收到學校既生日咭

迦南幼稚園啲老師送咗張生日咭俾善如。

麵包超人彈彈波

Denise姐姐真係有心，善如生日除咗送咗份禮物俾佢之外，仲整咗張咭俾佢添，佢真係好鬼有心機架，多謝哂Denise姐姐!

善如收到份禮物好開心，佢竟然自己估到點樣玩喎。

媽咪接善如跳芭蕾舞

今日媽咪因為要出去做野，所以五點幾就番到屋企，媽咪好開心，因為可以接善如跳舞，見吓佢跳完舞出黎個樣開唔開心，原來佢都好開心既。

工人姐姐話，每次夠鐘去學跳舞，善如都係瞓緊晏覺, 所以次次都要叫醒佢，佢初頭都唔願意，但係一知道跳舞同埋有得著件咁靚既衫，佢就即刻起身。

第一次去大舅母屋企瞓覺

尋晚善如同表哥表姐去完打邊爐，因為好早，所以去了佢地屋企玩，之後善如突然間提起話要喺大舅母屋企瞓，大舅母應承咗，善如仲同爹D媽咪講拜拜添。

到下一日，舅母話善如尋日有喊過幾次，不過都好快就收聲。有一次既對話係咁既:

善如:[鳴嗚... 我要返屋企搵爸爸呀?]

大舅父:[而家咁夜冇車搭架!]

善如竟然識得答：[唔使搭車架，行番去就得架喇!] (因為我地住喺同一個屋苑)

大舅母：[咁你自己識唔識得行過去呀?]

善如：[識架!](不過佢真係識)

大舅母：[咁好啦，你而家瞓覺，等聽日瞓醒你就帶我行番你屋企啦!]

善如：[好呀!] (之後好快就瞓著)

善如好攪笑，佢竟然咁叻知道行過去就得，果然醒目豬，要俾個叻叻佢!

食完早餐之後，因為可以同表哥一齊打籃球，好開心!

芭蕾舞

善如真係好似好鐘意跳舞，一著住見衫就跳黎跳去，大家欣賞吓佢既舞姿啦。

老坑打邊爐

今晚約咗表哥表姐去老坑打邊爐，善如笑到成個大笑姑婆咁，勁搞笑。

Edward & Buzzlightyear

每次同灼垣出親街，灼垣都會有架Thomas 車，善如每次見到都好鐘意同埋問灼垣借黎玩，今日決定買架Edward俾佢; 至於巴斯光年就係因為佢去完迪士尼見過巴斯光年之後，佢就鐘意咗佢，唔知點解善如鐘意啲男仔野，不過好彩唔係男仔頭啫，因為佢都好鐘意公仔架。

種綠豆

學校俾咗啲綠豆善如種，過咗一個星期就已經長得高咗同埋出咗好多葉了。

城門水塘睇馬騮

今日我地約咗灼垣哥哥一齊行城門水塘睇馬騮，我地行咗一陣都見唔到，善如又成日要人抱，唸住放棄之際，有幾隻馬騮跑咗出黎，不過善如好似一啲都唔驚喎。

食酸既糖

善如食酸糖既時候個樣好鬼得意，打哂冷陣咁。

音樂樓梯

今日帶咗善如去九龍灣行吓呢個音樂樓梯，佢地整到好似一個鋼琴既鍵盤咁，每行一級樓梯就有一個唔同既音，好似彈琴咁，好鬼得意架。

同爺爺嫲嫲飲茶

今朝一早約咗爺爺嫲嫲飲茶，之後就梗係去咗善如好鐘意既維園打鞦韆，不過今次佢只係肯細細力咁打，大力啲都驚。

善如越來越識取捨

自從善如出風癞之後，爹D媽咪晚晚都同善如喺大床瞓，到佢好番之後本來唸住俾佢番細床同工人瞓，點知佢又成日驚，攪到我地都唔敢俾佢去細床瞓，呢兩日見善如好啲，所以嘗試吓同善如講叫佢去細床瞓，不過因為佢同我地瞓慣咗，所以佢就唔肯去細床瞓。 善如既對話，開始令到我覺得佢好醒目。

今晚媽咪問善如:[你乖唔乖呀?]
善如：[我乖。]
媽咪：[如果乖呢，媽媽就俾個貼紙你? 好唔好?]
善如：[好呀。]
媽咪：[咁今晚善如要乖啲，要去細床同姐姐一齊瞓喎，咁媽咪就俾個貼紙你喇。]
善如：<佢冇出聲>
媽咪：[你要唔要貼紙呀?]
善如：[唔要。]
媽咪：[點解唔要呀?個貼紙好靚喎]
善如：<佢又冇出聲>
媽咪：[你想去大床瞓定係要貼紙呀?]
善如：[我要去大床瞓。]
媽咪：[其實媽媽覺得你今日好乖喎，不如媽咪送一個貼紙俾你啦?]
善如：[我唔要喇。]
媽咪：[媽咪送個貼紙俾你，但係你又可以去大床瞓，咁你要唔要貼紙呀?]
善如：<佢個樣好攪笑，好似唸緊，有咁著數?? 但係佢都係好似唔係好信咁>
媽咪：[媽咪話送個貼紙俾你，但係你又可以去大床瞓，你要唔要貼紙呀?]
善如終於忍唔住答：[我要呀]

跳芭蕾爵士舞

善如成日都要人地抱，喺街成日都好懶唔肯郁，所以我地想俾善如試吓跳芭蕾舞，今日帶咗善如喺屋企樓下間小公主舞蹈學院試堂，善如好攪笑，當開始既時候，個個都要义住腰入去，之後我地叫善如都义腰啦，佢見到隔離啲小朋友個個都有條好靚既裙仔著，佢就問爹D媽咪：[點解我冇既?] 我地唯有答佢係呀，你今日試堂呀，如果你今日跳得好就有得著喇，之後佢就即刻义住條腰唸住入去，點知去到門口見到入面既環境好似唔係好對路(聽職員講呢排要考試既緣故，所以將啲鏡用哂啲白色紙封住)，佢又縮埋唔肯入去，之後同佢講咗成個字佢先至肯入。爹D媽咪仲驚住佢要喺入面四十五分鐘，佢會唔會喊既，點知到夠鐘因為開咗到門，所以可以望到善如，我地見到佢將自己對襪套在兩隻手度，扮蝴蝶係咁周圍咁飛，見到佢玩得咁開心，爹D媽咪當俾佢做吓運動，咁就幫佢報咗下星期開始跳喇。

仲有，老師會俾番張試堂既評語俾善如，佢話善如既音樂感好好呀。

善如食糖

今日俾咗粒有少少酸既糖俾善如，佢個表情好得意，一食落去既時候就笑，之後發覺酸既時候個樣就有少少變，但係之後都仲係堅持繼續笑既樣同埋話好味，可能佢驚如果話唔好味第時冇得食呀，哈哈!

善如打保齡

今晚喺九龍城廣場食完野，帶咗善如去冒險樂園打保齡球。

餵金魚

工人姐姐會喺呢個月既月尾走，工人姐姐話俾爹D媽咪聽佢前幾日同善如講咗話佢會走，要番印尼，以後都揍唔到善如，仲加上工人姐姐話好唔捨得善如所以攬住善如喊，唔知係咪因為咁，攪到善如呢幾日好唔開心，成日都話自己好驚，但係問佢驚乜佢又答唔出，成日無厘神氣，連成日坐大舅父架車都話驚，唔肯上車，又唔肯係去Toilet。攪到成家人都好鬼擔心，好彩過咗四五日佢就冇乜野喇。

見善如呢兩日都未出過街，夜晚帶咗佢上表哥表姐屋企玩，等佢開心吓，善如同表哥玩到傻哂，又跳床，又跑黎跑去，玩到十點幾都唔願走。表哥表姐送咗兩條金魚俾善如，善如好開心，一番到去就話要餵金魚食野。

錦田鄉村俱樂部

今日經爸爸介紹，成家人同埋舅公舅母總共三架車去咗錦田鄉村俱樂部燒野食，地方夠哂大，又可以踩單車﹑釣魚﹑餵羊仔﹑放風箏﹑踢波。 之後仲去埋呢個錦田樹屋睇那棵大樹添。















撈金魚

深圳書城

今日大舅父約咗我地去深圳書城行，個書城有成五層樓，都好多野睇，不過就冇乜冷氣，攪到媽咪出哂汗，不過都好有收獲，買咗十幾本書都係百幾元，真係好抵呀。















仲有卡拉OK室，可以用兩個半去選一首歌，個晝面仲可以見到自己添，都幾得意架。















夜晚去咗大漁鉄板燒食自助餐，都幾好味。

慶祝生日

今日係補番媽咪同埋二舅母既生日，因為夾咗好耐都夾唔到時間，媽咪下晝就負責打麻雀，爸爸就帶住善如﹑表哥﹑表姐去會所玩，善如玩得好開心，夜晚就去咗九龍城食牛肉餅。

去姨媽媽屋企瞓覺

今日見善如好番啲，朝早帶咗佢去食龜苓膏，俾咗個碗同埋匙羹佢自己食，點知佢食食吓無端端話：[咁既? 點解佢會走黎走去咁得意既?] 之後隔離食緊野個姨姨同埋個職員都忍唔住笑，佢地話善如好攪笑。

下晝帶咗佢番English Workshop，之後就去咗姨媽媽屋企打邊爐，因為打到好夜，所以姨媽媽提議不如善如留喺佢屋企瞓，咁我地就問吓善如好唔好，佢又好爽快咁話好喎，到走既時候佢仲好開心咁同爸爸媽咪講拜拜添。

又出風癩

善如前兩日又無端端出番風癩，痕到佢死咁濟，佢兩晚都冇瞓咁濟，係咁話媽咪，好痕呀，幫我"抓"呀，佢一晚講咗呢句野幾百次，真係好可憐呀，係今日先至好番好多，我地都費事周圍去咁遠，只係帶咗佢出街行一陣，但係已經好驚佢俾風吹親呀。