如仲同我地一齊食Pizza，攪到八點幾先至瞓。

棉花糖

善如今日學完Parson Music 之後，就去咗冒險樂園玩一陣，嘩! 佢同爹D食咁大舊棉花糖，舊棉花糖仲大舊個善如個頭呀，真誇張!

Recitation & Singing

Jack be Nimble

Jack be Quick

Jack jump over the candlestick

bu bu car

bu bu bu, bu bu bu,

I am little bu bu car.

bu bu bu, bu bu bu,

I am little bu bu car.

Parent-Child Home Reading Program

學校既親子閱讀計劃今個星期終於開始喇，學校會每兩個星期就會派三本書，之後就要還番啲書俾學校，呢個計劃真係好，因為爹D媽咪每次去親圖書館都好難搵書俾善如，而家起碼唔使搵得咁辛苦呀。