Megabox飲茶

今朝爸爸要番工，媽咪同善如去Megabox接佢放工，行行吓見到有個地方可以俾Megabox會員啲小朋友畫母親節咭(過咗咁耐都仲有母親節咭)，咁就俾善如玩吓啦，佢貼咗好多個心心比媽咪呀，媽咪冧哂呀!

夜晚約咗大舅父大舅母，姨媽媽姨丈丈佢地去咗食韓國燒烤。

學校生日會

今日善如學校攪生日會，係慶祝四月至五月既同學仔既，所以善如都有份，原來生日每個同學仔都會有個相架同埋禮物送架。

同孖仔玩

今日我地約咗孖仔一齊去將軍澳廣場既supermarket行吓，Ron 姨姨入咗錢唸住俾啲小朋友玩，點知架車一郁，善如就走喇。

行遠少少見到有間賣寵物既舖頭，有隻都幾大既狗，好彩隔住個玻璃，善如好鬼興奮，不過當隻狗行埋少少望住佢，佢就驚lu.

九華徑BBQ

今日一早起身落咗樓下游水，雖然善如玩得好開心，但係玩咗一陣就上番屋企，因為落到去發覺好大風，之後去咗飲茶，下晝就帶善如番學，之後媽咪落咗姨丈丈到剪頭髮，夜晚我地唸唔到食乜，竟然即興搭的士去咗九華徑燒野食，天氣就唔係咁好，好鬼焗，之後落雨就好啲(因為有帳篷，所以唔怕)，冇咁熱，不過大家都燒到成身大汗，連善如唔使燒都係咁話好熱呀。

三歲生日Party@Jockey Club

今年又參加咗Babykingdom 既三歲生日會，地點係喺HK Jockey Club攪自助餐，有做手工﹑有小丑扭汽球同埋大抽獎，善如今次又抽到獎，係一個麵包超人公仔黎架。 玩到成三點幾，之後去咗沙田第一城行街，善如就瞓覺，好彩借到BB車，如果唔係爸爸就辛苦lu。

生日Party既情況

小丑哥哥扭隻天鵝俾佢，叫佢試吓吹吓個汽球都驚，之後自己同我地玩個汽球就鬼死咁開心，其實個哥哥已經冇化妝啦，只係帶咗頂帽啫，佢都驚，真係俾佢激死呀!

善如成日冧冧爸爸，無端端玩玩吓係咁要鍚爸爸，真係唔怪得爸爸鍚到佢燶呀!

善如坐住架BB車，無端端攞住生日會送既羽毛玩，自己玩都玩得咁開心。

慶祝Nelson同埋善如生日

今日慶祝Nelson 同埋善如生日，Nelson同埋Jones哥哥買咗個座地既琴俾善如，佢好開心，一得閒就行埋去彈琴。

沖繩之旅 - 第五天

喺機場等緊番香港冇野做，善如學大人用牙籤，然後放喺個口都唔攞出黎。

沖繩之旅 - 第四天

見到咁大隻巴斯光年，善如開心到陣呀!

沖繩之旅 - 第三天

好大條金槍魚呀! 仲即刻劏黎俾我地食刺身添。

食海鹽雪糕食到幾滋味!

夜晚去食野善如瞓著咗覺。

沖繩之旅 - 第二天

海洋博公園

本來善如入到水族館一路睇魚都幾開心，望住啲魚周圍行，點知當佢見到.......

呢條咁大既魚之後，佢就驚到唔敢再睇喇，咁又真係幾得人驚既!

善如無端端擺個咁既姿勢，所以忍唔住影咗佢，哈哈!

有少少時間俾我地去一個唔係好靚既海灘玩，因為那日都幾凍，又驚善如冷親，所以入咗室內游水就算喇，但係善如唔肯走，佢好想玩沙。

夜晚去咗便利店買咗杯麵，點可以唔預埋善如呀，你地睇吓佢食到津津有味!

沖繩之旅 - 第一天

今年本來唸住去浮羅交怡旅行，點知唔成團，最終去咗沖繩，呢個旅行都係同姨丈丈姨媽媽去，今次仲加埋公公婆婆添，真係開心。 善如全個旅程冇上次去沙巴咁乖，有時都有扭計，食飯同埋坐旅遊車仲成日企起身添，之後我地鬧佢，佢就話我係跟表妹瑤瑤架，因為昨日母親節表妹瑤瑤企喺張椅度，所以佢就話跟咗佢咋，真係俾佢激死。

仲有，善如成日都唔肯去洗手間，其實沖繩啲toilet已經好乾淨，但係佢都唔肯去，有時成四五個鐘都冇去weewee，又驚佢賴喎，煩死呀。

因為搭香港快運，所以喺Terminal 2集合，之前都未試過。

兒童飛機餐，唔知點解善如唔係好鐘意食啲魚柳，可能因為"林"哂。

善如喺酒店刷牙企喺個洗手盤度，仲要擺埋姿勢，係咪好型呢!

母親節快樂

(後面)

(前面)

今日母親節，學校幫善如預備咗份禮物俾媽咪，原來係條頸錬，後面寫住:[媽媽，我愛你!] 之後爸爸攞出黎就叫善如俾媽咪喇，善如幫媽咪帶喺頸度，之後竟然唔係同媽咪講:[媽媽，我愛你!] 佢竟然話：[媽咪，辛苦您喇!]肯定係學校教佢既，媽咪聽到即刻冧哂。

兒童發展進度評估表

收到學校既兒童發展進度評估表，今次都係全部剔哂，善如叻叻! 下個月有個家長會，到時問吓老師善如喺學校既進度先。

善如病了

今日善如病咗冇番學，尋晚成晚都瞓得唔好，啲鼻水係咁流，加上個天又行雷閃電，攪到佢都冇攪好瞓，不過佢好攪笑，瞓到零晨無端端醒咗，坐喺張床度問爸爸媽媽：[點解出面有人打鼓既??]，好鬼攪笑，之後媽咪答：[出面唔係有人打鼓呀，係行雷呀!] 哈哈，又真係幾似打鼓聲既，善如好得意呀!


善如你要快啲好番呀，下星期要去旅行架!

工人姐姐番咗印尼

工人姐姐啱啱番咗印尼，而家等緊個新工人黎，呢段時間就要辛苦婆婆揍住善如，善如都暫時適應緊，佢呢兩日番到屋企門口都會問：[你估姐姐喺唔喺度呀?] 媽咪就答佢：[姐姐番咗佢自己屋企去揍佢個仔仔呀，佢唔番黎喇!] 希望佢適應啦。

喺度順便唔該哂大舅父大舅母添，因為呢幾晚都上咗佢屋企食飯。

Happy Birthday Chloe!

今日善如生日玩得好開心，一早就去咗樓下新開既烏冬店食烏冬，之後上咗去表哥表姐屋企玩咗一陣，晏啲就去咗樓下公園吹波波，再之後大舅父就車咗我地去寶康公園玩，最後就去咗大舅父屋企食Pizza同埋蛋糕，善如朝早九點鐘起身到夜晚十點先至瞓，其實佢中途已經好眼瞓，不過佢都可以頂得住。

生日禮物

大舅母個姐姐買咗條好sexy既裙仔俾善如，係大露背黎架，我地急不及待幫善如著，係咪好Kawaii呢!!

寶康公園

善如去到寶康公園玩到癲哂，不過就比蚊針咗好多下。

慶祝灼垣同善如生日

今日Creative English Workshop做咗棵樹，都幾得意，不過要攞住出街就真係好唔方便，所以我地影完相之後，就放咗啲氣，塞咗落袋。

灼垣今日生日，夜晚約咗佢地一齊去咗冒險樂園玩機動遊戲，佢地兩隻衰豬只係肯玩波波池同埋火車，今次善如都大膽咗好多，入波波池一啲都唔驚，仲玩到唔肯走添。不過佢唔肯玩火車，之後夾硬要佢上車，初頭攬到爸爸實，之後就冇事喇!